اسەل جۇماتاي – ەلىمىزگە بەلگىلى كونديتەر, قازاقءتىلدى فۋد-بلوگەر, «Balzere school» مەكتەءبىنىڭ نەگىزىن قالاۋشى. «ادىرنا» ءتىلشىسى جاس كاسىپكەرمەن اڭگىمەلەسىپ، بۇل سالاعا قالاي كەلگەنىن سۇراپ ءبىلدى.
2017 جىلى ىستىق ۇياممەن قوشتاسىپ، تۇرمىسقا شىقتىم. ارينە، وتباسىلىق ومىردە كەز كەلگەن كەلىنشىكتى مازالايتىن «بۇگىن نە پىسىرەمىن؟ وتباسىمدى قالاي قۋانتامىن؟» سىندى سۇراقتار مەنى دە اينالىپ وتپەدى. تىعىرىقتان شىعۋ ماقساتىندا عالامتوردان ءتۇرلى تاعامداردىڭ رەتسەپتىلەرىن قاراپ، دايىنداپ ءجۇردىم. ۋاقىت وتە كەلە قازاق تىلىندە بلوگ جۇرگىزەتىن اسپازداردىڭ وتە از ەكەنىنە كوز جەتكىزدىم. نەگە وسى ولقىلىقتىڭ ورنىن تولتىرماسقا دەگەن نيەتپەن فۋد-بلوگەرلىككە قادام باستىم. بىرتىندەپ پىسىرگەن تاماقتارىمدى جەلىگە جۇكتەي باستادىم. وقىرماندارىمنىڭ «قانداي كۇشتى، كەرەمەت» دەگەن ءبىر-ەكى پىكىرلەرىن كورىپ، ودان ءارى شابىتتاناتىنمىن. كەيىننەن وزىمدە سەنىمدىلىك پايدا بولىپ، ناقتى قادامدار جاساي باستادىم. وسىلايشا قازىرگى تاڭدا قازاقشا كونتەنتتى دامىتۋعا كىشكەنتاي بولسا دا ۇلەسىمدى قوسىپ ءجۇرمىن.
بۇگىندە اسەل حانىم سۇيىكتى ءىسىن كاسىبىنە اينالدىرا بىلگەن باقىتتى جانداردىڭ ءبىرى.
بۇل سالادا جۇرگەنىمە 4 جىلدان استى. ءدال قازىرگى ۋاقىتتا ءحوببيىم جۇمىسىما اينالدى. شىنى كەرەك، باستاپقى كەزدە تاماق ءپىسىرۋ ارقىلى تابىس تابامىن دەگەن نيەت مۇلدەم بولمادى. ولاردى ساتامىن، تابىستى لەدي بولامىن دەپ ويلامادىم. ءيا، دامۋ ماقساتىندا ءتۇرلى اقىلى ماستەر كلاستارعا قاتىستىم، الايدا سول كەزدەگى ماقساتىم جاڭا تاعامداردى ۇيرەنىپ الۋ ارقىلى جولداسىمدى قۋانتىپ، جاي عانا ول كىسىنىڭ «اللا رازى بولسىن» دەگەن ءسوزىن ەستۋ بولدى. جان جارىم ءبىزدى اسىراپ وتىرعاننان كەيىن جۇمىسقا شىعامىن دەگەن وي كەلمەپتى. ونىڭ ۇستىنە مەن وقۋىمدى ءالى اياقتاماعان ەدىم.
قوناعىمىز العاشقى تاپسىرىسىن قالاي العانى تۋرالى دا بايانداپ بەردى.
كونديتەرلىك ونىمدەردى جاساعاندى ەرەكشە ۇناتامىن. تاتتىلەرىمنەن ءدام تاتقان تۋىستارىم «اسەل، نەگە تورتتارىڭدى ساتپايسىڭ؟ كەرەمەت شىعىپتى» دەپ ءجيى ايتاتىن. كەيىن ولاردى ساتۋ يدەياسى تۋدى. باستاپتى كەزدە اعايىندارىما تەگىن بەرىپ ءجۇردىم. كەيدە شىعىنىنا عانا اقشا الاتىنمىن. كەيىننەن تۋىستارىم ارقىلى باسقا دا ادامدار تورتىمنىڭ ءدامىن كورىپ، تاپسىرىس بەرە باستادى. ءىسىم وسىلايشا جاندانىپ كەتتى. بارلىعى بىردەن بولا قويعان جوق.
