ماڭعىستاۋ وبلىسىندا مەملەكەت باسشىسىنىڭ «جاڭا تاريحي كەزەڭدەگى قازاقستاننىڭ وزەكتى مىندەتتەرى» اتتى قازاقستان حالقىنا جولداۋىن ءتۇسىندىرۋ ماقساتىندا قۇرىلعان جۇمىس توپتارى ءوڭىر تۇرعىندارى جانە ەڭبەك ۇجىمدارىمەن بىرقاتار كەزدەسۋ وتكىزدى.
جاڭاوزەن قالاسىندا قۇرىلتاي دەپۋتاتى اببات ورىسباەۆ قالالىق كوپسالالى اۋرۋحانانىڭ مەديتسينا قىزمەتكەرلەرىمەن كەزدەستى. جيىنعا قالا اكىمى سىمبات تورەتاەۆ، قر دەنساۋلىق ساقتاۋ مينيسترلىگى مەديتسينالىق باقىلاۋ كوميتەتىنىڭ ءتورايىمى لاۋرا احمەتنياز جانە «ادىلەت» پارتياسى وبلىستىق فيليالىنىڭ توراعاسى يمامماحمۇت شاعىرباەۆ قاتىستى.
كەزدەسۋ بارىسىندا اببات ورىسباەۆ مەملەكەت باسشىسىنىڭ جولداۋىندا بەلگىلەنگەن مىندەتتەردىڭ ەلدىڭ ساياسي جانە الەۋمەتتىك-ەكونوميكالىق دامۋى ءۇشىن ماڭىزىنا توقتالدى. ونىڭ ايتۋىنشا، بيىلعى جولداۋ ەلىمىزدىڭ 35 جىلدىق تاۋەلسىزدىگى قارساڭىنداعى اۋقىمدى ساياسي رەفورمالاردىڭ جالعاسى بولىپ سانالادى. اتاپ ايتقاندا، جاڭا كونستيتۋتسيانىڭ قابىلدانۋى، ءبىرپالاتالى پارلامەنتتىڭ سايلانۋى، حالىق كەڭەسىنىڭ جۇمىسىن باستاۋى جانە ۆيتسە-پرەزيدەنت ينستيتۋتىنىڭ قۇرىلۋى ەل باسقارۋ جۇيەسىندەگى ماڭىزدى وزگەرىستەردىڭ ءبىرى.
سونىمەن قاتار دەپۋتات وڭىردە «حالىقتىق قۇرىلىس» جوباسى اياسىندا جۇزەگە اسىرىلاتىن مەديتسينالىق ينفراقۇرىلىمدى دامىتۋ باستامالارىنا نازار اۋداردى. جولداۋدا حالىقتىڭ ءومىر ساپاسىن جاقسارتۋ، مەديتسينالىق قىزمەتتىڭ قولجەتىمدىلىگىن ارتتىرۋ جانە الەۋمەتتىك نىسانداردى جاڭعىرتۋ ماسەلەلەرى باسىم باعىتتاردىڭ ءبىرى رەتىندە ايقىندالعانىن جەتكىزدى.
ال قر دەنساۋلىق ساقتاۋ مينيسترلىگى مەديتسينالىق باقىلاۋ كوميتەتىنىڭ ءتورايىمى لاۋرا احمەتنياز سالا بويىنشا الداعى ۋاقىتتا اتقارىلاتىن اۋقىمدى جوبالارعا توقتالدى. ول مەديتسينالىق ينفراقۇرىلىمدى جاڭعىرتۋ، انا مەن بالا دەنساۋلىعىن قورعاۋ جانە دەنساۋلىق ساقتاۋ سالاسىنا وزىق تەحنولوگيالاردى ەنگىزۋ باعىتىنداعى جۇمىستاردى اتاپ ءوتتى.
بۇدان كەيىن جۇمىس توبى ماڭعىستاۋ اتوم ەنەرگەتيكالىق كومبيناتىنىڭ (ماەك) قىزمەتكەرلەرىمەن كەزدەستى. جيىنعا قازاقستان حالىق كەڭەسىنىڭ مۇشەسى، ماڭعىستاۋ وبلىسى قوعامدىق كەڭەسىنىڭ توراعاسى بەكمۇرات ءجۇسىپوۆ، وبلىستىق اقساقالدار كەڭەسىنىڭ توراعاسى وڭايبەك ءابدىلوۆ، قازاقستان حالىق كەڭەسىنىڭ مۇشەسى، ەكولوگ كيريلل وسين جانە «ادىلەت» پارتياسى وبلىستىق فيليالى توراعاسىنىڭ ورىنباسارى انار شامشادينوۆا قاتىستى.
كەزدەسۋدە ەلدىڭ ەكونوميكالىق دامۋى، ەنەرگەتيكالىق قاۋىپسىزدىك، كولىك-لوگيستيكا الەۋەتى، الەۋمەتتىك ينفراقۇرىلىمدى جەتىلدىرۋ جانە قوعامدىق كەلىسىمدى نىعايتۋ ماسەلەلەرى تالقىلاندى. سونداي-اق قازاقستاننىڭ ترانزيتتىك مۇمكىندىكتەرىن ارتتىرۋ، اەس سالۋ، كەندىرلى اۋەجايىن ىسكە قوسۋ جانە ءوڭىردىڭ تۋريستىك الەۋەتىن دامىتۋ باعىتتارىنا نازار اۋدارىلدى.
