فوتو: قىرعىزستان پرەزيدەنتىنىڭ ءباسپاسوزى
قىرعىزستان پرەزيدەنتى سادىر جاپاروۆ ەلدىڭ وڭتۇستىگىندە قىرعىزدار مەن وزبەكتەر اراسىندا ۇلتارالىق قاقتىعىس تۋىنداتۋعا باعىتتالعان ارەكەتتەر جاسالۋى مۇمكىن ەكەنىن ايتتى، دەپ حابارلايدى "ادىرنا" ءتىلشىسى Politico-عا سىلتەپ.
پرەزيدەنت جاپاروۆتىڭ سوزىنشە، كەيبىر ساياسي كۇشتەر الداعى پرەزيدەنت سايلاۋىنا كەدەرگى كەلتىرۋ ماقساتىندا جاپپاي تارتىپسىزدىك ۇيىمداستىرۋدى تالقىلاپ جاتىر.
12 قاراشادا حالىققا ۇندەۋ جاساعان مەملەكەت باسشىسى ۇلتارالىق ارازدىقتى قوزدىرۋ جوسپارى تۋرالى اقپارات العانىن ايتتى. ونىڭ سوزىنشە، ارانداتۋشىلار جالعان اقپارات تاراتىپ، ازاماتتاردىڭ ۇلتتىق نامىسىنا تيەتىن مالىمدەمەلەر جاساۋى مۇمكىن.
«ازىرگە ولار بۇل تۋرالى تەك ءسوز قىلىپ ءجۇر. الايدا بۇل ارانداتۋشىلىق نيەتتەردىڭ ءىس جۇزىنە اسۋ قاۋپى بار»، – دەدى سادىر جاپاروۆ.
پرەزيدەنت 1990 جانە 2010 جىلدارى قىرعىزستاننىڭ وڭتۇستىگىندە بولعان، ادام ولىمىنە اكەلگەن قايعىلى وقيعالاردى ەسكە سالدى. ول ەكى حالىقتىڭ وكىلدەرىن ارانداتۋعا ەرمەۋگە شاقىرىپ، اعا بۋىنعا جاستارعا مۇنداي قاقتىعىستاردىڭ اۋىر سالدارىن ءتۇسىندىرۋ قاجەتتىگىن ايتتى.
سونداي-اق سادىر جاپاروۆ ەلدەگى تۇراقتىلىقتى بۇزۋ ارەكەتتەرىن «قىتاي – قىرعىزستان – وزبەكستان» تەمىرجولىنىڭ قۇرىلىسىنا قاتىستى جاعدايمەن بايلانىستىردى. ونىڭ پىكىرىنشە، كەيبىر ساياسي كۇشتەر بۇل كولىك جوباسىنىڭ اياقتالۋىنا مۇددەلى ەمەس.
مەملەكەت باسشىسى بيلىكتىڭ جاپپاي تارتىپسىزدىكتەردىڭ الدىن الۋعا جەتكىلىكتى مۇمكىندىگى بار ەكەنىن اتاپ ءوتتى. سونىمەن قاتار ازاماتتاردى كۇدىكتى ارەكەتتەر تۋرالى قۇقىق قورعاۋ ورگاندارىنا حابارلاۋعا شاقىرىپ، ۇلتارالىق ارازدىقتى قوزدىرعاندار زاڭ اياسىندا قاتاڭ جاۋاپكەرشىلىككە تارتىلاتىنىن ەسكەرتتى.
ايتا كەتەيىك، قىرعىزستاندا كەزەكتى پرەزيدەنت سايلاۋى 2027 جىلعى 27 قاڭتارعا بەلگىلەنگەن. قازىرگى پرەزيدەنت سادىر جاپاروۆ ەكىنشى مەرزىمگە ءتۇسۋ ءۇشىن ورتالىق سايلاۋ كوميسسياسىنا ءوزىن-ءوزى ۇسىنۋ تۋرالى ءوتىنىش بەرگەن.