اسەل جۇماتايدىڭ پىكىرىنشە، كونديتەر – ەڭ قيىن ماماندىقتاردىڭ ءبىرى.
كوپ ادام كونديتەردىڭ جۇمىسى جەڭىلدەۋ دەپ ويلايدى. الايدا بۇل قاتە پىكىر. تورتتى ءدامدى جاساي ءبىلۋ – ءبىر ونەر، ونى بەزەندىرۋ – ءبىر ونەر. كليەنتتىڭ كوڭىلىنەن شىعا ما دەپ تاعى ءبىر ۋايىمدايسىڭ. قازىرگى تاڭدا ءبىراز تاجىريبە جيناعاننان كەيىن تاتتىلەرىمنىڭ باعاسى دا وزگە كونديتەرلەرگە قاراعاندا ءسال قىمباتتاۋ دەپ ايتسام بولاتىن شىعار. تاپسىرىس بەرۋشىلەردىڭ كوڭىلىنەن شىعا ءبىلۋ ءۇشىن ادەمى دەكورى بار تورت جاساۋعا بارىمدى سالامىن. ول ادامنىڭ ءبىراز ۋاقىتىن الادى. ءالى كۇنگە دەيىن «كليەنتىمدى رازى ەتە الامىن با؟» دەپ ۋايىمدايمىن. سەبەبى بارلىعى «ۋاۋ، اسەل حانىم، كەرەمەت» دەپ ايتا بەرمەيدى عوي. نەشە ءتۇرلى ادام بولعاننان كەيىن ءار ادامنىڭ قالاۋى ارقالاي. باسىمنان وتكەن قىزىق وقيعامدى ايتىپ بەرەيىن. ءبىر ادام سىرتى قىزعىلت ءتۇستى تورتقا تاپسىرىس بەردى. قىرسىققاندا ءدال سونداي ءتۇستى بوياعىشىم تاۋسىلىپ قالعان ەكەن. ويىمدا ارتىق ەشتەڭە جوق، تورتتى قىزعىلت-سارى تۇسپەن اسەمدەي سالدىم. ءماز بولىپ، تاپسىرىس بەرگەن جانعا ءتاتتىمدى تابىستاپ جاتقاندا، ول ءوز رەنىشىن ايتتى. دەكور ءۇشىن العان اقشامدى قايتارىپ بەردىم. شىنى كەرەك، كەز كەلگەن كونديتەر ءۇشىن كليەنتتىڭ كوڭىلىنەن شىقپاي قالۋ – وتە جامان سەزىم.
اڭگىمە بارىسىندا جاس كاسىپكەر ارنايى اسپاز ماماندىعىن وقىماعانىن اتاپ ءوتتى.
ءوزىم قالامايتىن ماماندىققا وقۋعا ءتۇستىم. ول ۇناماعاننان كەيىن، بولاشاعىمدى سول سالامەن بايلانىستىرا الماعاندىقتان، ۋنيۆەرسيتەتتەن ءوز ەركىممەن شىعىپ كەتتىم. وزگەلەردىڭ پىكىرى قىزىق بولمادى. شەشىمىمە وكىنبەدىم، كەرىسىنشە سۇيىكتى ءىسىمدى تاپقانىما قۋاندىم.
بۇگىندە اسەل جۇماتاي – ارداقتى جار، ءۇش بالانى تاربيەلەپ وتىرعان اياۋلى انا، «Balzere school» مەكتەبءىنىڭ نەگءىزىن قالاۋشى.
