ءوزىن دە، وزگەنى دە ىزدەگەن. روللان سەيسەنباەۆتىڭ سەڭگىرى

بۇگىن جازۋشى روللان سەيسەنباەۆ 80 جاسقا تولدى. قالامگەردىڭ وزىندىك كوزقاراسى، ءوز پايىمى ەرەكشە. شىعارمالارى كەڭ، اۋقىمدى، سان-سالالى.

روللان سەيسەنباەۆ 1946 جىلى 11 قازاندا سەمەي قالاسىندا دۇنيەگە كەلگەن. سەمەي تەحنولوگيالىق ينستيتۋتىنىڭ تۇلەگى كەيىن ماسكەۋدەگى گوركي اتىنداعى ادەبيەت ينستيتۋتى جانىنداعى جوعارى ادەبي كۋرستارىن وتكەردى.

وبلىستىق گازەتتە، تەلەديداردا جانە وبلىستىق كومسومول كوميتەتىندە قىزمەت اتقارعان، قالالىق اتقارۋ كوميتەتى توراعاسىنىڭ ورىنباسارى بولعان. 

ادەبيەتتە ءوز جولىن ەرتە ايقىنداعان قالامگەردىڭ العاشقى حيكاياتى 1975 جىلى جارىق كوردى. سودان بەرى «اڭساۋ»، ء«وزىمدى ىزدەپ ءجۇرمىن»، «ساعىنىپ جەتكەن جاز ەدى» پوۆەستەرى، ء«ومىر سۇرگىڭ كەلسە ەگەر...»، «تاۋ باسىندا تۇيىسكەن جول»، «بەگستۆو»، «ەشقايدا باستامايتىن باسپالداق»، «مەرتۆىە بروديات ۆ پەسكاح» جانە باسقا دا رومانداردىڭ اۆتورى. ونىڭ كەيبىر شىعارمالارىندا سەمەي پوليگونى مەن ارال تەڭىزىنىڭ زاردابى ارقاۋ بولعان. جازۋشىنىڭ پەسالارى دا ساحنالاردا قويىلىپ كەلەدى.

جازۋشىنىڭ ارنارسەگە ءوز كوزقاراسى، ءوز پايىمى بار. بولىپ جاتقان وقيعالاردى وزىنشە قابىلداپ، وزىنشە وي قورىتادى. شىعارمالارى كەڭ، اۋقىمدى، نە جازسا دا جاھاندى تەبىرەنتكەن ساۋالدارعا جاۋاپ ىزدەيدى.

روللان سەيسەنباەۆ 1975-1991 جىلدارى ماسكەۋدە كسرو جازۋشىلار وداعىندا قازاق ادەبيەتى بويىنشا جاۋاپتى حاتشى قىزمەتىن اتقاردى. وسى جىلدارى ول قازاق جازۋشىلارى شىعارمالارىنىڭ وزگە تىلگە كوپتەپ اۋدارىلۋىنا ۇيىتقى بولدى. 

1992 جىلى «يادرولىق سىناقتاردىڭ قۇربانى — بالالار» قورىن قۇردى. سەمەي پوليگونى زاردابىن ءوز باسىنان وتكەرگەن جازۋشى سەكسەنىنشى جىلداردىڭ سوڭىندا "دۇنيە تاستالقان بولعان كۇن" رومانىن جازدى. 

1993 جىلى «قازاقستان» تەلەراديوكورپوراتسياسىندا «اباي الەمى» باعدارلاماسىن اشتى. 1994-1996 جىلدارى قازاقستاننىڭ سول كەزدەگى پرەزيدەنتىنىڭ كەڭەسشىسى بولدى. 1995 جىلى لوندوندا تاۋەلسىز «اباي ءۇيى» مادەني ورتالىعىن اشتى. 2000 جىلى سەمەيدە «حالىقارالىق اباي كلۋبىن» جانە «امانات» جۋرنالىن قۇردى. 2012 جىلى ءال-فارابي اتىنداعى قازاق ۇلتتىق ۋنيۆەرسيتەتى جانىنداعى الەم حالىقتارى ادەبيەتى ينستيتۋتىن جانە «حالىقارالىق اباي كلۋبىن» باسقاردى.

2022 جىلى Radius جانە Pegasus Brucke ونەر ورتالىقتارى تاعايىنداعان «الەمنىڭ التىن جازۋشىسى» سىيلىعىنا، 2023 جىلى تاراس شەۆچەنكو اتىنداعى حالىقارالىق سىيلىققا يە بولدى.