الماتىدا ساربازعا كۇش قولدانىپ، ونى دەمالىس ۋاقىتىندا زاڭسىز جۇمىسقا تارتقان وفيتسەرگە قاتىستى ۇكىم شىقتى، دەپ حابارلايدى "ادىرنا" ۇلتتىق پورتالى.
ءىس الماتى گارنيزونىنىڭ اسكەري سوتى قاراۋىندا بولدى. سوت مالىمەتىنشە، وفيتسەر قول استىنداعى ساربازعا فيزيكالىق كۇش كورسەتىپ، دەمالىس ۋاقىتىندا جۇمىسقا ماجبۇرلەگەن. وسىلايشا، ول قىزمەتتىك وكىلەتتىگىن اسىرا پايدالانعان.
ايىپتالۋشىعا قازاقستان رەسپۋبليكاسى قىلمىستىق كودەكسىنىڭ 451-بابى 1-بولىگى (بيلىكتى نەمەسە قىزمەتتىك وكىلەتتىگىن اسىرا پايدالانۋ) بويىنشا ايىپ تاعىلدى. مەملەكەتتىك ايىپتاۋشى ونى 3 جىلعا بوستاندىعىن شەكتەۋدى سۇراسا، قورعاۋشى 1 جىل 6 اي مەرزىمگە جەڭىل جازا تاعايىنداۋدى ءوتىندى.
سوتتالۋشى ءوز كىناسىن تولىق مويىنداپ، جابىرلەنۋشىگە كەلتىرىلگەن ماتەريالدىق جانە مورالدىق شىعىندى وتەۋگە دايىن ەكەنىن جەتكىزدى. ال جابىرلەنۋشى سوتتان بارىنشا قاتاڭ جازا قولدانۋدى تالاپ ەتتى.
سوت شەشىمىمەن وفيتسەر كىنالى دەپ تانىلىپ، 2 جىلعا بوستاندىعىن شەكتەۋ جازاسىنا كەسىلدى. سونىمەن قاتار ول «اعا لەيتەنانت» اسكەري شەنىنەن ايىرىلدى. ەندى ول جابىرلەنۋشىگە كەلتىرىلگەن شىعىندى تولىق وتەۋگە مىندەتتەلدى.
