Depýtat Ermurat Bapı 4 qazan kúni Májilis otyrysynda Islam dininiń jat aǵymdarynyń qazaq qoǵamyna qaýpi týraly sóz etip, QR Premer-mınıstri men Ulttyq qaýipsizdik komıtetiniń tóraǵasyna saýal joldady, dep habarlaıdy "Adyrna" ulttyq portaly.
Ermurat Bapı qazirgi tańda qoǵamnyń shyrqyn buzyp, túrli dúrbeleń týdyryp jatqan máselelerdiń kópshiligi teris dinı aǵym ókilderiniń isi ekenin aıta ótti. Dinı úrdistiń saıası sıpat alyp, máseleniń túbin qazǵan jandarǵa túrli shabýyldardyń jasalyp jatqanyn da qosa ketti.
"Parlament depýtaty Rınat Zaıytovtyń azamattyq pikirine qarsy shabýyldar osyndaı saıası qaterdiń sıpatyn sezdirse kerek. Qoǵamdy arabtyq-ýahabtyq dinı ustanym negizde bólshekteýge baǵyttalǵan bul áreketterge bizder – depýtattar jaıbaraqat qarap otyra almaımyz! Biz myńjyldyq dombyrany haram qylýǵa jol bermeımiz! Bul áreketter eldiń ulttyq qundylyqtar júıesi men rýhanı negizine jasalyp jatqan shabýyl dep túsiný kerek!" dedi ol.
Sonymen qosa, dinı sektalardyń Qazaqstannyń túrli aımaǵynda, atap aıtqanda Atyraý, Aqtóbe, Mańǵystaý, Ulytaý, Almaty óńirinde etek jaıyp baratynyn aıtty.
Premer-mınıstr Álıhan Samıylovqa birqatar máseleler boıynsha shara qoldaný qajettigin jetkizdi ol:
"Birinshiden, Siz jáne Sizdiń Kabınetińiz qalyptasqan kúrdeli jaǵdaıdy túısinip otyr ma? Qoǵamnyń dinı negizde bólshektený qaýpine qarsy is-qımyl jospary bar ma? Ekinshiden, Úkimet pen Ulttyq Qaýipsizdik Komıteti jáne ýákiletti organdar birlesip, teris dinı aǵymdar týdyryp jatqan ulttyq alaýyzdyqty shuǵyl toqtatýdyń amal-áreketteri El Prezıdentiniń nazaryna usynyldy ma? Úshinshiden, budan 12 jyl buryn – 2011 jyldyń 11 qazanynda qabyldanǵan «Dinı qyzmet jáne dinı birlestikter týraly» zańǵa tıisti ózgerister men tolyqtyrýlar engizýdiń qoǵamdyq qajettiligin kóteretin kez kelgen joq pa? Tórtinshiden, qalyptasqan osy qoǵamdyq jaǵdaıda biz barlyq kúsh-jigerimizdi biriktirip, ult birligi men memlekettiń turaqty damý jaǵdaıyn saqtaýǵa Úkimet pen Parlament múddeli bolýy kerek dep esepteımiz. Eger Úkimet tarapynan qandaı da bir tıisti qujat qabyldaý bastamasy týatyn bolsa, depýtattar ony qoldaıdy degen senimim zor" dedi Ermurat Bapı.
