3 مامىر كۇنى ۆاشينگتوندا جازۋشى، زەرتتەۋشى، تاريحشى مۇحتار ماعاۋين بەيىتىنىڭ باسىنا قۇلپىتاس ورناتىلىپ، امەريكاداعى “مۇحتار ماعاۋين قازاق ۇلتتىق مادەني-اعارتۋ ورتالىعىن” رەسمي تانىستىرۋ شاراسى ءوتتى، دەپ حابارلايدى «ادىرنا» ءتىلشىسى.
قۇلپىتاس ورناتۋ ءراسىمى ۆاشينگتون تۇبىندەگى پاركلون مەموريال (Parklawn Memorial) زيراتىندا اتقارىلدى. ال “ماعاۋين ورتالىعىنىڭ” تانىستىرىلىمى جازۋشىنىڭ كۇمىس بۇلاق (Silver Spring) كەنتىندەگى مۇراجاي-ۇيىندە ءوتتى.
جازۋشىنىڭ ۇلى ەدىگە ماعاۋين قۇلپىتاستىڭ نە سەبەپتى قويىلعانىن ايتتى.
«اكەمىزدىڭ باسىنا تاس قويعان كەزدە كەلگەن ادامدارعا اسەر بەرەتىندەي، اكەمىزبەن سىرلاسقانداي سەزىمدە قالسىن دەگەن ويمەن وسى قۇلپىتاس ورناتىلدى. نەگە تاۋ بەينەسى تاڭدالدى دەسەڭىز، تاۋ – قازاقتىڭ وتكەن تاريحى، اتا-بابالارىمىزدىڭ ءجۇرىپ وتكەن جولى. قۇلپىتاستىڭ ارعى بەتىندە كونە تۇركى تاريحى بار. تاۋدىڭ بەرگى جاعىندا ءبىزدىڭ بەرگى تاريحىمىز بەينەلەنگەن، شىڭعىس حان داۋىرىنەن باستاپ قازاق ورداسىنا دەيىنگى كەزەڭ بەينەلەنگەن. بۇل – اكەم تەرەڭ زەرتتەپ، شىعارمالارىنا ارقاۋ ەتكەن تاقىرىپتار. قۇلپىتاستىڭ استىنا قاراساڭىزدار، «الاساپىرانداعى» كۇيمەلەردىڭ كوشىن كورەسىزدەر. ۇستىندە جىراۋلار مۇراسى كورىنىس تاپقان: ارحيۆتەردەن تابىلعان، ارىستان ۇستىندە وتىرعان جىراۋ بەينەسى – ءارى باتىر، ءارى ءسوز ۇستاعان تۇلعانىڭ سيمۆولى. ونىڭ قولىنداعى قىلىش – الداسپان. بۇل ءسوز اكەم جىراۋلار مۇراسىن زەرتتەگەنگە دەيىن ۇمىت قالعان ەدى، كەيىن قايتا اينالىمعا ەندى. قۇلپىتاستا ءبىر جاعىندا قالام، ءبىر جاعىندا الداسپان بەينەلەنگەن. بۇل – كوركەم ادەبيەت پەن عىلىمي ىزدەنىس ارقىلى وتكەندى بۇگىنگە، بۇگىندى بولاشاققا جالعاۋ يدەياسىن بىلدىرەدى. جوعارعى بولىگى كۇلتەگىن ەسكەرتكىشى ۇلگىسىندە جاسالىپ، شاڭىراق ورناتىلدى. اكەم قۇراننىڭ بىرنەشە اياتىن قازاقشا اۋدارعان. سونىڭ ىشىندە قۇراننىڭ 62-سۇرەسىنەن الىنعان اياتتى «مەن» اتتى عۇمىرباياندىق رومانىنىڭ كىرىسپەسىنە پايدالانعان. بۇل – قازاق حالقىنىڭ مۇددەسى مەن كەلەر ۇرپاق الدىنداعى جاۋاپكەرشىلىك تۇرعىسىنان الىنعان شەشىم»،-دەپ ءتۇسىندىردى ول.
ەسكە سالايىق، قازاقستاننىڭ حالىق جازۋشىسى مۇحتار ماعاۋين اقش-تا 2025 جىلدىڭ 10 قاڭتارىندا 85 جاسقا قاراعان شاعىندا قايتىس بولعان ەدى.
