فوتو ەلدىڭ دەنساۋلىق ساقتاۋ مينيسترلىگىنەن
گازا سەكتورىندا اتىستى توقتاتۋ تۋرالى كەلىسىمگە قاراماستان، اسكەري شابۋىلدار جالعاسىپ جاتىر، دەپ حابارلايدى “ادىرنا”.
شەتەلدىك باق دەرەگىنشە، 12 قاراشاعا قاراعان ءتۇنى يزرايل اسكەري ۇشاقتارى سەكتوردىڭ وڭتۇستىگىندەگى حان-يۋنيس قالاسىندا ورنالاسقان «ناسسەر» مەديتسينالىق كەشەنىنە سوققى جاسادى. سالدارىنان التى پالەستينالىق قازا تاۋىپ، 28 ادام جارالاندى.
گازا سەكتورىنىڭ دەنساۋلىق ساقتاۋ مينيسترلىگىنىڭ مالىمەتىنشە، قازا تاپقانداردىڭ اراسىندا ءبىر دارىگەر مەن 13 جاستاعى بالا بار. سوققى اۋرۋحانانىڭ حيرۋرگيالىق عيماراتىنىڭ ەكىنشى قاباتىنا تيگەن. زارداپ شەككەندەر مەن قازا تاپقاندار اراسىندا مەديتسينا قىزمەتكەرلەرى، ناۋقاستار جانە ولاردىڭ تۋىستارى بولعان.
يزرايل قورعانىس كۇشتەرى شابۋىلدى راستادى. اسكەريلەردىڭ مالىمدەۋىنشە، نىسانا حاماس بريگاداسىنىڭ كومانديرى مۇحاممەد ءابۋ يسمايل جانە مەديتسينالىق كەشەن اۋماعىندا بولعان وزگە دە ۇيىم مۇشەلەرى بولعان. سونداي-اق يزرايل تاراپى حاماس اۋرۋحانانى اسكەري ماقساتتا پايدالانعانىن العا تارتتى.
ال حاماس بۇل ايىپتاۋلاردى جوققا شىعارىپ، شابۋىلدى سوعىس قىلمىسى دەپ باعالادى. ۇيىم وكىلدەرى حالىقارالىق دەلدالدار مەن اقش اكىمشىلىگىن اتىستى توقتاتۋ تۋرالى كەلىسىمنىڭ ورىندالۋىن قامتاماسىز ەتۋگە شاقىردى.
شابۋىل سالدارىنان اۋرۋحانانىڭ بىرقاتار بولىمشەسىنىڭ جۇمىسى توقتاعان. مەديتسينالىق كەشەن ديرەكتورى احمەد ءال-فاررانىڭ ايتۋىنشا، وپەراتسيالىق بولمەلەر، راديولوگيا بولىمدەرى، زەرتحانالار مەن حيرۋرگيالىق ستاتسيونار زاقىمدانعان.
