مەملەكەتتىك كىرىستەر كوميتەتى الەۋمەتتىك جەلىدە تاراعان سالىق تولەمەگەن بلوگەرلەردىڭ تىزىمىنە قاتىستى مالىمدەمە جاسادى. ۆەدومستۆو بۇل قۇجاتتىڭ رەسمي ەمەس ەكەنىن جانە ونىڭ جۇرگىزىلىپ جاتقان سالىقتىق تەكسەرۋلەرگە قاتىسى جوعىن اتاپ ءوتتى، دەپ حابارلايدى "ادىرنا" ۇلتتىق پورتالى.
كوميتەتتىڭ حابارلاۋىنشا، جەلىدە تاراعان ءتىزىم مەملەكەتتىك كىرىستەر ورگانىنىڭ سالىقتىق باقىلاۋ اكتىسى ەمەس.
"الەۋمەتتىك جەلىدە تاراعان ءتىزىم سالىقتىق باقىلاۋ جۇرگىزەتىن مەملەكەتتىك كىرىستەر ورگانىنىڭ رەسمي قۇجاتى بولىپ سانالمايدى", – دەلىنگەن ۆەدومستۆونىڭ حابارلاماسىندا.
بۇعان دەيىن ينتەرنەتتە سالىقتان جالتارعان قازاقستاندىق بلوگەرلەر مەن شوۋ-بيزنەس وكىلدەرىنىڭ ءتىزىمى تاراعان بولاتىن.
2023 جىلدىڭ 29 قازانىنداعى رەسمي دەرەككە سايكەس، ەلىمىزدە تىركەلگەن 745 بلوگەر 9 اي ىشىندە مەملەكەتكە 1,2 ميلليارد تەڭگەدەن استام سالىق تولەگەن.
سالىق كودەكسىنە سايكەس، Instagram, YouTube, TikTok جانە باسقا دا الەۋمەتتىك جەلىلەردە 20 مىڭنان استام جازىلۋشىسى بار تۇلعالار رەسمي تابىس تاۋىپ، سالىق تولەۋى ءتيىس. ولاردىڭ جارنامادان جانە اقپاراتتىق ونىمدەردى ىلگەرىلەتۋدەن تاپقان تابىستارىنا زاڭ بويىنشا سالىق سالىنادى.
