ەلىمىزدە كەيبىر قازاقستاندىق بلوگەرگە قاتىستى سالىقتىق تەكسەرۋلەر جالعاسىپ جاتىر. بۇل تۋرالى قارجى ۆيتسە-ءمينيسترى ەرجان ءبىرجانوۆ مالىمدەدى، دەپ حابارلايدى «ادىرنا» ءتىلشىسى.
ايتۋىنشا، قارجى مينيسترلىگىنىڭج مەملەكەتتىك كىرىستەر كوميتەتى تابىسىن تومەندەتىپ كورسەتكەن 854 قازاقستاندىق بلوگەرگە حابارلاما جىبەرگەن.
«بيىل 854 بلوگەرگە 1 586 حابارلاما جىبەرىلدى. ولاردىڭ تابىسى 72 ملرد تەڭگەگە تومەندەتىلىپ كورسەتىلگەن»، – دەدى ول جۋرناليستەرگە.
اتالعان دەرەكتەر بويىنشا جۇمىس جۇرگىزىلىپ، سونىڭ ناتيجەسىندە 622 بلوگەر قوسىمشا سالىق دەكلاراتسياسىن تاپسىرعان.
«ولار تابىستارىن 18,3 ملرد تەڭگەگە ارتتىرىپ، قوسىمشا 1 ملرد تەڭگەگە دەيىن سالىق تولەدى. سونداي-اق تاعى شامامەن 600 ميلليون تەڭگە تولەۋگە مىندەتتەلدى»، — دەدى ءبىرجانوۆ ۇكىمەتتەگى بريفينگتە.
ونىڭ ايتۋىنشا، قازىرگى ۋاقىتتا 7 بلوگەرگە قاتىستى تەكسەرۋ جۇرگىزىلىپ جاتىر. ولارعا قوسىمشا ەسەپتەلگەن سالىق سوماسى 10 ميلليون تەڭگەدەن اسادى.
«قازىر تەكسەرۋ شارالارى جۇرگىزىلۋدە. ەگەر وسى شارالاردان كەيىن سومالار ەرىكتى تۇردە تولەنبەسە جانە ايتارلىقتاي بولسا، ماتەريالداردى قۇقىق قورعاۋ ورگاندارىنا جولداۋ ارقىلى ءوندىرىپ الامىز نەمەسە پروتسەسسۋالدىق شەشىمدەر قابىلدانادى»، — دەدى ءبىرجانوۆ.
