بۇگىن، 18 قاراشادا ماڭعىستاۋ وبلىسىنىڭ اكىمى نۇرداۋلەت قيلىباي ماڭعىستاۋ اۋدانىنا جۇمىس ساپارى اياسىندا شايىر اۋىلدىق وكرۋگىنە قاراستى تاسمۇرىن جەرىندەگى بيداي ءوسىرۋ جوباسىنىڭ بارىسىمەن تانىستى. ءىس-شارادا القاپقا العاشقى كۇزدىك بيداي تۇقىمى سەبىلدى.
اتالعان اۋماقتا اۋىل شارۋاشىلىعى سالاسىن دامىتۋعا باعىتتالعان ءىرى ينۆەستيتسيالىق جوبا قولعا الىنعان. جوبا اياسىندا «ماقسات» شارۋا قوجالىعىنا كارتوپ جانە بيداي ءوسىرۋ ماقساتىندا 2 مىڭ گەكتار جەر ۋچاسكەسى ءۇش جىل مەرزىمگە جالعا بەرىلگەن.
قازىرگى تاڭدا شارۋاشىلىقتا كۇزدىك بيداي ەگۋگە باعىتتالعان اگروتەحنيكالىق جۇمىستار جۇرگىزىلۋدە. بيىلعى ەگىس ناۋقانىندا 300 گەكتار جەر وڭدەلگەن. جەر جىرتۋ، توپىراقتى قۇنارلاندىرۋ جانە تۇقىم سەبۋ جۇمىستارى باستالعان. ەگىس جانە جيناۋ جۇمىستارىنا قاجەتتى تراكتور، سوقا، تۇقىم سەپكىش جانە كومباين تەحنيكالارى بار. بۇگىندە شارۋاشىلىقتا 15 ادام ەڭبەك ەتەدى.
كۇزدىك بيدايدىڭ ءار گەكتارىنان 15-20 تسەنتنەر ءونىم الۋ جوسپارلانىپ وتىر. وسىلايشا، 300 گەكتار القاپتان الىناتىن جالپى ءونىم كولەمى 450-600 توننانى قۇرايدى.
وبلىس اكىمى نۇرداۋلەت قيلىباي ەگىس القابىنداعى جۇمىستاردىڭ بارىسىن كورىپ، اۋىل شارۋاشىلىعى باعىتىنداعى مۇنداي جوبالاردى جۇيەلى جۇزەگە اسىرۋ، جەردى ءتيىمدى پايدالانۋ جانە ەگىن شارۋاشىلىعىن دامىتۋدىڭ ماڭىزدىلىعىن اتاپ ءوتتى. سونداي-اق، قولعا الىنعان جۇمىستىڭ ناتيجەلى بولۋى ءۇشىن قولداۋ بولاتىنىن جەتكىزدى.
