نۇرسۇلتان قالاسى جانىنداعى №68665 اسكەري بولىمشەسىندە ارمان ا. ەسىمدى كاپيتان شەنىندە ۆزۆود كومانديرى 2022 جىلى 26 اقپاندا ول عيمارات ىشىندە قارۋىنان اتىپ، وعىمەن ارىپتەسىن جارالاعان. وقيعا سىرتقا جايىلماي، ءبولىم ىشىندە رەتتەلىپ، "جابۋلى قازان" كۇيىندە قالعان كورىنەدى. سودان بەرى قىلمىستىق ءىس، تەرگەۋ جۇرگەن. بىراق ءىس سوتقا دەيىن جەتپەدى، دەپ حابارلايدى “ادىرنا” ۇلتتىق پورتالى inbusiness.kz سايتىنا سىلتەپ.
تەرگەۋ كەزىندە اسكەري قىزمەتشى قىزمەتىنەن ۋاقىتشا الاستاتىلعان. ءتىپتى، ارميا قاتارىنان مۇلدەم قۋىلۋى ىقتيمال.
الايدا وقيعاعا قاتىستى وفيتسەردىڭ اناسى، نۇر-سۇلتان تۇرعىنى، زەينەتكەر گۇلايىم اپاي ايتىپ بەردى. ول قورعانىس مينيسترلىگىنە حات جازىپ، بالاسىن قارۋلى كۇشتەر ساپىنان قۋماۋدى، جۇمىسىن جالعاستىرۋعا، ايىبىن ادال قىزمەتپەن وتەۋگە مۇمكىندىك بەرۋدى سۇرادى.
ونىڭ اڭگىمەلەۋىنشە، بالاسى قارۋلاسىن ادەيى اتپاعان.
"سول كۇنى بالام كەزەكشىلىكتى قابىلداپ جاتقان كەزىندە قارۋى بايقاۋسىزدا اتىلىپ كەتىپتى. وق كونتراكتىمەن اسكەري قىزمەتتە جۇرگەن ادامعا تيگەن. قۇدايعا شۇكىر، ول ادام ءتىرى قالدى، قازىر جاعدايى جامان ەمەس، ەم الىپ ءجۇر. كەشىرىم بەرۋىنە بايلانىستى قىلمىستىق ءىس توقتاتىلدى. مەنىڭ بالام اسكەري قىزمەتتى 14 جىل اتقاردى. وسىعان دەيىن ەشقانداي سوگىس، ەسكەرتۋ العان ەمەس. بيىلعى قاڭتار وقيعالارى كەزىندە 12 كۇن بويى ءۇي كورمەي، قاراعاندى بلوكپوستىندا كومانديرلىك قىزمەتىن كىرشىكسىز اتقاردى، ەلوردانى قورعاۋعا قول استىنداعى ادامداردى جۇمىلدىرا ءبىلدى", – دەيدى اناسى.
سونداي-اق ول ۇلىنىڭ جەتىستىگى رەتىندە بىلتىرعى جىلى قاراعاندى، وتار، اقتاۋ قالالارىندا جارتى جىل بويى اسكەري تەحنيكالاردى سىناقتان وتكىزۋگە قاتىسقانىن العا تارتادى.
"ول ءوز قىزمەتىن تەك جاقسى مەڭگەرىپ قانا قويماي، ونى جاقسى كورەدى. قازىرگى كۇردەلى كەزەڭدە ەلىمىزگە دايىن وفيتسەرلەر اۋاداي قاجەت ەمەس پە؟ مەنىڭ بالام ءالى دە ءوز تاجىريبەسىمەن، ەڭبەگىمەن ەلىنە ادال قىزمەت ەتە الادى. وتاندى قورعاۋعا، قورعانىستى ارتتىرۋعا ۇلەس قوسا الادى", – دەيدى گۇلايىم.
كاپيتاننىڭ وتباسىندا كامىلەتكە تولماعان 3 بالاسى بار كورىنەدى. گۇلايىم ەكى نەمەرەسىنىڭ بالا كۇنىنەن مۇگەدەك ەكەنىن جەتكىزدى.
