وزبەكستان بيلىگى قوعامدىق ورىنداردا بەتىن بۇركەمەلەپ جۇرۋگە تىيىم سالدى. سونىمەن بىرگە كوپايەلدىلىك ماسەلەسىن ناسيحاتتاۋعا دا زاڭمەن تىيىم قويىلدى. زاڭدى بۇزۋشىلار اكىمشىلىك جازاعا تارتىلىپ، ايىپپۇل ارقالايدى.
ءبىزدىڭ ەلدە دە سولاي كيىنەتىن جاندار كەزدەسىپ جاتادى. ورامال تاققان ەمەس، شاشىن جاۋىپ قويعان ەمەس، تۇتاس بەتىن جاۋىپ العاندار بار. تەك كوزدەرى عانا جىلتىراپ تۇرادى، كەيدە ءتىپتى كوزىن دە بۇركەمەلەپ تۇراتىن تورمەن جاۋىپ قويادى.
جالپى بەتتى تۇتاس جاۋىپ ءجۇرۋ دىننەن بولەك، قاۋىپسىزدىك شاراسىنا دا قاتىستى دەپ ويلايمىن. 2017 جىلى يراكتاعى ەڭ ءىرى قالانىڭ ءبىرى موسۋلدى دايش سودىرلارىنان ازات ەتۋ وپەراتسياسى باستالدى. قالانى سودىرلار باسىپ العانعا دەيىن شاھاردا 2 ملن حالىق تۇرعان، كەيىن ونى لاڭكەستەردەن ازات ەتۋ باستالعاندا قيان-كەسكى شايقاس بولدى. سول ساتتە قالادان حالىق بوسىپ، قاشىپ جاتتى. يراك بيلىگى ءدىني تىيىمداردى ۋاقىتشا ىسىرىپ قويىپ، قالاداعى بارلىق ايەل بەتىن اشىپ شىعۋدى تالاپ ەتتى، سەبەبى كوپتەگەن لاڭكەستەر ايەل كيىمىن كيىپ، بەتىن بۇركەمەلەپ شىعۋعا تىرىستى.
قاراپ تۇرساق بۇل قاۋىپسىزدىك ماسەلەسىنە دە كەلەدى. بەتىن تۇتاس جاۋىپ العان ادامنىڭ كىم ەكەنىن قايدان بىلەمىز. ول ايەل مە، ەركەك پە، ول مۇمكىن قاشقىن شىعار، مۇمكىن قىلمىسكەر بولار، مۇمكىن ىزدەۋدە جۇرگەن بىرەۋ شىعار. بەتى اشىق بولماسا، ونى قالاي تانيسىڭ؟ سوندىقتان قاۋىپسىزدىك ماسەلەسى تۇرعىسىنان بۇل دۇرىس شارا. وزبەك بيلىگى ءوز شەشىمىن وسىلاي ءتۇسىندىرىپ جاتىر.
ءار ازامات باعىنۋعا ءتيىس مەملەكەتتىڭ زاڭدارى بولادى. قوعامدىق ورتادا ءجۇرۋدىڭ ءوز شارتتارى بار. ۇيىڭدە نە ىستەسەڭ، ونى ىستە، بىراق قوعامعا شىققاندا اتەيست بولسىن، اگنوستيك بولسىن، مۇسىلمان ياكي حريستيان بولسىن، بۋدديست نەمەسە باسقاسى بولسىن باعىنۋعا ءتيىس ەرەجەلەر بار. ول ەرەجەلەر قاۋىپسىزدىك شارالارىنا ءمان بەرىلە وتىرىپ جاسالادى، سول جاعىن ەسكەرگەن دۇرىس.
ۇقساس جاڭالىقتار