– مەكتەپتىڭ نەگىزىن جولداسىم ەكەۋمىز قالادىق. بارلىق جۇمىستى تەك ءوزىم اتقارمايمىن عوي. كوماندامىز بار. ونداعى ءار ادامنىڭ ءوز مىندەتى بار. ال بالالارىمىزعا اتا-انالارىمىز قاراپ بەرىپ جاتىر.دەسە دە، باستاپقى كەزدە وتە قيىن بولدى. سەبەبى سەنىڭ بالالارىڭ بار، ەمىزۋلى ءسابيىڭ بار، ءتۇسىپ جاتقان تاپسىرىستارىڭ بار، ينستاگرامداعى بلوگەرلىك جۇمىسىڭ بار، تاعىسىن تاعى. ونىڭ بارلىعىنىڭ ارتىندا ءبىرشاما ەموتسيا جاتىر. ۆيدەو بىردەن ويداعىداي بولىپ شىقپايدى. بالامەن ارپالىسىپ ءجۇرىپ پىسىرگەن تاماقتارىم كۇيىپ كەتىپ جاتادى. ونى كەيىن قايتا تۇسىرۋگە ءماجبۇر بولاسىڭ. جارىقتى دۇرىس قويۋىڭ كەرەك. شىنىمدى ايتسام، بارلىعىن تاستاپ، ودانشا بالا-شاعاما قاراپ وتىرايىن دەگەن كەزدەرىم بولدى. بىراق جاقىندارىمنىڭ قولداۋىنىڭ ارقاسىندا قايتا اياققا تۇرىپ، كۇش جينادىم. وسى تۇستا قول ۇشىن سوزىپ جاتقان بارشا تۋىسىما ءوز العىسىمدى ءبىلدىرىپ وتكىم كەلەدى. بۇل دارەجەگە ءبىرىنشى اللانىڭ قالاۋىمەن، ەكىنشى وسى كىسىلەردىڭ ارقاسىندا جەتتىم.
ارەكەتكە بەرەكەت..
ايلىق تابىسىم — 1,5 ميلليون تەڭگەدەن جوعارى. ەڭبەگىمنىڭ جەمىسى دەپ بىلەمىن. اللا تاعالا وڭدى ارەكەتكە بەرەكەت بەرەدى. بۇل اقشانىڭ كوپ بولىگىن جاڭا كۋرستارعا قاتىسۋعا، تەحنولوگيالاردى ساتىپ الۋعا جۇمسايمىن. كونديتەر ءاردايىم ىزدەنىس ۇستىندە بولۋى كەرەك.
وسى دەڭگەيگە جەتۋ ءۇشىن 4 جىل ەڭبەكتەندىم..
مەن قاراپايىم وتباسىندا دۇنيەگە كەلگەن، تەك انامنىڭ تاربيەسىن كورگەن قىزبىن. قازىرگى تاڭدا ميلليونعا جۋىق اۋديتوريانى جيناپ، ءوز مەكتەبىمدى اشتىم. ونىڭ بارلىعى دا ماڭداي تەرىمىزدىڭ ارقاسىندا كەلدى. بۇل دەڭگەيگە جەتۋ ءۇشىن ءتورت جىل ەڭبەكتەندىم. ءسىز دە شىنايى قالاساڭىز، بارلىعىنا قول جەتكىزە الاسىز. ەگەر كونديتەرلىك سالانى تاڭداساڭىز، ونىڭ قىزىعى مەن شىجىعىنا دا دايىن بولىڭىز. بىردەن تابىسقا كەنەلۋ مۇمكىن ەمەس. باستىسى سابىر ەتىڭىز، سىنباڭىز. ۇمىتپاڭىز، ەڭبەكتىڭ ارتىندا تەك جەمىس تۇرادى.
كونديتەر الداعى ۋاقىتتا بار كۇش-جىگەرىن مەكتەبىنىڭ دامۋىنا سالماق.
ماقساتىم — «بالزەرە» مەكتەبىن اياققا تۇرعىزىپ، ونى تمد ەلدەرى مويىندايتىنداي دارەجەگە جەتكىزۋ. قازىر ۇيدە وتىرعان قىز-كەلىنشەكتەر كوپ. ءوز ورنىن تابا الماي جۇرگەندەر دە بارشىلىق. سونداي جاندارعا كومەكتەسكىم كەلەدى. ولار دا مەن سەكىلدى سۇيىكتى ءىسىن كاسىبىنە اينالدىرا الادى. ارينە، بارلىق نازىك جاندىنىڭ ءومىرىن وزگەرتە المايتىنىم اقيقات. الايدا، قازاقستانداعى ايەلدەردىڭ 5 %-نىڭ بولسىن تابىستى بولۋىنا، ومىردەن ءوز ورنىن تابۋىنا از دا بولسا سەپتىگىمدى تيگىزگىم كەلەدى.
اڭگىمەلەسكەن ديانا اسان،
«ادىرنا» ۇلتتىق پورتالى
