Elordadaǵy «Nur Astana» meshitiniń ataýy Ábý Nasyr ál-Farabı bolyp ózgertildi. Bul týraly Nur-Sultan qalasy ákimdiginiń saıty habarlady.
Bas múftı Naýryzbaı qajy Taǵanulynyń tóraǵalyǵymen ótken Qazaqstan musylmandary dinı basqarmasynyń Tóralqa májilisinde «Nur Astana» meshitiniń ataýyn ózgertý jónindegi Ǵulamalar keńesinen usynys tústi. QMDB bólim basshylary, oblys ımamdary men Ortalyq apparat qyzmetkerleri meshit ataýynyń ózgerýin qoldap, daýys berdi. Nátıjesinde 15 jyldyq tarıhy bar meshit endigi tańda oıshyl, ǵulama ál-Farabıdyń esimimen atalatyndyǵy týraly sheshim qabyldandy.
"Jaqynda QMDB-da ǵulamalar keńesiniń usynysymen elordamyzǵa talaı jyldar qyzmet etken Nur-Astana meshitiniń ataýyn Ál Farabı babamyzdyń atyna ózgertý jaıynda usynys berilgen bolatyn. Allaǵa sansyz shúkirler bolsyn! Ábý Nasyr Ál Farabı babamyzdyń atyna ózgertý jaıynda sheshim qabyldandy. Jalpy osy elorda tórindegi meshitke babamyzdyń aty berilýi tekten tek emes. Óıtkeni, eń birinshi Ál Farabı degen kezde árbir musylman úshin, árbir qazaq rýhanııatyna ımandylyqty, bilimge degen qushtarlyqty, qanaǵatshylyqty, qarapaıymdylyqty eske túsiredi", - dedi Nur-Sultan qalasynyń Bas ımamy Erbolat Júsipov.
Táýelsizdiktiń 30 jyldyǵyna oraı qabyldanǵan sheshim nátıjesinde búgin resmı túrde burynǵy meshit ataýy jazylǵan taqtaısha alynyp, ornyna Ábý Nasyr ál-Farabı atyndaǵy jańa meshit ataýymen taqtaısha ornatyldy.
"Meshitke ál-Farabıdyń esimin bergende biz eki sebeppen qýandyq. Birinshi — ǵylym, bilim keledi, ál-Farabıdyń aty bizdi jańǵyrtyp turady dep. Ekinshi jaǵdaı, biz endi ál-Farabı atymen álemge tanylamyz, álemdi tanımyz dep. Ál-Farabı biz úshin rýhanı kópir", – deıdi L.N. Gýmılev atyndaǵy EUÝ prorektory, fılologııa ǵylymdarynyń doktory Dıhan Qamzabekuly.
"Ábý Nasyr ál-Farabı degen adam jeti ǵasyr boıy búkil adamzattyń aqyl-oıynyń negizgi tiregi boldy. Osy ıslamnyń pálsapasyn, dúnıetanymyn búkil dúnıejúzine kásibı túrde nasıhattap, jetkizgen Ábý Nasyr ál-Farabı. Sondyqtan ál-Farabıdyń atymen meshittiń atalýy—bul óte tamasha ári oryndy", – dep atap ótti QR Ulttyq ǵylym akademııasynyń akademıgi, professor Ǵarıfolla Esim.
Aıta keteıik, 2005 jyldyń 2 naýryzynda ashylǵan meshit elordanyń Esil aýdanynda ornalasqan. Meshit Katar memleketiniń Ámiri sheıh Hamad bın Halıfa ál-Sánıdyń qaıtarymsyz syı retinde bólgen qarjysyna turǵyzylǵan bolatyn. Ortalyqtyń ashylýyna sol tustaǵy memleket basshysy Nursultan Nazarbaev qatysyp, Qaǵba men Quran beınelengen, súreler túsirilgen japqyshty syıǵa tartty.
"Adyrna" ulttyq portaly
