شايحانانى جىرلاۋشى فاررۋح سەكسەننىڭ سەڭگىرىنە شىقتى

تاشكەنتتە فاررۋح زاكيروۆتىڭ 80 جىلدىق مەرەيتويى اتالىپ ءوتتى، دەپ حابارلايدى "ادىرنا" ۇلتتىق پورتالى.

16 ءساۋىر كۇنى وزبەكستاننىڭ حالىق ءارتىسى، ايگىلى «ياللا» ءانسامبلىنىڭ جەتەكشىسى فاررۋح زاكيروۆ 80 جاسقا تولدى. مەرەيتوي قارساڭىندا ونەر يەسىنىڭ ەڭبەگى جوعارى باعالانىپ، ونى شاۆكات ميرزيوەۆ ارنايى قۇتتىقتادى.

مەملەكەت باسشىسىنىڭ جارلىعىمەن ءانشى ءارى كومپوزيتور «بۋيۋك حيزماتلاري ۋچۋن» («ۇلى ەڭبەگى ءۇشىن») وردەنىمەن ماراپاتتالدى. سونىمەن قاتار، تاشكەنت قالاسىنىڭ ياشناباد اۋدانىنداعى №7 بالالار مۋزىكا جانە ونەر مەكتەبىنە فاررۋح زاكيروۆتىڭ ەسىمى بەرىلدى.

1970 جىلدارى قۇرىلعان ياللا ءانسامبلى جارتى عاسىردان استام ۋاقىت بويى تىڭدارمانىن اسەم اندەرىمەن قۋانتتى. ۇجىم رەپەرتۋارىنداعى «شايحانا»، «ۋچكۋدۋك»، «تاشكەنت»، «موي ۋزبەكيستان» سەكىلدى اندەر تەك وزبەكستاندا عانا ەمەس، بۇكىل پوستكەڭەستىك كەڭىستىكتە كەڭىنەن تانىمال بولدى.