ال اسكەري قىزمەت قارجىلىق قولداۋ سىرتىندا، الەۋمەتتىك جەڭىلدىكتەر بەرەتىنى بەلگىلى. ەندى ونىڭ بارىنەن ايىرىلىپ قالماق.
ونىڭ ۇستىنە ارمان 2018 جىلى قورعانىس مينيسترلىگىنىڭ باعدارلاماسى اياسىندا "وتباسى بانكىنەن" يپوتەكاعا پاتەر الىپتى.
اناسى "سول باسپانانىڭ اي سايىنعى نەسيەسىن تولەۋدىڭ ءوزى ۇلكەن پروبلەما بولايىن دەپ تۇر" دەيدى.
"نەمەرەلەرىمنىڭ مۇگەدەكتىگى ءۇشىن الاتىن جاردەماقىلارى نەسيەنى وتەۋگە كەتىپ قالا ما دەپ قورقامىن. وندا نەمەرەلەرىم ەم-دومسىز قالماي ما؟ ءسويتىپ، ونىڭ وتباسى كۇيزەلىسكە ءتۇسىپ كەتۋى مۇمكىن. سوندا نە بولادى، بىلمەيمىن. بالام تەك وسى قىزمەتىن بىلەدى. سوندىقتان قورعانىس مينيسترلىگىنەن بالامدى اسكەري قىزمەتتەن بوساتپاۋدى سۇرايمىن. ەگەر ەلورداداعى اسكەري قىزمەتتە قالدىرا المايمىز دەپ قازاقستاننىڭ باسقا تۇكپىرىنە جەر اۋدارىپ جىبەرسە دە، شىداۋعا دايىن. تەك قىزمەتىنەن بوساتپاسا بولدى", – دەپ جالىنادى ءوز حاتىندا گۇلايىم اپاي.
قورعانىس مينيسترلىگى ازىرگە بۇل ءوتىنىشتى قاراستىرۋدا.
"قازىرگى ۋاقىتتا ول كىسىنىڭ ماسەلەسى قارالىپ جاتىر. قورىتىندىسى بويىنشا قازاقستان زاڭناماسىمەن بەكىتىلگەن تارتىپپەن ناقتى جاۋاپ بەرىلەتىن بولادى", – دەپ قىسقا قايىردى ۆەدومستۆو.
جالپى، قازاقستان قارۋلى كۇشتەرىندە توتەنشە وقيعالار جيىلەپ كەتكەنى جاسىرىن ەمەس. سوندىقتان كەشە پرەزيدەنت قاسىم-جومارت توقاەۆ قازاقستان ارمياسىنداعى اسكەري قىزمەتشىلەر اراسىندا ءولىم-ءجىتىمنىڭ جيىلەۋىنە ەرەكشە نازار اۋدارعانى ءمالىم بولدى. اقوردا وسىعان بايلانىستى كوميسسيا قۇرىلاتىنىن جاريا ەتتى.
اسكەري شەندىلەر وقيعالاردى قوعامنان جاسىرۋعا تىرىسادى، ەندەشە تەكسەرۋدى سولاردىڭ ەنشىسىندە قالدىرسا، ادىلدىك بولماۋى مۇمكىن. سول سەبەپتى مەملەكەت باسشىسى الگى كوميسسيانىڭ باسشىلىق تىزگىنىن قورعانىس مينيسترىنە نە اسكەري پوليتسياعا ەمەس، ءوزىنىڭ كومەكشىسى – قاۋىپسىزدىك كەڭەسىنىڭ حاتشىسى عيزات نۇرداۋلەتوۆكە سەنىپ تاپسىردى.
الدا ارنايى كوميسسيا سونىڭ جەتەكشىلىگىمەن ارميامىزداعى كەلەڭسىزدىكتەردىڭ سەبەبىن تەرگەپ-تەكسەرۋگە، اسكەري قىزمەتشىلەر اراسىنداعى زاڭسىزدىقتاردى جويۋ جانە كەلەشەكتە اسكەردەگى مۇنداي تەرىس ءىس-ارەكەتتەردىڭ قايتالانباۋى ءۇشىن وعان توسقاۋىل قويۋ شارالارىن ازىرلەۋگە جاۋاپتى بولادى.
”ادىرنا” ۇلتتىق پورتالى
