ماڭعىستاۋ مەملەكەتتىك تاريحي-مادەني قورىعى اۋماعىندا ورنالاسقان شوپان-اتا جەراستى مەشىتىنىڭ قۇدىعىن ىزدەۋ ماگنيتىمەن زەرتتەمەك بولعان اقتاۋلىق قازىنا ىزدەۋشىگە بۇل ايماقتى زەرتتەۋگە رەسمي تۇردە تىيىم سالىندى، دەپ حابارلايدى "ادىرنا" ۇلتتىق پورتالى Lada.kz سايتىنا سىلتەپ.
ەر ادام شوپان-اتا كيەلى-ەسكەرتكىش كەشەنىندەگى قۇدىقتى زەرتتەۋگە رۇقسات سۇراپ، ءوتىنىش جازعان.
قازىنا ىزدەۋشىنىڭ ايتۋىنشا، جەراستى مەشىتىن كوپتەگەن زياراتشىلار كەلىپ كورگەن. جەرگىلىكتى قاريالاردىڭ سوزىنشە، قۇدىقتىڭ ىشىنەن بۇرىن ەكى شەلەك تيىن جينالعان.
الايدا ءوتىنىش يەسىنە قۇدىقتىڭ ءتۇبىن زەرتتەۋگە رۇقسات بەرىلمەدى. رەسمي جاۋاپتا شوپان-اتا جەراستى مەشىتى رەسپۋبليكالىق ماڭىزى بار تاريحي-مادەني ەسكەرتكىشتەر تىزىمىنە ەنگىزىلگەنى جانە ونى الداعى ۋاقىتتا يۋنەسكو-نىڭ دۇنيەجۇزىلىك مادەني جانە تابيعي مۇرالار تىزىمىنە قوسۋ ماسەلەسى قاراستىرىلىپ جاتقانى ايتىلعان.
"قۇدىقتىڭ ىشىندە قانداي دا ءبىر زاتتاردىڭ بار-جوعىن انىقتاۋ ءۇشىن ارنايى زەرتتەۋ جۇمىستارى قاجەت، ويتكەنى كەز كەلگەن باسقا ارەكەت تاريحي-مادەني مۇرا وبەكتىسىنىڭ ساقتالۋىنا قاۋىپ ءتوندىرۋى مۇمكىن. مۇنداي جۇمىستاردى تەك ليتسەنزياسى بار مەكەمەلەر جۇرگىزە الادى. باسقا تۇلعالار جاۋاپكەرشىلىككە تارتىلادى", – دەلىنگەن رەسمي حاتتا.
سونىمەن قاتار بالۋانياز مۇسىرەپۇلى كەسەنەسىندەگى قۇدىقتى (بۇرىنعى اتاۋى – قاراعان بوساعا ۇڭگىرى) زەرتتەۋگە دە رۇقسات بەرىلمەگەن. سەبەبى بۇل نىسان دا رەسپۋبليكالىق ماڭىزى بار تاريحي-مادەني ەسكەرتكىشتەر قاتارىنا كىرەدى.
ايتا كەتەيىك، قازىنا ىزدەۋشىنىڭ ايتۋىنشا، 1856 جىلى بۇل جەردە 200 تۇرىكمەن مەن 60 اداي باتىرى اراسىندا قاندى شايقاس بولعان. سول ۇرىستا حالىق باتىرى بالۋانياز مۇسىرەپۇلى قازا تاپقان.
