Ásel JUMATAI – elimizge belgili kondıter, qazaqtildi fýd-bloger, «Balzere school» mektebiniń negizin qalaýshy. «Adyrna» tilshisi jas kásipkermen áńgimelesip, bul salaǵa qalaı kelgenin surap bildi.
2017 jyly ystyq uıammen qoshtasyp, turmysqa shyqtym. Árıne, otbasylyq ómirde kez kelgen kelinshikti mazalaıtyn «Búgin ne pisiremin? Otbasymdy qalaı qýantamyn?» syndy suraqtar meni de aınalyp ótpedi. Tyǵyryqtan shyǵý maqsatynda ǵalamtordan túrli taǵamdardyń reeptilerin qarap, daıyndap júrdim. Ýaqyt óte kele qazaq tilinde blog júrgizetin aspazdardyń óte az ekenine kóz jetkizdim. Nege osy olqylyqtyń ornyn toltyrmasqa degen nıetpen fýd-blogerlikke qadam bastym. Birtindep pisirgen tamaqtarymdy jelige júkteı bastadym. Oqyrmandarymnyń «qandaı kúshti, keremet» degen bir-eki pikirlerin kórip, odan ári shabyttanatynmyn. Keıinnen ózimde senimdilik paıda bolyp, naqty qadamdar jasaı bastadym. Osylaısha qazirgi tańda qazaqsha kontentti damytýǵa kishkentaı bolsa da úlesimdi qosyp júrmin.
Búginde Ásel hanym súıikti isin kásibine aınaldyra bilgen baqytty jandardyń biri.
Bul salada júrgenime 4 jyldan asty. Dál qazirgi ýaqytta hobbıim jumysyma aınaldy. Shyny kerek, bastapqy kezde tamaq pisirý arqyly tabys tabamyn degen nıet múldem bolmady. Olardy satamyn, tabysty ledı bolamyn dep oılamadym. Iá, damý maqsatynda túrli aqyly master klastarǵa qatystym, alaıda sol kezdegi maqsatym jańa taǵamdardy úırenip alý arqyly joldasymdy qýantyp, jaı ǵana ol kisiniń «Alla razy bolsyn» degen sózin estý boldy. Jan jarym bizdi asyrap otyrǵannan keıin jumysqa shyǵamyn degen oı kelmepti. Onyń ústine men oqýymdy áli aıaqtamaǵan edim.
Qonaǵymyz alǵashqy tapsyrysyn qalaı alǵany týraly da baıandap berdi.
Kondıterlik ónimderdi jasaǵandy erekshe unatamyn. Táttilerimnen dám tatqan týystarym «Ásel, nege torttaryńdy satpaısyń? Keremet shyǵypty» dep jıi aıtatyn. Keıin olardy satý ıdeıasy týdy. Bastapty kezde aǵaıyndaryma tegin berip júrdim. Keıde shyǵynyna ǵana aqsha alatynmyn. Keıinnen týystarym arqyly basqa da adamdar tortymnyń dámin kórip, tapsyrys bere bastady. Isim osylaısha jandanyp ketti. Barlyǵy birden bola qoıǵan joq.
Ásel Jumataıdyń pikirinshe, kondıter – eń qıyn mamandyqtardyń biri.
Kóp adam kondıterdiń jumysy jeńildeý dep oılaıdy. Alaıda bul qate pikir. Tortty dámdi jasaı bilý – bir óner, ony bezendirý – bir óner. Klıenttiń kóńilinen shyǵa ma dep taǵy bir ýaıymdaısyń. Qazirgi tańda biraz tájirıbe jınaǵannan keıin táttilerimniń baǵasy da ózge kondıterlerge qaraǵanda sál qymbattaý dep aıtsam bolatyn shyǵar. Tapsyrys berýshilerdiń kóńilinen shyǵa bilý úshin ádemi dekory bar tort jasaýǵa barymdy salamyn. Ol adamnyń biraz ýaqytyn alady. Áli kúnge deıin «klıentimdi razy ete alamyn ba?» dep ýaıymdaımyn. Sebebi barlyǵy «ýaý, Ásel hanym, keremet» dep aıta bermeıdi ǵoı. Neshe túrli adam bolǵannan keıin ár adamnyń qalaýy árqalaı. Basymnan ótken qyzyq oqıǵamdy aıtyp bereıin. Bir adam syrty qyzǵylt tústi tortqa tapsyrys berdi. Qyrsyqqanda dál sondaı tústi boıaǵyshym taýsylyp qalǵan eken. Oıymda artyq eshteńe joq, tortty qyzǵylt-sary túspen ásemdeı saldym. Máz bolyp, tapsyrys bergen janǵa táttimdi tabystap jatqanda, ol óz renishin aıtty. Dekor úshin alǵan aqshamdy qaıtaryp berdim. Shyny kerek, kez kelgen kondıter úshin klıenttiń kóńilinen shyqpaı qalý – óte jaman sezim.
