قازاق دەتەكتيۆىنىڭ اتاسى

بۇگىن ۇلى وتان سوعىسىنىڭ ارداگەرى، بەلگىلى جازۋشى كەمەل توقاەۆتىڭ تۋعانىنا 102 جىل تولىپ وتىر، دەپ حابارلايدى «ادىرنا» ءتىلشىسى.

قالامگەر 1923 جىلى 2 قازاندا الماتى وبلىسىنىڭ قاراتال اۋدانىندا دۇنيەگە كەلگەن. 1948 جىلى قازاق مەملەكەتتىك ۋنيۆەرسيتەتىن بىتىرگەن. كەيىن «لەنينشىل جاس» (قازىرگى «جاس الاش»), «قازاقستان پيونەرى» (قازىرگى «ۇلان»), «سوتسياليستىك قازاقستان» (قازىرگى «ەگەمەن قازاقستان») گازەتتەرىنىڭ رەداكتسيالارىندا جاۋاپتى قىزمەتتەر اتقارعان. 1960-1977 جىلدارى قازاق كسر جوعارعى كەڭەسى «ۆەدوموستارىنىڭ» باس رەداكتورى، 1980-1984 جىلدارى قازاقستان جازۋشىلار وداعىندا ادەبي كەڭەسشى بولىپ جۇمىس ىستەگەن. كەڭەس چەكيستەرى تاقىرىبىنا ارنالعان 10-نان استام كىتابى قازاق جانە ورىس تىلدەرىندە باسىلىپ شىققان.

ول – سوعىس تاقىرىبىنا ارنالعان سۇبەلى شىعارمالارىمەن قاتار، قازاق ادەبيەتىندەگى دەتەكتيۆ جانرىنىڭ نەگىزىن قالاعان كورنەكتى جازۋشى. «جۇلدىزدى جورىق»، «قىس قارلىعاشى»، «تۇندە اتىلعان وق»، «قاستاندىق»، «ارناۋلى تاپسىرما»، «سارعاباندا بولعان وقيعا»، «تاڭبالى التىن»، «سوڭعى سوققى»، «زامانداستار سىرى»، «سولدات سوعىسقا كەتتى»، «ۇياسىنان بەزگەن قۇس» اتتى تۋىندىلاردىڭ اۆتورى.

ايتا كەتەيىك، كەمەل توقاەۆ – پرەزيدەنت قاسىم-جومارت توقاەۆتىڭ اكەسى.