وزبەكستان پرەزيدەنتى شاۆكات ميرزيوەۆ مەملەكەتتىك ءتىلدى دامىتۋعا ارنالعان جاڭا قاۋلىعا قول قويدى، دەپ حابارلايدى "ادىرنا" ۇلتتىق پورتالى فەرعاناعا سىلتەپ.
پرەزيدەنت وزبەكستاندا 20 قازان، مەملەكەتتىك ءتىل كۇنى قارساڭىندا وزبەك ءتىلىن دامىتۋ مەن ىلگەرىلەتۋگە باعىتتالعان قاۋلىعا قول قويدى. قۇجات مەملەكەتتىك ءتىلدى قوعامدىق-ساياسي ءومىردىڭ بارلىق سالاسىندا كەڭىنەن قولدانۋ، ونىڭ وقىتىلۋىن جەتىلدىرۋ جانە زاماناۋي اقپاراتتىق تەحنولوگيالارمەن ىقپالداستىرۋ شارالارىن قامتيدى.
قاۋلىعا سايكەس، 2025–2026 جىلدارى وزبەك ءتىلىن دامىتۋ جانە ءتىل ساياساتىن جەتىلدىرۋ تۇجىرىمداماسىن ىسكە اسىرۋ باعدارلاماسى بەكىتىلدى. 2026 جىلدىڭ 1 قاڭتارىنان باستاپ مەملەكەتتىك ورگاندار مەن ايماقتىق اكىمدىكتەردە رۋحانيات جانە مەملەكەتتىك ءتىل ماسەلەلەرى جونىندەگى كەڭەسشى لاۋازىمى ەنگىزىلەدى.
سونداي-اق مەكتەپكە دەيىنگى جانە جالپى ءبىلىم بەرۋ مەكەمەلەرىندە وزبەك ءتىلىن وقىتۋعا ارنالعان جاڭا بۋىن وقۋلىقتارى دايىندالادى. بالاباقشا تاربيەشىلەرىنە ارنالعان ادىستەمەلىك قۇرالدار مەن بالالارعا ارنالعان «مەنينگ يلك يزوҳلي لۋعاتچام» («مەنىڭ العاشقى تۇسىندىرمە سوزدىگىم») اتتى يلليۋستراتسيالىق سوزدىك جارىق كورەدى. بالالارعا ارنالعان زاماناۋي انيماتسيالىق بەينە جانە اۋديوماتەريالدار دا شىعارىلادى.
وزبەكستان عىلىم اكادەمياسىنا 2026 جىلدىڭ 1 ماۋسىمىنا دەيىن كوپتومدىق «وزبەكستان ۇلتتىق ەنتسيكلوپەدياسىنىڭ» ەلەكتروندى نۇسقاسىن دايىنداۋ، ال 1 جەلتوقسانعا دەيىن «ونا تيلي. قومۋس» («انا ءتىلى. ەنتسيكلوپەديا») كىتابىن باسپاعا ازىرلەۋ تاپسىرىلدى.
قۇجاتتا جاساندى ينتەللەكت نەگىزىندە وزبەك ءتىلىن قولدايتىن ەلەكتروندى پلاتفورما ازىرلەۋ دە قاراستىرىلعان. بۇل جوبا جاڭا تەرميندەردى تىركەۋ مەن تالقىلاۋعا، قولدانىستاعى سوزدىكتەرگە اشىق قول جەتكىزۋگە مۇمكىندىك بەرەدى.
وزبەك ءتىلىنىڭ حالىقارالىق بەدەلىن ارتتىرۋ ماقساتىندا جىل سايىن قازاندا حالىقارالىق عىلىمي-پراكتيكالىق كونفەرەنتسيا، شەتەلدىك ستۋدەنتتەر اراسىندا رەسپۋبليكالىق وليمپيادا جانە «Ўزبەك تيلي – قالبيم تارجيموني» («وزبەك ءتىلى – جانىمنىڭ ايناسى») بايقاۋى وتەدى. سونداي-اق «جوناجون ўزبەك تيليم» («مەنىڭ سۇيىكتى وزبەك ءتىلىم») اتتى شىعارماشىلىق كونكۋرس پەن جالپىۇلتتىق ديكتانت ۇيىمداستىرىلماق.
اليشەر ناۋاي اتىنداعى حالىقارالىق وزبەك ءتىلى وليمپياداسىنىڭ جەڭىمپازدارىنا «وزبەك ءتىلى مەن ادەبيەتى» ماماندىعى بويىنشا مەملەكەتتىك گرانتپەن جوعارى وقۋ ورىندارىنا ءتۇسۋ مۇمكىندىگى بەرىلەدى. شەتەلدىك ستۋدەنتتەر تاشكەنت مەملەكەتتىك وزبەك ءتىلى جانە ادەبيەتى ۋنيۆەرسيتەتى جانىنداعى تەگىن كۋرستارعا قاتىسا الادى.
2026 جىلى ۇلتتىق مادەني ورتالىقتار وكىلدەرىنە ارنالعان وزبەك ءتىلى كۋرستارى كەڭەيتىلەدى.
