ەۋروپا قىتاي ەلەكتروموبيلدەرىنە كوپ سالىق سالا باستادى. بۇل تۋرالى ەۋروكوميسسيا ەو اۋماعىنا قىتايدان كىرگەن ەلەكتروموبيل ءۇشىن سۇرالاتىن سالىق مولشەرى ارتقانىن مالىمدەدى، دەپ حابارلايدى “ادىرنا” ۇلتتىق پورتالى kolesa.kz سايتىنا سىلتەپ.
اقپاراتقا سايكەس، قازىرگى تاريف ۋاقىتشا. ەۋروكوميسسيا 4 اي قوسىمشا كەڭەسىپ، قاراشادا بەس جىل كۇشىندە بولاتىن جاڭا تاريفتەردى بەكىتەدى.
قارت قۇرلىقتىڭ مۇنداي قادامعا بارۋىنا نارىقتاعى باسەكە شارتتارىنىڭ بارىنە تەڭ ەمەستىگى سەبەپ بولدى. ەۋرووداق بىلتىر قىتاي اۆتووندىرۋشىلەرى مەملەكەت قولداۋىنىڭ ارقاسىندا جاھاندى جاۋلاپ جاتىر دەپ كۇدىكتەنگەن. جەرگىلىكتى وندىرۋشىلەردە ونداي مۇمكىندىك جوق. ولاردىڭ تۇتىنۋشىدان ايىرىلىپ قالۋ قاۋپى جوعارى ەكەنىن ەسكەرگەن ەۋروكوميسسيا جاعدايدى قولعا الۋ ءۇشىن جوعارى سالىق مولشەرىن بەكىتۋ تۋرالى شەشىم قابىلدادى.
قۇزىرلى ورگاندار تەرگەۋ جۇرگىزىپ، قىتاي بيلىگى قاي كومپانياعا قانداي كومەك بەرىپ وتىرعانىن انىقتاعان. سالىق سوماسىن دا سوعان سايكەس بەلگىلەدى. ماسەلەن، جەكەنىڭ قولىنداعى BYD كومپانياسىنا 17.4 % دەگەن تاريف ەنگىزسە، Geely 19.9 % بەرەدى، ال باسىم بولىگى مەملەكەتكە تيەسىلى SAIC ءۇشىن 37.6 % بەكىتتى. برەندتەردىڭ ءبىرازى 20.8 % سالىق تولەيدى.
كوميسسيا مالىمدەمەدە شانحايدا جاسالعان كولىكتەرىن ەۋروپادا ساۋدالاپ جاتقان Tesla-نى دا اتاپ ءوتتى. ەگەر كومپانيا جەكە تاريف ەنگىزۋگە قاتىستى دايەكتى شاعىم بەرسە، وعان بولەك مولشەرلەمە بەكىتەدى. بىراق ناقتى تاريفتەر كۇشىنە ەنگەنىن كۇتۋ قاجەت.
كەيبىر دەرەك بويىنشا جاڭا مولشەرلەمە قولدانىستاعى 10 پايىزدىق سالىقتىڭ ورنىن باسپاي، سونىڭ ۇستىنە قوسىلادى ەكەن. دەمەك، بىرقاتار قىتاي كومپانياسى بۇرىنعىدان ءبىر جارىم ەسە ارتىق سالىق تولەۋگە ءماجبۇر بولادى. سالا اناليتيكتەرىنىڭ ەسەبىنە سۇيەنسەك، اسپان استى ەلى ەلەكتروموبيل وندىرۋشىلەردى قولداۋ ءۇشىن 230 ملرد دوللاردان اسا قاراجات جۇمساعان.
