شوڭ شىڭعىس شىعارمالارىنىڭ قالىڭ تۇركىمەن بايلانىسى تالقىلاندى

220
Adyrna.kz Telegram
https://adyrna.kz/storage/uploads/uBLRZQQfbeVMNdlejRc598Gtlflor2bBy1FwEyPp.jpg

16 قاراشا كۇنى استانادا «شىڭعىس ايتماتوۆ جانە تۇركى حالىقتارىنىڭ ادەبي بايلانىستارى» اتتى حالىقارالىق كونفەرەنتسيا ءوتتى. ءىس-شارانى تۇركى اكادەمياسى قىرعىز رەسپۋبليكاسى ۇلتتىق عىلىم اكادەمياسىنىڭ شىڭعىس ايتماتوۆ اتىنداعى ادەبيەت ينستيتۋتىمەن بىرلەسىپ ۇيىمداستىردى، دەپ حابارلايدى «ادىرنا» ءتىلشىسى.

كونفەرەنتسيا قىرعىز عالىمى، ادەبيەتتانۋشى، فيلولوگيا عىلىمدارىنىڭ دوكتورى، اكادەميك ابدىلداجان اقماتاليەۆتىڭ 70 جىلدىق مەرەيتويىنا ارنالعان.

جيىنعا قازاقستان مەن قىرعىزستاننىڭ بەلگىلى عالىمدارى، جازۋشىلارى، ادەبيەتتانۋشىلارى، مەملەكەت جانە قوعام قايراتكەرلەرى قاتىسقان. قاتىسۋشىلار تۇركى حالىقتارى اراسىنداعى ادەبي بايلانىستاردى، قازاق-قىرعىز ادەبي ىنتىماقتاستىعىن، شىڭعىس ايتماتوۆ شىعارماشىلىعىنىڭ تۇركى الەمىندەگى ورنىن جانە ادەبيەتتىڭ مادەني ىقپالداستىقتاعى ماڭىزىن تالقىلاعان.

كونفەرەنتسيانى اشقان تۇركى اكادەمياسىنىڭ ۆيتسە-پرەزيدەنتى اسحات كەسىكباەۆ اكادەميا پرەزيدەنتى، اكادەميك شاھين مۇستافاەۆتىڭ قۇتتىقتاۋىن جەتكىزگەن. ول ءوز سوزىندە ورتاق تاريحي جادى، مادەني داستۇرلەر مەن رۋحاني قۇندىلىقتارعا نەگىزدەلگەن قازاق-قىرعىز ادەبي بايلانىستارىن زەرتتەۋ تۇركولوگيا عىلىمىنداعى ماڭىزدى باعىتتاردىڭ ءبىرى ەكەنىن اتاپ وتكەن.

حالىقارالىق كونفەرەنتسياعا قازاقستان پرەزيدەنتىنىڭ كەڭەسشىسى باۋىرجان وماروۆ، پارلامەنت قۇرىلتايىنىڭ دەپۋتاتى جاناربەك ءاشىمجان، قىرعىز رەسپۋبليكاسىنىڭ حالىق جازۋشىسى قايرات يماناليەۆ، شىڭعىس ايتماتوۆ اتىنداعى ادەبيەت ينستيتۋتىنىڭ ديرەكتورى ابدىلداجان اقماتاليەۆ، قىرعىزستاننىڭ قازاقستانداعى ەلشىلىگىنىڭ ديپلوماتتارى، سونداي-اق ەكى ەلدىڭ زەرتتەۋشىلەرى مەن ادەبيەت وكىلدەرى قاتىسقان.

مەرەيتوي يەسىنە قازاقستان باسشىلىعى اتىنان قۇتتىقتاۋلار جولدانعان. باۋىرجان وماروۆ ۆيتسە-پرەزيدەنت ەرلان قاريننىڭ قۇتتىقتاۋ حاتىن وقىپ بەردى. ال ۇلىتاۋ وبلىسىنىڭ اكىمى ەسەت بايكەننىڭ قۇتتىقتاۋىن مەملەكەت جانە قوعام قايراتكەرى مۇحامبەت كوپەەۆ جەتكىزدى.

ءىس-شارا اياسىندا ابدىلداجان اقماتاليەۆتىڭ تۇركى اكادەمياسىنا سىيعا تارتقان كىتاپتارىنىڭ كورمەسى ۇيىمداستىرىلدى. كورمەگە عالىمنىڭ قىرعىز ادەبيەتى، شىڭعىس ايتماتوۆ شىعارماشىلىعى جانە تۇركى حالىقتارىنىڭ ادەبي بايلانىستارى تۋرالى عىلىمي ەڭبەكتەرى قويىلدى.

جيىندا اكادەميكتىڭ تۇركى الەمى ادەبيەتى مەن شىڭعىس ايتماتوۆ مۇراسىن زەرتتەۋگە قوسقان ۇلەسى دە اتاپ ءوتىلدى. عالىمنىڭ ەڭبەگىنە قۇرمەت رەتىندە تۇركى اكادەمياسى اتىنان وعان شاپان جابىلدى.

كونفەرەنتسيانىڭ مادەني باعدارلاماسى اياسىندا ماناسشى ازيز بيمىرزا ۋلۋ قىرعىز حالقىنىڭ «ماناس» ەپوسىنان ءۇزىندى ورىندادى. سونداي-اق توكپە اقىن نۇرسۇلتان مالدىباەۆ ەكى حالىققا ورتاق اۋىزشا پوەزيا ونەرىنىڭ ءداستۇرىن تانىتتى.

ايتا كەتەيىك، تۇركى اكادەمياسى بۇعان دەيىن دە قازاق جانە قىرعىز زيالى قاۋىم وكىلدەرىنىڭ قاتىسۋىمەن ەكى ەل اراسىنداعى ادەبي-مادەني بايلانىستى نىعايتۋعا باعىتتالعان عىلىمي كەزدەسۋلەر مەن فورۋمدار ۇيىمداستىرىپ كەلەدى.

پىكىرلەر