يزرايل سوماليدەن ءبولىنىپ شىققان سوماليلەندتى تاۋەلسىز مەملەكەت رەتىندە رەسمي تۇردە مويىنداعان العاشقى ەل اتاندى، دەپ حابارلايدى "ادىرنا" ۇلتتىق پورتالى Gazeta.ru-عا سىلتەپ.
بۇل تۋرالى ءيزرايلدىڭ سىرتقى ىستەر ءمينيسترى گيدەون ساار X الەۋمەتتىك جەلىسىندە مالىمدەدى.
ونىڭ ايتۋىنشا، تاراپتار تولىققاندى ديپلوماتيالىق قارىم-قاتىناس ورناتىپ، ەلشىلەر تاعايىنداپ، ەلشىلىكتەر اشۋعا كەلىسكەن.
«مينيسترلىككە ەكى ەل اراسىنداعى بايلانىستى ءتۇرلى سالادا ينستيتۋتسيوناليزاتسيالاۋ بويىنشا جەدەل شارالار قابىلداۋدى تاپسىردىم»، — دەدى گيدەون ساار.
يزرايل پرەمەر-ءمينيسترى بينيامين نەتانياحۋ سوماليلەندپەن اۋىل شارۋاشىلىعى، دەنساۋلىق ساقتاۋ جانە تەحنولوگيا سالالارىندا ىنتىماقتاستىقتى دەرەۋ كەڭەيتۋگە نيەتتى ەكەنىن مالىمدەدى.
ال ءوزىن-ءوزى جاريالاعان سوماليلەند پرەزيدەنتى موحامەد ابدۋللاحي ءيزرايلدىڭ شەشىمىن تاريحي ءسات دەپ اتاپ، ەلىنىڭ «اۆراام كەلىسىمدەرىنە» قوسىلاتىنىن ايتتى. بۇل كەلىسىمدەر يزرايل مەن بىرقاتار مۇسىلمان ەلدەرى اراسىندا ديپلوماتيالىق قاتىناس ورناتۋعا باعىتتالعان.
سونىمەن قاتار، حالىقارالىق دەڭگەيدە مويىندالعان سومالي پرەزيدەنتى حامزا ابدي باررە ءيزرايلدىڭ بۇل قادامىن ەلدىڭ ەگەمەندىگىنە قاساقانا قول سۇعۋ دەپ باعالادى.
ءيزرايلدىڭ شەشىمىن ەگيپەت، تۇركيا جانە دجيبۋتي سىرتقى ىستەر مينيسترلەرى سوماليلىك ارىپتەسىمەن وتكەن تورتجاقتى تەلەفون اڭگىمەسىندە ايىپتادى. ولار ءسوماليدىڭ تۇراقتىلىعىنا نۇقسان كەلتىرەتىن بىرجاقتى ارەكەتتەردەن ساقتاندىرىپ، مۇنداي قادامداردىڭ حالىقارالىق قۇقىق پەن بۇۇ جارعىسى تۇرعىسىنان قاۋىپتى پرەتسەدەنت قالىپتاستىراتىنىن اتاپ ءوتتى. سونداي-اق پالەستينالىقتاردى تاريحي وتانىنان كوشىرۋ جوسپارلارىن قابىلدامايتىنىن مالىمدەدى.
