ماڭعىستاۋ وبلىسىنىڭ اقشۇقىر اۋىلىنداعى م. ابدىحالىقوۆ اتىنداعى مەكتەپ-گيمنازياسىنىڭ 9-سىنىبىندا وقيتىن ازيزا نۇرلانقىزى ميلليونەر اتاندى، دەپ حابارلايدى "ادىرنا" ۇلتتىق پورتالى.
تاۋەلسىزدىكتىڭ 30 جىلدىعىن مەرەكەلەۋ اياسىندا قازاقستان رەسپۋبليكاسى اقپارات جانە قوعامدىق دامۋ مينيسترلىگى «تاۋەلسىزدىك ۇرپاقتارى» گرانتىن تاعايىنداعان ەدى. قازاقستاننىڭ مادەني مۇراسىن تانىمال ەتۋگە، حالىقتىق مادەني داستۇرلەر مەن ونەردى ىلگەرىلەتۋگە باعىتتالعان جوبالاردى ىسكە اسىرۋعا ارنالعان بايقاۋدىڭ «مادەنيەت» سالاسىنداعى گرانتىن تۇپقاراعاندىق جاس دارىن ازيزا نۇرلانقىزى ولجالاپ، 3 ميلليون تەڭگەنى جەڭىپ الدى.
مۋلتيپليكاتسيا، انيماتسيا جاساۋمەن اينالىساتىن ازيزا ەڭبەك نارىعىندا 72 % سۇرانىسقا يە بۇل ماماندىقتى 7-سىنىپ وقىپ جۇرگەندە تاڭداعان. قازىر ول وسى باعىتتا تالماي ەڭبەكتەنىپ، ءارتۇرلى جوعارعى دارەجەلى بايقاۋلاردان باس بايگەنى قانجىعالاپ ءجۇر.
- سۋرەتتى بالا كۇنىمنەن سالىپ جۇرگەندىكتەن، ونى سوتكادا ءتۇرلى گرافيكالىق باعدارلامالاردى قولدانىپ سالۋدى ۇيرەنە باستادىم. سودان باستاپ، مەن العاش قىزعۋشىلىعىم ويانىپ، اتا-انامنان گرافيكالىق سۋرەتتەردى سالاتىن پلانشەتتە جۇمىس جاساعىم كەلەتىنىن جەتكىزگەم. اتا-انام ءسوزىمدى جەرگە تاستاماي، بىردەن بارلىق شىعارماشىلىق قولداۋ ءبىلدىردى. مۋلتيپليكاتور–مۋلتفيلمدەر جاسايتىن سۋرەتشى دەگەندى بىلدىرەدى. انيماتور كەيىپكەرلەردىڭ سىرتقى ءتۇرىن انىقتايدى. قيمىلىن سىزىپ، سيۋجەتتىك جەلىمەن جۇمىس ىستەيدى. وعان ءتۇس پەن قيالدى قوسىڭىز. بارلىعى قوسىلىپ ءسىز كورەتىن مۋلتفيلم، انيماتسيالىق ءفيلمدى قۇرايدى",- دەيدى ازيزا نۇرلانقىزى.
"ادىرنا" ۇلتتىق پورتالى
