دەپۋتات ايتۋوۆتىڭ پلاستيكالىق وپەراتسيادان كەيىن قايتىس بولۋىنا بايلانىستى جەكەمەنشىك مەديتسينالىق ورتالىقتا جۇرگىزىلگەن جوسپاردان تىس تەكسەرۋ بارىسىندا بىرقاتار ورەسكەل زاڭبۇزۋشىلىق انىقتالدى، دەپ حابارلايدى "ادىرنا" ۇلتتىق پورتالى.
بۇل تۋرالى دەنساۋلىق ساقتاۋ مينيسترلىگىنىڭ مەديتسينالىق جانە فارماتسەۆتيكالىق باقىلاۋ كوميتەتى مالىمدەدى.
ۆەدومستۆونىڭ حابارلاۋىنشا، تەكسەرۋ ناتيجەسىندە مەديتسينالىق ۇيىمنىڭ ەمدەۋ-دياگنوستيكالىق جۇمىستارى مەن مەديتسينالىق قۇجاتتاردى جۇرگىزۋىندە ەلەۋلى كەمشىلىكتەر انىقتالعان. مالىمەتكە سايكەس، ەربول ايتۋوۆ 2026 جىلدىڭ 4 ساۋىرىندە پلاستيكالىق وپەراتسيادان كەيىن جاعدايى كۇرت ناشارلاپ، جەدەل جاردەم قىزمەتىمەن ماڭعىستاۋ وبلىستىق كوپبەيىندى اۋرۋحاناسىنىڭ جانساقتاۋ بولىمىنە جەتكىزىلگەن. تەكسەرۋ بارىسىندا مارقۇمنىڭ II ءتيپتى قانت ديابەتىمەن اۋىراتىنى جانە ديسپانسەرلىك ەسەپتە تۇرعانى بەلگىلى بولعان. الايدا وپەراتسيا الدىندا پاتسيەنت ەندوكرينولوگتىڭ كەڭەسىنە جىبەرىلمەگەن ءارى قانداعى قانت دەڭگەيىن تۇراقتاندىرۋ بويىنشا قاجەتتى شارالار قابىلدانباعان.
فارمباقىلاۋ دەپارتامەنتىنىڭ مالىمەتىنشە، وپەراتسيا الدىنداعى تەكسەرۋلەر جۇرگىزىلگەنىمەن، تاۋەكەلدەردى باعالاۋ جانە پاتسيەنتتى وپەراتسياعا دايىنداۋ جۇمىستارى قولدانىستاعى ستاندارتتارعا تولىق سايكەس ورىندالماعان.
سونداي-اق جوسپارلى وپەراتسياعا رۇقسات بەرۋ تۋرالى شەشىمدى قابىلداعان كلينيكانىڭ باس دارىگەرى ءارى پلاستيكالىق حيرۋرگى ناۋقاستا قاتار جۇرەتىن اۋرۋلاردىڭ بولۋىنا قاراماستان قوسىمشا تەكسەرۋلەر تاعايىنداماعان جانە ەندوكرينولوگ پەن تەراپەۆتكە جولداماعان. تەكسەرۋ قورىتىندىسى بويىنشا مەديتسينالىق مەكەمەگە انىقتالعان زاڭبۇزۋشىلىقتاردى جويۋ تۋرالى نۇسقاما بەرىلىپ، جينالعان ماتەريالدار قۇقىقتىق باعا بەرۋ ءۇشىن ماڭعىستاۋ وبلىسىنىڭ پوليتسيا دەپارتامەنتى مەن پروكۋراتۋرا ورگاندارىنا جولداندى.
ۆەدومستۆونىڭ مالىمەتىنشە، اتالعان كلينيكاعا بۇعان دەيىن دە، ناقتىراق ايتقاندا 2023 جانە 2025 جىلدارى پاتسيەنتتەردىڭ شاعىمدارى نەگىزىندە جوسپاردان تىس تەكسەرۋلەر جۇرگىزىلگەن. مەديتسينالىق مەكەمە 2015 جىلى بەرىلگەن ليتسەنزيا نەگىزىندە جۇمىس ىستەيدى.
دەنساۋلىق ساقتاۋ سالاسىنداعى باقىلاۋ ورگانى پلاستيكالىق وپەراتسيالاردى جۇرگىزۋ ءۇشىن جالپى مەديتسينالىق ليتسەنزيادان بولەك ارنايى رۇقسات قۇجاتتارى قاجەت ەكەنىن اتاپ ءوتتى.
