17 ماۋسىمدا وزبەكستان پرەزيدەنتى شاۆكات ميرزيوەۆ جاڭا انديجان قالاسىنىڭ قۇرىلىس الاڭىندا ىرگەتاس قالاۋ راسىمىنە قاتىستى. بۇل تۋرالى مەملەكەت باسشىسىنىڭ ءباسپاسوز قىزمەتى حابارلادى، دەپ مالىمدەيدى “ادىرنا” ۇلتتىق پورتالى.
شاۆكات ميرزيوەۆ قۇرىلىستى تاريحي وقيعا دەپ اتادى.
«ەكى-ءۇش جىلدان بەرى مەنى انديجانداعى باسپانا ماسەلەسىنىڭ شەشىمى مازالايدى. مۇندا جەر از، باسپاناعا دەگەن قاجەتتىلىك جىلدار وتە كەلە ءوستى. ءبىر ۇيدە بىرنەشە كەلىنىمەن بىرگە ەنە تۇراتىن وتباسىلار كوپ. سوندىقتان ءبىز ارەكەت ەتۋگە بەل بۋدىق، جاڭا قالا سالۋعا كىرىستىك. مۇندا 130 مىڭنان استام پاتەرلى كوپقاباتتى ۇيلەر سالىنادى، 450 مىڭنان استام ادام تۇرادى »، - دەدى مەملەكەت باسشىسى.
قالانىڭ جالپى اۋماعى 4000 گەكتاردى قۇرايدى، ونىڭ 2000-ىندا تۇرعىن ءۇي، الەۋمەتتىك نىساندار، وندىرىستىك ايماقتار جانە قىزمەت كورسەتۋ نىساندارى ورنالاسادى. پرەزيدەنتتىڭ تاپسىرماسىمەن تاعى 2000 گەكتارعا جاسىل ايماقتار قۇرىلادى.
جاڭا قالا جوباسى 8 كەزەڭدە جۇزەگە اسىرىلادى. 2021-2041 جىلدار ارالىعىن قامتيدى. بيىلعى جىلى ينفراقۇرىلىمدى قالىپتاستىرۋ بويىنشا جۇمىستاردىڭ باستاپقى كەزەڭىنە قايتا قۇرۋ جانە دامۋ قورىنان 100 ميلليون دوللار بولىنەدى. 33 كم اۋىز سۋمەن جابدىقتاۋ جەلىلەرى، 52 كم اۆتوموبيل جولدارى، 18 كم ەلەكتر جەلىلەرى جانە 27 كم گاز قۇبىرى سالىنادى.
ءبىرىنشى كەزەڭدە 3310 پاتەرلى 170 كوپقاباتتى ءۇي، 1680 ورىندىق مەكتەپ، 385 ورىندىق بالاباقشا جانە كۇنىنە 200 كەلۋشىگە ارنالعان ەمحانا بوي كوتەرەدى. قۇرىلىس جۇمىستارى كەزەڭىندە 10 مىڭنان استام تۇراقتى جۇمىس ورنى، قۇرىلىس اياقتالعاننان كەيىن - وندىرىستىك، ساۋدا، الەۋمەتتىك جانە قىزمەت كورسەتۋ سالالارىندا 100 مىڭعا جۋىق تۇراقتى جۇمىس ورنى قۇرىلادى.
”ادىرنا” ۇلتتىق پورتالى
