ماڭعىستاۋ وبلىسىنىڭ اكىمى نۇرداۋلەت قيلىباي قاراقيا اۋدانىنداعى «Organic Fish» جشس-ءنىڭ كاسپي تەڭىزىندە بالىق ءوسىرۋ شارۋاشىلىعىنىڭ جۇمىسىمەن تانىستى.
جوبا قۇرىق پورتىنان شامامەن 20 شاقىرىم قاشىقتىقتاعى كاسپي تەڭىزىنىڭ تەرەڭ سۋ بولىگىندە البىرت تۇقىمداس بالىقتاردى تەڭىز تور قورشامالارىندا ءوسىرۋدى كوزدەيدى. كاسىپورىننىڭ وندىرىستىك قۋاتىن كەزەڭ-كەزەڭىمەن ارتتىرىپ، جىلىنا 5 مىڭ تونناعا دەيىن تاۋارلى بالىق ءوندىرۋ جوسپارلانعان.
2025 جىلعى قىركۇيەكتە تەڭىزگە ديامەترى 38 مەتر بولاتىن العاشقى ءۇش تور قورشاما ورنالاستىرىلدى. سول جىلدىڭ قاراشا ايىنان باستاپ جىل سوڭىنا دەيىن ولارعا جالپى سالماعى شامامەن 20 توننا بولاتىن 95 مىڭ دانا بالىق شاباعى جىبەرىلدى. باستاپقىدا ورتاشا سالماعى 200 گرامم بولعان بالىقتاردىڭ قازىرگى سالماعى 1,8-2,5 كيلوگرامعا دەيىن جەتتى.
كاسىپورىن العاشقى ءونىمىن بيىل قىركۇيەك ايىندا الىپ، ىشكى نارىققا شىعارۋدى جوسپارلاپ وتىر.
– مەملەكەت باسشىسى قاسىم-جومارت كەمەلۇلى توقاەۆ وتاندىق ءوندىرىستى دامىتۋ، ەكونوميكانى ءارتاراپتاندىرۋ جانە ازىق-تۇلىك قاۋىپسىزدىگىن قامتاماسىز ەتۋ مىندەتتەرىن ۇنەمى اتاپ كەلەدى. «Organic Fish» جوباسى وسى باعىتتاعى ناقتى جۇمىستاردىڭ ءبىرى. كاسپي تەڭىزىنىڭ تابيعي الەۋەتىن ءتيىمدى پايدالانىپ، جاڭا ءوندىرىس باعىتىن قالىپتاستىرۋ ارقىلى ىشكى نارىقتى وتاندىق ونىممەن قامتاماسىز ەتۋگە مۇمكىندىك بار. سوندىقتان جوبانىڭ وندىرىستىك قۋاتىن كەزەڭ-كەزەڭىمەن ارتتىرىپ، بەلگىلەنگەن جوسپارلاردى ساپالى جۇزەگە اسىرۋ ماڭىزدى، – دەدى نۇرداۋلەت قيلىباي.
جوبانىڭ وندىرىستىك قۋاتىن ارتتىرۋ ماقساتىندا بيىل تاعى ءۇش تەڭىز تور قورشاماسىن ورناتۋ جۇمىستارى جۇرگىزىلۋدە. قازىرگى ۋاقىتتا ولار بەلگىلەنگەن ۋچاسكەلەرگە ورنالاستىرىلىپ، بەكىتۋ جۇمىستارى اتقارىلۋدا. قوسىمشا تور قورشامالاردى قىركۇيەك ايىنىڭ باسىنا دەيىن ىسكە قوسىپ، ولاردى بالىقتاندىرۋ جوسپارلانعان.
جىل سوڭىنا دەيىن بارلىق التى تور قورشاماعا شامامەن 470 مىڭ دانا بالىق شاباعىن ورنالاستىرۋ كوزدەلىپ وتىر. شاباقتاردىڭ ورتاشا سالماعى 200-300 گرامم، جالپى بيوماسساسى شامامەن 114 توننانى قۇرايدى.
جوسپارعا سايكەس، جوبانىڭ وندىرىستىك قۋاتى 2026 جىلى 150 توننا، 2027 جىلى 1 300 توننا، ال 2028 جىلى 5 مىڭ توننا تاۋارلى بالىق ءوندىرۋ دەڭگەيىنە جەتكىزىلەدى. الداعى كەزەڭدە تور قورشامالار سانىن ودان ءارى كوبەيتۋ كوزدەلىپ وتىر.
ايماق باسشىسى تەڭىز اكۆاشارۋاشىلىعىن دامىتۋ ماڭعىستاۋدىڭ ەكونوميكالىق الەۋەتىن ارتاراپتاندىرۋعا، جاڭا جۇمىس ورىندارىن اشۋعا جانە ىشكى نارىقتى وتاندىق ونىممەن قامتاماسىز ەتۋگە مۇمكىندىك بەرەتىنىن اتاپ ءوتتى.
«Organic Fish» جوباسى كاسپي تەڭىزىنىڭ تابيعي الەۋەتىن ءتيىمدى پايدالانا وتىرىپ، قازاقستاندا تەڭىزدە بالىق ءوسىرۋ باعىتىن دامىتۋعا جانە اكۆاشارۋاشىلىق سالاسىنىڭ جاڭا تەحنولوگيالىق دەڭگەيگە كوتەرىلۋىنە مۇمكىندىك بەرەدى.
