بىشكەكتە قازاقستاننىڭ قولداۋىمەن كەمەل توقاەۆ اتىنداعى №33 مەكتەپ-گيمنازيانى اۋقىمدى جاڭارتۋ جۇمىستارى جالعاسۋدا.
بۇل ءبىلىم بەرۋ مەكەمەسىنىڭ ەكى ەل ءۇشىن دە ايرىقشا ماڭىزى بار. بۇگىندە بۇل تاريحي عيماراتقا جاڭا تىنىس بەرىلۋدە: ينفراقۇرىلىمى جاڭارتىلىپ، ءبىلىم الۋعا زاماناۋي جاعدايلار جاسالىپ جاتىر، سونداي-اق وزىق تەحنولوگيالارمەن جابدىقتالعان كابينەتتەر اشىلۋدا.
قازاقستاننان جەتكىزىلگەن جابدىقتارمەن روبوتوتەحنيكا جانە حيميا كابينەتتەرى اشىلدى. №33 مەكتەپ كومپيۋتەرلەر، 3D-سكانەرلەر جانە تاجىريبەلىك ساباقتارعا ارنالعان زەرتحانالىق جابدىقتار الدى.
وقۋ بولمەلەرى قازاقستان تاراپى ۇسىنعان زاماناۋي جابدىقتارمەن جانە جيھازدارمەن قامتاماسىز ەتىلدى.
ينفورماتيكا جانە جاساندى ينتەللەكت تەحنولوگيالارىنا ارنالعان كابينەتكە 25 كومپيۋتەر، پروتوتيپتەر جاساۋعا ارنالعان ءۇش پرينتەر، ءتورت 3D-سكانەر جانە دياگونالى 75 ديۋيم بولاتىن ينتەراكتيۆتى مونيتور بەرىلدى. سونىمەن قاتار مەكتەپ پەرنەتاقتالار، تىنتۋىرلەر، قۇلاققاپتار جانە قاجەتتى وقۋ جيھازدارىن الدى.
ينفورماتيكا ءپانىنىڭ مۇعالىمى اسكات بورۋكۋلوۆتىڭ ايتۋىنشا، جاڭا كومپيۋتەرلەر قۋاتتى انالىق تاقشالارمەن، زاماناۋي بەينەكارتالارمەن جانە كولەمى ۇلعايتىلعان جەدەل جادپەن جابدىقتالعان. مۇنداي تەحنيكا وقۋشىلارعا 3D-گرافيكامەن، مودەلدەۋمەن جانە زاماناۋي باعدارلامالارمەن جۇمىس ىستەۋگە مۇمكىندىك بەرەدى.
حيميا كابينەتىندە تاجىريبەلىك جانە زەرتتەۋ ساباقتارىن وتكىزۋگە قاجەتتى جاعداي جاسالدى. قازاقستان تاراپى كولبالار، سىناۋىقتار، حيميالىق رەاكتيۆتەر، ولاردى ساقتاۋعا ارنالعان جابدىقتار جانە تاجىريبەلەر جۇرگىزۋگە ارنالعان ارنايى جيھازدار ۇسىندى.
حيميا ءپانىنىڭ مۇعالىمى البينا ۋسانوۆا جاڭا جابدىقتار زەرتتەۋ جوبالارىن كوبىرەك جۇرگىزۋگە، بايقاۋلار مەن وليمپيادالارعا قاتىسۋعا، سونداي-اق حيميالىق رەاكتسيالاردى كورنەكى تۇردە زەرتتەۋگە مۇمكىندىك بەرەتىنىن اتاپ ءوتتى.
جابدىقتاردىڭ ءبىر بولىگى ءالى تولىق اشىلىپ، ورنالاستىرىلماعانىنا قاراماستان، جاڭا كابينەتتەردە ساباقتار باستالىپ كەتتى. ينفورماتيكا ساباقتارىندا وقۋشىلار تسيفرلىق داعدىلاردى مەڭگەرىپ، روبوتوتەحنيكانىڭ قولدانىلۋ جولدارىن زەرتتەيدى. ال حيميا ساباقتارىندا زاتتاردىڭ رەاكتسيالارىن تاجىريبە جۇزىندە باقىلايدى.
مەكتەپ ديرەكتورى تاالايكۇل اشيموۆا قازاقستانعا كورسەتكەن قولداۋى ءۇشىن العىس ءبىلدىردى.
«جاڭادان جابدىقتالعان كابينەتتەردىڭ ارقاسىندا ءبىز بالالارىمىزعا ساپالى ءبىلىم بەرۋگە مۇمكىندىك الدىق. دوس مەملەكەتىمىز قازاقستاننىڭ قولداۋ كورسەتىپ جاتقانىنا شەكسىز قۋانىشتىمىز. بىرلەسكەن ءبىلىم بەرۋ جوبالارىمىزدىڭ جالعاسىن اسىعا كۇتەمىز»، – دەپ اتاپ ءوتتى ول.
