Almatyda Qazaqstan Respublikasynyŋ Mädeniet jäne aqparat ministrı Arman Qyryqbaev şyǧarmaşylyq ziialy qauym ökılderımen jäne jastarmen kezdestı.
Jiynda Memleket basşysy Joldauynyŋ negızgı baǧyttary, ūlttyq mädeniettı damytu, ädebiettı qoldau jäne zerdelı ūlt qalyptastyru mäselelerı talqylandy.
Kezdesuge mädeniet jäne öner qairatkerlerı, jas qalamgerler men kreativtı industriia ökılderı qatysty.
Joldauda aiqyndalǧan mındetter jäne sifrlandyru mümkındıkterı
Ministr Memleket basşysynyŋ Joldauynda aiqyndalǧan mındetterge toqtalyp, olardy ıske asyruda sifrlandyrudyŋ jäne jastardyŋ belsendı qatysuynyŋ maŋyzyn atap öttı.
«Memleket basşysynyŋ Joldauy – elımızdıŋ aldaǧy damu baǧytyn aiqyndaityn maŋyzdy strategiialyq qūjat. Prezident Joldauyndaǧy ideialardy jüzege asyru mädeniet salasy men kreativtı industriia ökılderınıŋ eŋbegıne, olardyŋ ärqaisysynyŋ osy jūmystaǧy öz rölın tüsınuıne tıkelei bailanysty. Sifrlandyru men jasandy intellekt şyǧarmaşylyqqa tyŋ mümkındıkter aşyp, mädeni mūrany köpşılıkke qoljetımdı ete tüsedı. Bızdıŋ basty maqsatymyz – şyǧarmaşylyq bastamalarǧa jol aşu, öner men ädebiettı halyqqa jaqyndatu jäne jas ūrpaqtyŋ jasampaz quatyn el damuyna baǧyttau», – dedı ministr.
Zerdelı ūlt qalyptastyru
Memleket basşysynyŋ zerdelı ūlt qalyptastyru jönındegı bastamasyn ıske asyruǧa erekşe nazar audaryldy. reading-nation.kz platformasynda 1,4 millionnan astam qatysuşy tırkelgen. Olar 842 myŋnan astam kıtap oqyp, 50 myŋnan astam beinepıkır jariialaǧan.
Qoǧamdyq qūndylyqtar jäne infraqūrylymdy damytu
Qatysuşylar Memleket basşysynyŋ 2027 jyldy Jalpyhalyqtyq auqymdy qūrylys jyly dep jariialau jönındegı bastamasyn da talqylady. Sondai-aq äleumettık jäne mädeni infraqūrylymdy jaŋǧyrtu, jastarǧa arnalǧan zamanaui keŋıstıkter qūru mäselelerı söz boldy.
Ūlttyq qūndylyqtardy saqtau men qoǧamdyq ädeptı nyǧaitu mäselesıne toqtalǧan ministr «Adal azamat», «Zaŋ men tärtıp» jäne «Taza Qazaqstan» qaǧidattarynyŋ maŋyzyn atap öttı. Sondai-aq ūlttyq bıregeilıktı nyǧaituda, tarihi mūra men qazırgı Qazaqstannyŋ jasampazdyq äleuetın ädebiet pen önerde beineleude şyǧarmaşyl ziialy qauymnyŋ rölı zor ekenın aitty.
Kezdesu aşyq pıkır almasuǧa ūlasty. Qatysuşylar ministrge sūraqtaryn qoiyp, öz bastamalaryn ūsyndy jäne mädeniet pen ädebiettıŋ aldaǧy damu baǧyttaryn talqylady.
Ūlttyq kıtaphana tün ortasyna deiın jūmys ısteidı
Kezdesu barysynda Arman Qyryqbaev Qazaqstan Respublikasynyŋ Ūlttyq kıtaphanasynyŋ qyzmetımen jäne oqyrman belsendılıgı jönındegı derektermen de tanysty.
2026 jyldyŋ mamyr-qaraşa ailarynda kıtaphanaǧa 26 myŋnan astam jaŋa oqyrman tırkelgen. Būl ötken jyldyŋ säikes kezeŋımen salystyrǧanda 73,8 paiyzǧa köp. 15-35 jas aralyǧyndaǧy oqyrmandar sany 33 paiyzǧa ösıp, 24 myŋnan asqan. Osy kezeŋde oqyrmandarǧa 1,6 millionnan astam qūjat berılgen. Al onlain qyzmetterdı paidalanuşylar sany 13 paiyzǧa artyp, 932 myŋnan asty.
Oqyrman belsendılıgınıŋ artuy men keluşılerdıŋ ötınışterın eskergen ministr Ūlttyq kıtaphananyŋ jūmys uaqytyn saǧat 24:00-ge deiın ūzartu turaly şeşım qabyldanǧanyn habarlady. Jaŋa jūmys kestesı studentterge, jūmys ısteitın azamattarǧa jäne özge de keluşılerge keşkı uaqytta da kıtaphana qoryn jäne qyzmetterın paidalanuǧa mümkındık beredı.
