پوليتسيا قىزمەتكەرلەرى الەۋمەتتىك جەلىلەردە ماڭعىستاۋ وبلىسىندا بولعان توتەنشە جاعدايعا قاتىستى شىنايى اقپاراتقا سايكەس كەلمەيتىن مالىمەتتەردى تاراتۋ فاكتىلەرىن انىقتادى.
د.س. جانە گ.س. ەسىمدى ازاماتتاردىڭ Facebook الەۋمەتتىك جەلىسىندەگى پاراقشالارىنا اسكەري قىزمەتشى ا.ا. تۋرالى اقپارات جاريالاعانى بەلگىلى بولدى. جاريالانىمداردا ونىڭ سۋعا باتىپ بارا جاتقان جولداسىن قۇتقارىپ، ءوز بەتىمەن جاعاعا شىققانى، سونداي-اق ونىڭ ەرلىگى مەن قۇتقارىلۋ جاعدايلارى قاساقانا جاسىرىلىپ وتىرعانى تۋرالى مالىمەتتەر تاراتىلعان.
تەكسەرۋ بارىسىندا د.س. اتالعان اقپاراتتى الىستاعى تۋىستارىنان العانى انىقتالدى. ال گ.س. بۇل مالىمەتتەردى الەۋمەتتىك جەلىلەردەن الىپ، ولاردىڭ شىنايىلىعىن تەكسەرمەستەن ءوز پاراقشاسىندا جاريالاعانىن ءتۇسىندىردى.
اتالعان مالىمەتتەر شىندىققا سايكەس كەلمەيدى جانە قازاقستان رەسپۋبليكاسى قورعانىس مينيسترلىگى تاراپىنان رەسمي تۇردە جوققا شىعارىلدى.
اتاپ ايتقاندا، قورعانىس مينيسترلىگى اسكەري قىزمەتشى ا.ا.-عا قاتىستى تۇسىنىكتەمە بەردى. ۆەدومستۆونىڭ اقپاراتىنا سايكەس، ا.ا. وقۋ-جاتتىعۋ بارىسىندا جاعالاۋدا بولىپ، وقۋ-جاتتىعۋ جوسپارىنا سايكەس كوزدەلگەن مىندەتتەردى ورىنداعان. ونىمەن بىرگە جاعالاۋدا مەرزىمدى اسكەري قىزمەتتەگى ماتروس م.ءا. بولعان. قازىرگى ۋاقىتتا ەكى اسكەري قىزمەتشى دە اسكەري ءبولىمنىڭ ورنالاسقان جەرىندە قىزمەتىن جالعاستىرىپ جاتىر.
وسىلايشا الەۋمەتتىك جەلىلەردە ا.ا-نىڭ ءوز بەتىمەن جاعاعا ءجۇزىپ شىققانى، سۋعا باتىپ بارا جاتقان جولداسىن قۇتقارعانى جانە ونىڭ ەرلىگى تۋرالى اقپاراتتىڭ قاساقانا جاسىرىلىپ وتىرعانى جونىندە تاراعان مالىمەتتەر شىندىققا سايكەس كەلمەيدى.
سونىمەن قاتار وقيعاعا قاتىستى شىنايى اقپاراتقا سايكەس كەلمەيتىن مالىمەتتەردى تاراتقان شىمكەنت قالاسىنىڭ تۇرعىنى س.ك. جانە كوكشەتاۋ قالاسىنىڭ تۇرعىنى ك.و. انىقتالدى.
اتاپ ايتقاندا، س.ك. Facebook الەۋمەتتىك جەلىسىندەگى پاراقشاسىندا تاعى ءبىر اسكەري قىزمەتشىنىڭ قازا بولعانى تۋرالى شىنايى اقپاراتقا سايكەس كەلمەيتىن مالىمەت جاريالاپ، ونىڭ تۋىستارىنا قىسىم كورسەتىلىپ، ولاردان اقشا تالاپ ەتىلىپ وتىرعانىن مالىمدەگەن.
ءوز كەزەگىندە ك.و. ماڭعىستاۋ وبلىسىندا تاعى ءبىر اسكەري قىزمەتشىنىڭ قازا بولعانى تۋرالى شىنايى اقپاراتقا سايكەس كەلمەيتىن مالىمەت جاريالاعان.
اكىمشىلىك ماتەريالداردى قاراۋ ناتيجەسىندە سوت شەشىمىمەن اتالعان تۇلعالار اكىمشىلىك جاۋاپكەرشىلىككە تارتىلىپ، 20 اەك مولشەرىندە ايىپپۇل سالىندى.
پوليتسيا شىنايى اقپاراتقا سايكەس كەلمەيتىن مالىمەتتەردى، ونىڭ ىشىندە باسقا تۇلعالاردىڭ ماتەريالدارىن قايتا جاريالاۋ ارقىلى تاراتۋدىڭ دا جاۋاپكەرشىلىكتەن بوساتپايتىنىن ەسكەرتەدى. بوگدە اقپارات كوزىنە سىلتەمە جاساۋ ازاماتتاردىڭ قۇقىقتارى مەن زاڭدى مۇددەلەرىنە نۇقسان كەلتىرۋى مۇمكىن تەكسەرىلمەگەن مالىمەتتەردى تاراتۋعا نەگىز بولا المايدى.
پوليتسيا الەۋمەتتىك جەلى پايدالانۋشىلارىن اقپاراتتى جاريالاۋعا جاۋاپكەرشىلىكپەن قاراۋعا، تاراتىلاتىن مالىمەتتەردىڭ شىنايىلىعىن تەكسەرۋگە جانە راستالماعان اقپاراتتى جاريالاۋعا جول بەرمەۋگە شاقىرادى.