Áńgime barysynda jas kásipker arnaıy aspaz mamandyǵyn oqymaǵanyn atap ótti.
Ózim qalamaıtyn mamandyqqa oqýǵa tústim. Ol unamaǵannan keıin, bolashaǵymdy sol salamen baılanystyra almaǵandyqtan, ýnıversıtetten óz erkimmen shyǵyp kettim. Ózgelerdiń pikiri qyzyq bolmady. Sheshimime ókinbedim, kerisinshe súıikti isimdi tapqanyma qýandym.
Búginde Ásel Jumataı – ardaqty jar, úsh balany tárbıelep otyrǵan aıaýly ana, «Balzere school» mektebiniń negizin qalaýshy.
– Mekteptiń negizin joldasym ekeýmiz qaladyq. Barlyq jumysty tek ózim atqarmaımyn ǵoı. Komandamyz bar. Ondaǵy ár adamnyń óz mindeti bar. Al balalarymyzǵa ata-analarymyz qarap berip jatyr.Dese de, bastapqy kezde óte qıyn boldy. Sebebi seniń balalaryń bar, emizýli sábıiń bar, túsip jatqan tapsyrystaryń bar, ınstagramdaǵy blogerlik jumysyń bar, taǵysyn taǵy. Onyń barlyǵynyń artynda birshama emoııa jatyr. Vıdeo birden oıdaǵydaı bolyp shyqpaıdy. Balamen arpalysyp júrip pisirgen tamaqtarym kúıip ketip jatady. Ony keıin qaıta túsirýge májbúr bolasyń. Jaryqty durys qoıýyń kerek. Shynymdy aıtsam, barlyǵyn tastap, odansha bala-shaǵama qarap otyraıyn degen kezderim boldy. Biraq jaqyndarymnyń qoldaýynyń arqasynda qaıta aıaqqa turyp, kúsh jınadym. Osy tusta qol ushyn sozyp jatqan barsha týysyma óz alǵysymdy bildirip ótkim keledi. Bul dárejege birinshi Allanyń qalaýymen, ekinshi osy kisilerdiń arqasynda jettim.
Áreketke bereket..
Aılyq tabysym — 1,5 mıllıon teńgeden joǵary. Eńbegimniń jemisi dep bilemin. Alla Taǵala ońdy áreketke bereket beredi. Bul aqshanyń kóp bóligin jańa kýrstarǵa qatysýǵa, tehnologııalardy satyp alýǵa jumsaımyn. Kondıter árdaıym izdenis ústinde bolýy kerek.
Osy deńgeıge jetý úshin 4 jyl eńbektendim..
Men qarapaıym otbasynda dúnıege kelgen, tek anamnyń tárbıesin kórgen qyzbyn. Qazirgi tańda mıllıonǵa jýyq aýdıtorııany jınap, óz mektebimdi ashtym. Onyń barlyǵy da mańdaı terimizdiń arqasynda keldi. Bul deńgeıge jetý úshin tórt jyl eńbektendim. Siz de shynaıy qalasańyz, barlyǵyna qol jetkize alasyz. Eger kondıterlik salany tańdasańyz, onyń qyzyǵy men shyjyǵyna da daıyn bolyńyz. Birden tabysqa kenelý múmkin emes. Bastysy sabyr etińiz, synbańyz. Umytpańyz, eńbektiń artynda tek jemis turady.
Kondıter aldaǵy ýaqytta bar kúsh-jigerin mektebiniń damýyna salmaq.
Maqsatym — «Balzere» mektebin aıaqqa turǵyzyp, ony TMD elderi moıyndaıtyndaı dárejege jetkizý. Qazir úıde otyrǵan qyz-kelinshekter kóp. Óz ornyn taba almaı júrgender de barshylyq. Sondaı jandarǵa kómekteskim keledi. Olar da men sekildi súıikti isin kásibine aınaldyra alady. Árıne, barlyq názik jandynyń ómirin ózgerte almaıtynym aqıqat. Alaıda, Qazaqstandaǵy áıelderdiń 5 %-nyń bolsyn tabysty bolýyna, ómirden óz ornyn tabýyna az da bolsa septigimdi tıgizgim keledi.
Áńgimelesken Dıana ASAN,
«Adyrna» ulttyq portaly
