بۇگىن – كورنەكتى جازۋشى-دراماتۋرگ، قازاقستاننىڭ ەڭبەك سىڭىرگەن قايراتكەرى راحىمجان وتارباەۆتىڭ تۋعان كۇنى. بيىل قالامگەردىڭ 70 جىلدىق مەرەيتويى اتاپ ءوتىلىپ جاتىر، دەپ حابارلايدى «ادىرنا» ءتىلشىسى.
راحىمجان قاسىمعاليۇلى 1956 جىلى 19 قازاندا اتىراۋ وبلىسى قۇرمانعازى اۋدانىندا دۇنيەگە كەلگەن. ا.س. پۋشكين اتىنداعى ورال پەداگوگيكالىق ينستيتۋتىن (قازىرگى بقۋ – رەد.) بىتىرگەن.
ءار جىلداردا «ورال ءوڭىرى» گازەتىندە ءتىلشى، قازاق ءتىلى مەن ادەبيەتى ءپانىنىڭ مۇعالىمى، قازاق تەلەراديو كوميتەتىندە رەداكتور، «قازاق ادەبيەتى» گازەتىندە، «جالىن» الماناحىندا ءبولىم مەڭگەرۋشىسى، قىرعىزستاندا قازاقستان ەلشىلىگىنىڭ اتتاشەسى، ماڭعىستاۋ وبلىستىق راديوتەلەۆيدەنيە كومپانياسىنىڭ توراعاسى، اتىراۋ وبلىستىق دراما تەاترىنىڭ ديرەكتورى، قر پرەزيدەنتى اكىمشىلىگىندە سەكتور مەڭگەرۋشىسى قىزمەتتەرىندە بولعان.
جازۋشىنىڭ «شەر»، «جۇلدىزدار قۇلاعان جەر»، «جايىق جىرى»، «قاراشا قازدار قايتقاندا»، «داۋىسىڭدى ەستىدىم»، «وتۆەرجەننىي مير» اتتى پروزالىق جيناقتارى جانە تاڭدامالى شىعارمالارىنىڭ 2 تومدىعى جارىق كورگەن. جەكەلەگەن شىعارمالارى تۇرىك، اراب، اعىلشىن تىلدەرىندە باسىلعان.
«بەيبارىس سۇلتان»، «باس»، «ناشاقور جايلى نوۆەللا»، «نۇرجاۋعان-عۇمىر»، «سىرىم باتىر»، «مۇستافا شوقاي» سىندى پەسالارى رەسپۋبليكالىق جانە شەتەل تەاترلارىندا ساحنالانعان.
ول - ماحامبەت سىيلىعىنىڭ لاۋرەاتى، حالىقارالىق ايتماتوۆ اكادەمياسىنىڭ اكادەميگى، اتىراۋ قالاسىنىڭ جانە اتىراۋ وبلىسى قۇرمانعازى اۋدانىنىڭ قۇرمەتتى ازاماتى.
جازۋشى 2018 جىلى 17 اقپانعا قاراعان ءتۇنى اتىراۋدا قايتىس بولعان.
ايتا كەتەيىك، 12 قازاندا قالامگەردىڭ 70 جىلدىعىنا ارنالعان حالىقارالىق عىلىمي-تاجىريبەلىك كونفەرەنتسيا وتكەن ەدى. «راحىمجان وتارباەۆ مۇراسى: ۇلتتىق ادەبيەت، تاريحي سانا جانە رۋحاني ساباقتاستىق» تاقىرىبىنداعى جيىنعا وتاندىق جانە شەتەلدىك عالىمدار، ادەبيەت زەرتتەۋشىلەرى مەن قوعام قايراتكەرلەرى قاتىسقان.
