وزبەكستاندا تۇماۋعا قارسى ءۇندى دارمەگىنە جۇگىنىپ، دوك-1 Maكس پرەپاراتىن قولدانعان 19 بالا قايتىس بولدى. تاعى ءبىر بالا جرۆي-عا قارسى ۇندىلىك دارىدەن ۋلانىپ، ەمحاناعا جەتكىزىلدى، دەپ حابارلايدى "ادىرنا" ۇلتتىق پورتالى.
- جوتەلگە قارسى سيروپ ىشكەن بالا جانساقتاۋ بولىمىنە جەتكىزىلدى، - دەپ حابارلايدى وزبەكستان ۇلتتىق اقپارات اگەنتتىگى فەرعانا قالاسىنىڭ دەنساۋلىق ساقتاۋ باسقارماسىنا سىلتەمە جاساپ.
ۋلانعان بالا كۋۆاساي قالاسىنىڭ تۇرعىنى، 2019 جىلى تۋعان. قازىر وعان قابىلداۋ-دياگنوستيكا بولىمىندە انامنەز جازىلدى، بالا جانساقتاۋ بولىمىنە جاتقىزىلدى. ونىڭ اعزاسىنا ۋلى سۇيىقتىق 2022 جىلدىڭ 28 جەلتوقساندا تۇسكەن، بىراق ەگجەي-تەگجەيى قازىر عانا بەلگىلى بولدى.
ناقتىلاي كەتەيىك، 2022 جىلدىڭ 27 جەلتوقسانىندا سامارقاندتا 19 بالانىڭ ءولىمى راستالدى. ولاردىڭ بارلىعى اتالعان پرەپاراتتى قابىلداعاننان كەيىن قايتىس بولدى. ودان كەيىن 31 جەلتوقساندا تاعى 10 بالا ۇندىلىك پرەپاراتتاردى قابىلداپ، اۋرۋحاناعا تۇسكەن.
وقيعادان كەيىن ەلدىڭ دەنساۋلىق ساقتاۋ مينيسترلىگى ۋىتتىلىققا قاتىستى تەكسەرۋلەر مەن زەرتتەۋلەردى باستادى. دوك-1 Maكس پارتياسىندا ەتيلەنگليكول تابىلدى، ول دۇرىس قابىلدانباعان جاعدايدا دەنساۋلىققا ەلەۋلى پروبلەمالار تۋعىزۋى مۇمكىن. انىقتالعانداي، اتا-انالار سۋىق تيۋگە قارسى ءدارى-دارمەكتى ءوز بەتىنشە نەمەسە فارماتسەۆتتەردىڭ ۇسىنىسى بويىنشا ساتىپ الىپ، بالالارعا نورمادان ايتارلىقتاي اسىپ تۇسەتىن مولشەردە بەرگەن.
"ادىرنا" ۇلتتىق پورتالى
