«كەمەلدەنۋدىڭ جەتى شەڭبەرى» تۇجىرىمداماسىنا ارنالعان ەكىنشى سيمۆولدىق ەسكەرتكىش اشىلدى.
كيەلى ماڭعىستاۋ تورىندە اقىن، فيلوسوف مۇراتحان شوقاننىڭ «جاراتىلىسناما» كىتابىندا نەگىزدەلگەن «كەمەلدەنۋدىڭ جەتى شەڭبەرى» تۇجىرىمداماسىنا ارنالعان ەكىنشى سيمۆولدىق ەسكەرتكىشتىڭ سالتاناتتى اشىلۋى ءوتتى. الماتىدا باستاۋ العان يگى باستامانىڭ جاڭاوزەندە جالعاسىن تابۋى ونىڭ قوعامدىق-مادەني كەڭىستىكتەگى اۋقىمىن كەڭەيتە ءتۇستى.
تۇجىرىمدامانىڭ نەگىزگى فيلوسوفيالىق ءمانى – ادام ساناسىنىڭ وتباسىنان، جاقىن اينالاسىنىڭ قامىنان ۇلتقا، تۇتاس ادامزاتقا، ودان ءارى بۇكىل جاراتىلىسقا دەگەن جاناشىرلىق دەڭگەيىنە كوتەرىلۋى. شىنايى كەمەلدەنۋ – وزگەنىڭ تاعدىرىنا بەيجاي قاراماي، ورتاق الەم الدىنداعى جاۋاپكەرشىلىكتى سەزىنە ءبىلۋ. دەمەك، ادام ساناسىنىڭ بيىگى – جاناشىرلىقتىڭ شەكسىزدىگى.
سالتاناتتى راسىمگە قاتىسقان جاڭاوزەن قالاسىنىڭ اكىمى سىمبات قۋانىشۇلى تورەتاەۆ باستامانىڭ ماڭىزىن اتاپ ءوتتى. ءىس-شارانى ۇيىمداستىرۋعا مادەنيەت جانە تىلدەردى دامىتۋ باسقارماسىنىڭ باسشىسى گۇلجان سالامادينقىزى جۇەمباەۆا مەن مۇنايشى مادەنيەت ءۇيىنىڭ ديرەكتورى وركەن نۇراتدينۇلى تۋەباەۆ اتسالىستى.
سونىمەن قاتار قازاقستان جازۋشىلار وداعى باسقارماسىنىڭ توراعاسى مەرەكە قۇلكەنوۆ، دۇنيەجۇزى قازاقتارى قاۋىمداستىعى توراعاسىنىڭ ءبىرىنشى ورىنباسارى زاۋىتبەك تۇرىسبەكوۆ، حالىقارالىق تۇركسوي ۇيىمىنىڭ باس حاتشىسى سۇلتان راەۆ، قۇرىلتاي دەپۋتاتتارى جارقىنبەك امانتايۇلى مەن ديداربەك دىلدابەك، الماتى قالاسى مادەنيەت باسقارماسىنىڭ باسشىسى دانيار اليەۆ جانە شەتەلدىك قالامگەرلەر قۇتتىقتاۋ لەبىزدەرىن جولدادى. جيىندا جاڭاوزەن قالاسىنىڭ قۇرمەتتى ازاماتى، ەڭبەك ارداگەرى مىڭباي ساقي ەڭسەپۇلى دا جۇرەكجاردى تىلەگىن ءبىلدىردى.
جاڭاوزەندە بوي كوتەرگەن سيمۆولدىق ەسكەرتكىش – ادامدى جەكە مۇددە شەڭبەرىنەن شىعىپ، ۇلتقا، ادامزاتقا جانە تۇتاس جاراتىلىسقا جاناشىر بولۋعا ۇندەيتىن تاعىلىمدى بەلگى. ونىڭ باستى مۇراتى – سانالى ۇرپاق قالىپتاستىرۋ، ىزگىلىك پەن جاۋاپكەرشىلىك قۇندىلىقتارىن دارىپتەۋ.
ادام كەمەلدەنسە – ساناسى كەڭەيەدى. ساناسى كەڭەيسە – جاناشىرلىعى بۇكىل جاراتىلىستى قامتيدى. وي شىراعى ءار كەۋدەدە جانسىن، قوعام ىزگىلىككە تولسىن!
