ەلورداداعى «نۇر استانا» مەشىتىنىڭ اتاۋى ءابۋ ناسىر ءال-فارابي بولىپ وزگەرتىلدى. بۇل تۋرالى نۇر-سۇلتان قالاسى اكىمدىگىنىڭ سايتى حابارلادى.
باس ءمۇفتي ناۋرىزباي قاجى تاعانۇلىنىڭ توراعالىعىمەن وتكەن قازاقستان مۇسىلماندارى ءدىني باسقارماسىنىڭ تورالقا ماجىلىسىندە «نۇر استانا» مەشىتىنىڭ اتاۋىن وزگەرتۋ جونىندەگى عۇلامالار كەڭەسىنەن ۇسىنىس ءتۇستى. قمدب ءبولىم باسشىلارى، وبلىس يمامدارى مەن ورتالىق اپپارات قىزمەتكەرلەرى مەشىت اتاۋىنىڭ وزگەرۋىن قولداپ، داۋىس بەردى. ناتيجەسىندە 15 جىلدىق تاريحى بار مەشىت ەندىگى تاڭدا ويشىل، عۇلاما ءال-فارابيدىڭ ەسىمىمەن اتالاتىندىعى تۋرالى شەشىم قابىلداندى.
"جاقىندا قمدب-دا عۇلامالار كەڭەسىنىڭ ۇسىنىسىمەن ەلوردامىزعا تالاي جىلدار قىزمەت ەتكەن نۇر-استانا مەشىتىنىڭ اتاۋىن ءال فارابي بابامىزدىڭ اتىنا وزگەرتۋ جايىندا ۇسىنىس بەرىلگەن بولاتىن. اللاعا سانسىز شۇكىرلەر بولسىن! ءابۋ ناسىر ءال فارابي بابامىزدىڭ اتىنا وزگەرتۋ جايىندا شەشىم قابىلداندى. جالپى وسى ەلوردا تورىندەگى مەشىتكە بابامىزدىڭ اتى بەرىلۋى تەكتەن تەك ەمەس. ويتكەنى، ەڭ ءبىرىنشى ءال فارابي دەگەن كەزدە ءاربىر مۇسىلمان ءۇشىن، ءاربىر قازاق رۋحانياتىنا يماندىلىقتى، بىلىمگە دەگەن قۇشتارلىقتى، قاناعاتشىلىقتى، قاراپايىمدىلىقتى ەسكە تۇسىرەدى", - دەدى نۇر-سۇلتان قالاسىنىڭ باس يمامى ەربولات ءجۇسىپوۆ.
تاۋەلسىزدىكتىڭ 30 جىلدىعىنا وراي قابىلدانعان شەشىم ناتيجەسىندە بۇگىن رەسمي تۇردە بۇرىنعى مەشىت اتاۋى جازىلعان تاقتايشا الىنىپ، ورنىنا ءابۋ ناسىر ءال-فارابي اتىنداعى جاڭا مەشىت اتاۋىمەن تاقتايشا ورناتىلدى.
"مەشىتكە ءال-فارابيدىڭ ەسىمىن بەرگەندە ءبىز ەكى سەبەپپەن قۋاندىق. ءبىرىنشى — عىلىم، ءبىلىم كەلەدى، ءال-فارابيدىڭ اتى ءبىزدى جاڭعىرتىپ تۇرادى دەپ. ەكىنشى جاعداي، ءبىز ەندى ءال-فارابي اتىمەن الەمگە تانىلامىز، الەمدى تانيمىز دەپ. ءال-فارابي ءبىز ءۇشىن رۋحاني كوپىر", – دەيدى ل.ن. گۋميلەۆ اتىنداعى ەۇۋ پرورەكتورى، فيلولوگيا عىلىمدارىنىڭ دوكتورى ديحان قامزابەكۇلى.
ء"ابۋ ناسىر ءال-فارابي دەگەن ادام جەتى عاسىر بويى بۇكىل ادامزاتتىڭ اقىل-ويىنىڭ نەگىزگى تىرەگى بولدى. وسى يسلامنىڭ ءپالساپاسىن، دۇنيەتانىمىن بۇكىل دۇنيەجۇزىنە كاسىبي تۇردە ناسيحاتتاپ، جەتكىزگەن ءابۋ ناسىر ءال-فارابي. سوندىقتان ءال-فارابيدىڭ اتىمەن مەشىتتىڭ اتالۋى—بۇل وتە تاماشا ءارى ورىندى", – دەپ اتاپ ءوتتى قر ۇلتتىق عىلىم اكادەمياسىنىڭ اكادەميگى، پروفەسسور عاريفوللا ەسىم.
ايتا كەتەيىك، 2005 جىلدىڭ 2 ناۋرىزىندا اشىلعان مەشىت ەلوردانىڭ ەسىل اۋدانىندا ورنالاسقان. مەشىت كاتار مەملەكەتىنىڭ ءامىرى شەيح حاماد بين حاليفا ءال-ءسانيدىڭ قايتارىمسىز سىي رەتىندە بولگەن قارجىسىنا تۇرعىزىلعان بولاتىن. ورتالىقتىڭ اشىلۋىنا سول تۇستاعى مەملەكەت باسشىسى نۇرسۇلتان نازارباەۆ قاتىسىپ، قاعبا مەن قۇران بەينەلەنگەن، سۇرەلەر تۇسىرىلگەن جاپقىشتى سىيعا تارتتى.
"ادىرنا" ۇلتتىق پورتالى
