بۇگىن، 10 اقپان اقىن، اۋدارماشى حامزا ءابدۋلليننىڭ تۋعان كۇنى.
حامزا ابدۋللين 1919 جىلى سولتۇستىك قازاقستان وبلىسىنىڭ بۋلاەۆ اۋدانىندا دۇنيەگە كەلگەن.
اۋدارماشى گرۋزين اقىنى شوتا رۋستاۆەليدىڭ «جولبارىس توندى جيھانكەز»اۋدارماسىمەن تانىمال.
اقىننىڭ العاشقى ولەڭدەرى، وچەركتەرى، اڭگىمەلەرى مەن فەلەتوندارى 1936 جىلدان باستاپ ءباسپاسوز بەتىندە جارىق كورە باستاعان. 1940 جىلى بۇكىلقازاقستاندىق ادەبي كونكۋرستا «شويىن جولدا» اتتى داستانى جەڭىسكە جەتكەن.
1937-1940 جىلدارى الماتىداعى كوممۋنيستىك جۋرناليستەر ينستيتۋتىندا وقىپ، ونى تامامداعاننان كەيىن، «سوتسياليستىك قازاقستان» گازەتىندە، سولتۇستىك قازاقستان وبلىستىق گازەتىندە، «جاڭا فيلم» جۋرنالىندا ءبولىم مەڭگەرۋشىسى قىزمەتىن اتقارادى.
1941 جىلى اسكەرگە الىنىپ، ۇلى وتان سوعىسىنا قاتىسادى. سوعىستىڭ العاشقى جىلدارىندا تۇتقىنعا ءتۇسىپ، كونتسلاگەردىڭ تاۋقىمەتىن باسىنان وتكەرەدى. كەيىن مۇستافا شوقاي ۇيىمداستىرعان تۇركىستان لەگيونىنىڭ قاتارىندا بولادى.
اقىن ءوزىنىڭ ەكىنشى دۇنيەجۇزىلىك سوعىستا تۇتقىنعا ءتۇسىپ، تۇركىستان لەگيونىندا بولعانىن، وندا دا قۋدالانعانىن، كەيىننەن بەرليندەگى ماۋلىكەش قايبالدينمەن كەزدەسۋدەن كەيىن “سايران” بولىپ ولەڭ شىعارىپ جۇرگەنى تۋرالى «مۇستافا مەن ماعجان – تۇران ەلىنىڭ دانالارى» اتتى كىتابىندا ەگجەي-تەگجەيلى جازادى.
“ادىرنا” ۇلتتىق پورتالى