قازاقستان حالىق كەڭەسىنىڭ مۇشەسى بەكمۇرات ءجۇسىپوۆ وڭىردەگى الەۋمەتتىك ينفراقۇرىلىمدى دامىتۋ ماسەلەسىنە توقتالدى. ونىڭ ايتۋىنشا، ماڭعىستاۋدا بالا تۋ كورسەتكىشىنىڭ جوعارى بولۋىنا بايلانىستى انا مەن بالا دەنساۋلىعىن قورعاۋ باعىتىنداعى نىسانداردىڭ ماڭىزى زور. وسى رەتتە اقتاۋ قالاسىندا 350 ورىندىق كوپبەيىندى بالالار اۋرۋحاناسىن سالۋ جوسپارلانىپ وتىرعانىن جەتكىزدى.
بۇدان بولەك، جۇمىس توبى «قازازوت» اكتسيونەرلىك قوعامىنىڭ ەڭبەك ۇجىمىمەن دە كەزدەستى. جيىندا «ادىلەت» پارتياسى وبلىستىق فيليالى توراعاسىنىڭ ورىنباسارى انار شامشادينوۆا جولداۋداعى حالىقتىڭ ءال-اۋقاتىن ارتتىرۋعا باعىتتالعان باستامالاردى ءتۇسىندىردى. اتاپ ايتقاندا، «حالىقتىق قۇرىلىس» باستاماسى اياسىندا دەنساۋلىق ساقتاۋ سالاسىندا 70-تەن استام، ءبىلىم بەرۋ جانە مادەنيەت باعىتىندا 50-دەن استام نىسان سالۋ جوسپارلانعانىن ايتتى. سونداي-اق ەنەرگەتيكالىق قاۋىپسىزدىك، ينفراقۇرىلىم جانە شاعىن جانە ورتا بيزنەستى قولداۋ ماسەلەلەرى ءسوز بولدى.
سونىمەن قاتار اقتاۋ قالاسىندا ءبىلىم بەرۋ سالاسى مەن ەتنومادەني بىرلەستىكتەر وكىلدەرىنىڭ قاتىسۋىمەن كەزدەسۋ ۇيىمداستىرىلدى. وعان قر ۇلتتىق ەكونوميكا مينيسترلىگى تابيعي مونوپوليالاردى رەتتەۋ كوميتەتىنىڭ توراعاسى تيمۋر قوسىمباەۆ، قازاقستان حالىق كەڭەسىنىڭ مۇشەسى راۋشان ايمۋرزاەۆا، وبلىستىق اقپارات جانە قوعامدىق دامۋ باسقارماسىنىڭ باسشىسى گۇلميرا بالعوجاەۆا، «ادىلەت» پارتياسى وبلىستىق فيليالى توراعاسىنىڭ ورىنباسارى نۇربەك قاراساەۆ جانە «بەرەكەت-ف» كومپانياسىنىڭ باس ديرەكتورى زارەتا فاتاليەۆا قاتىستى.
جيىندا ءبىلىم بەرۋ ينفراقۇرىلىمىن دامىتۋ، الەۋمەتتىك نىسانداردىڭ قولجەتىمدىلىگىن ارتتىرۋ، ەتنوسارالىق كەلىسىم مەن قوعامدىق تۇراقتىلىقتى ساقتاۋ ماسەلەلەرى قوزعالدى.
«ادىلەت» پارتياسى وبلىستىق فيليالى توراعاسىنىڭ ورىنباسارى نۇربەك قاراساەۆتىڭ ايتۋىنشا، مەملەكەت باسشىسىنىڭ جولداۋىندا ەلىمىزدىڭ الداعى دامۋ كەزەڭىنە ارنالعان ماڭىزدى مىندەتتەر ايقىندالعان. سوندىقتان ونداعى باستامالاردىڭ مازمۇنىن ءار سالا وكىلدەرىنە ءتۇسىندىرىپ، ولاردى ىسكە اسىرۋ جولدارىن تالقىلاۋ ماڭىزدى. ونىڭ سوزىنشە، مۇنداي كەزدەسۋلەر حالىق پەن مەملەكەتتىك ورگاندار اراسىنداعى ءوزارا بايلانىستى نىعايتىپ، وڭىردەگى وزەكتى ماسەلەلەردى ورتاعا سالۋعا مۇمكىندىك بەرەدى.
ءوز كەزەگىندە قر ۇلتتىق ەكونوميكا مينيسترلىگى تابيعي مونوپوليالاردى رەتتەۋ كوميتەتىنىڭ توراعاسى تيمۋر قوسىمباەۆ ءبىلىم بەرۋ نىساندارىن سالۋ جانە كۇردەلى جوندەۋدەن وتكىزۋ ءتارتىبىن ءتۇسىندىرىپ، جەرگىلىكتى دەڭگەيدە جوبالاردى ساپالى ازىرلەپ، قاجەتتى قۇجاتتاردى ۋاقىتىلى ۇسىنۋدىڭ ماڭىزىن اتاپ ءوتتى. سونداي-اق مينيسترلىك كوميتەتى ءوز قۇزىرەتى شەڭبەرىندە وڭىردەگى الەۋمەتتىك نىسانداردى دامىتۋعا باعىتتالعان باستامالاردى قولداۋعا جانە ءتيىستى دەڭگەيدە كوتەرۋگە دايىن ەكەنىن جەتكىزدى.
كەزدەسۋلەر بارىسىندا قاتىسۋشىلار وزدەرىن تولعاندىرعان سۇراقتارىن قويىپ، ۇسىنىس-پىكىرلەرىن ورتاعا سالدى. جۇمىس توپتارىنىڭ وكىلدەرى جولداۋدا بەلگىلەنگەن مىندەتتەردى جۇزەگە اسىرۋ تەتىكتەرى بويىنشا تۇسىنىكتەمە بەردى.
