اقش پرەزيدەنتى دونالد ترامپتىڭ قازاقستان تاۋارلارىنا 25% باج سالىعىن ەنگىزۋىنە بايلانىستى قر ساۋدا جانە ينتەگراتسيا مينيسترلىگى رەسمي مالىمدەمە جاسادى، دەپ حابارلايدى “ادىرنا”.
2025 جىلعى 7 شىلدەدە اقش پرەزيدەنتىنەن وسى جىلدىڭ 1 تامىزىنان باستاپ بىرقاتار ەلگە، ونىڭ ىشىندە قازاقستانعا قاتىستى جاڭا يمپورتتىق باجدار ەنگىزىلەتىنى تۋرالى رەسمي حابارلاما كەلىپ ءتۇستى. قازاقستاننان اقش-قا ەكسپورتتالاتىن ونىمدەر ءۇشىن جەتكىزىلىمدەردىڭ بارلىق كولەمىنە 25 پايىزدىق بىرىڭعاي مولشەرلەمە بەلگىلەنگەن.
مينيسترلىك مالىمەتىنشە، قازاقستاندىق ەكسپورتتىڭ باسىم بولىگى – مۇناي، ۋران، كۇمىس، فەرروقورىتپا، تانتال جانە تيتان سياقتى نەگىزگى شيكىزات پەن ستراتەگيالىق تاۋارلار – جاڭا تاريفتەردىڭ قولدانىستان الىنۋىنا بايلانىستى جاڭا باجسىز جەتكىزىلۋىن جالعاستىرا بەرەدى. قابىلدانعان شارالار قازاقستان ەكسپورتىنىڭ شامامەن 95 پايىزىنا اسەر ەتپەيدى دەپ كۇتىلىپ جاتىر.
"قازاقستاندىق تاۋارلارعا بولجامدى ساۋدا رەجيمىن ساقتاۋ ماقساتىندا قر ۇكىمەتى اقش اكىمشىلىگىنە ءوزارا ساۋدا شارتتارىن جاقسارتۋ جونىندەگى ناقتى شارالار مەن باستامالار جولدادى. قازاقستان ماقساتى – نارىققا قول جەتكىزۋ جانە ساۋدا شارتتارى ماسەلەلەرى بويىنشا كەلىسىلگەن شەشىمدەر قابىلداۋ. قازىرگى ۋاقىتتا امەريكا تاراپى قازاقستان ۇسىنىستارىن قاراستىرۋدا جانە كەلىسسوزدەردى وتكىزۋ كۇنى تۋرالى حابارلايدى. قازاقستان ۇلتتىق مۇددەلەرىن قورعاۋ جانە تۇراقتى ساۋدا-ەكونوميكالىق ارىپتەستىكتى دامىتۋ ماقساتىندا امەريكا تاراپىمەن ودان ءارى كەلىسسوزدەر جۇرگىزۋگە دايىن", – دەلىنگەن مينيسترلىك حابارلاماسىندا.
