بۇگىن، 2 قازاندا استانادا Digital Bridge 2025 حالىقارالىق تەحنولوگيالىق فورۋمى باستالدى، دەپ حابارلايدى «ادىرنا» ءتىلشىسى.
فورۋمنىڭ پلەنارلىق وتىرىسىندا ءcوز سويلەگەن پرەزيدەنت قاسىم-جومارت توقاەۆ جاڭا تەحنولوگيانى ادامزات يگىلىگىنە پايدالانۋدى، ونى پروگرەسس پەن ىنتىماقتاستىقتىڭ قوزعاۋشى كۇشىنە اينالدىرۋدى باستى مىندەت رەتىندە اتادى.
«قازىر جاھان جۇرتشىلىعى جاساندى ينتەللەكت داۋىرىنە قادام باستى. وزىق تەحنولوگيانىڭ جوعارى قارقىنمەن دامۋى ساياساتقا، ەكونوميكاعا جانە ميللياردتاعان ادامنىڭ ومىرىنە تىكەلەي اسەر ەتىپ جاتىر. بۇعان ءبارىمىز كۋا بولىپ وتىرمىز. قازىرگى تاڭدا جاساندى ينتەللەكت سالاسىنداعى جاۋاپكەرشىلىك تۋرالى قىزۋ پىكىرتالاس ءجۇرىپ جاتىر. اسىرەسە، ورتاق رەتتەۋ ەرەجەلەرىن ءتۇزۋ جانە بارلىق ەلدىڭ وزىق تەحنولوگيا مەن رەسۋرستارعا تەڭ قولجەتىمدىلىگىن قامتاماسىز ەتۋ ماسەلەلەرىنە ايرىقشا نازار اۋدارىلىپ وتىر. ءبىزدىڭ مىندەتىمىز – جاڭا تەحنولوگيانى ادامزات يگىلىگىنە پايدالانۋ، ونى پروگرەسس پەن ىنتىماقتاستىقتىڭ قوزعاۋشى كۇشىنە اينالدىرۋ»،—دەدى ول.
مەملەكەت باسشىسى جاساندى ينتەللەكتىنى اسكەري سالادا قولدانۋعا بولمايتىنىن باسا ايتتى.
«وتىز جىلدان استام ۋاقىت بۇرىن قازاقستان بەيبىتشىلىك پەن قاۋىپسىزدىك جولىن تاڭداپ، يادرولىق قارۋدان ءوز ەركىمەن باس تارتتى. بۇگىندە ەلىمىز جاساندى ينتەللەكت بەيبىت ماقساتتا عانا قولدانىلۋعا ءتيىس دەپ باتىل تۇردە مالىمدەيدى. ونىڭ اسكەري سالادا، كيبەرشابۋىلدارعا جانە حالىقارالىق تۇراقتىلىققا قاتەر توندىرەتىن جوبالاردا پايدالانىلۋىنا جول بەرۋگە بولمايدى.
بۇۇ باس اسسامبلەياسىنىڭ تاياۋدا وتكەن سەسسياسىندا مەن قازاقستاننىڭ ۇيىم اياسىندا جاساندى ينتەللەكتىنى باسقارۋ جونىندەگى جاھاندىق ديالوگ جۇمىسىنا اتسالىسۋعا دايىن ەكەنىن راستادىم. ءبىز سەرىكتەستەرىمىزدىڭ باستامالارىن، سونىڭ ىشىندە قىتايدىڭ جي سالاسىنداعى جاھاندىق ىنتىماقتاستىق ۇيىمىن قۇرۋ تۋرالى ۇسىنىسىن قولدايمىز»،—دەە تولىقتىردى توقاەۆ.
ايتا كەتەيىك، جيىنعا قازاقستانعا رەسمي ساپارمەن كەلگەن ماجارستان پرەزيدەنتى تاماش شۋيوك قاتىسىپ وتىر. سپيكەرلەردىڭ قاتارىندا Telegram نەگىزىن قالاۋشى جانە باس اتقارۋشى ديرەكتورى پاۆەل دۋروۆ, Sinovation Ventures جانە 01ai باس ديرەكتورى لي كاي فۋ, ستەنفورد ۋنيۆەرسيتەتىنىڭ عىلىمي قىزمەتكەرى، Google ساراپشىسى پيتەر نورۆيگ, G42 International كومپانياسىنىڭ باس ديرەكتورى مانسۋر يبراگيم ءال مانسۋري, ستەنفورد ۋنيۆەرسيتەتىنىڭ پروفەسسورى يليا سترەبۋلاەۆ جانە high-tech يندۋسترياسىنىڭ باسقا دا وكىلدەرى بار.
