اقتوبەدە مەشىت ىشىندە قىزعا ءتيىسىپ، ء"بىر رەتتىك نەكە" ۇسىنعان تالعات احمەتوۆ جازالاندى. بۇل تۋرالى اقتوبە قالاسىنىڭ اكىمشىلىك قۇقىق بۇزۋشىلىقتار جونىندەگى مامانداندىرىلعان اۋدانارالىق سوتى مالىمدەدى، دەپ حابارلايدى "ادىرنا".
ءىس اكىمشىلىك قۇقىقبۇزۋشىلىق تۋرالى كودەكستىڭ 449-بابىنىڭ 2-بولىگى بويىنشا قوزعالدى.
سوتتا ت.احمەتوۆتىڭ بۇعان دەيىن دە اكىمشىلىك جاۋاپقا تارتىلعانى، سوعان قاراماستان 24 شىلدە كۇنى ساعات 17:30–دا «نۇر عاسىر» مەشىتىنىڭ كىرە بەرىسىندە، ياعني قوعامدىق ورىندا ءوزى تانىمايتىن قىزعا سەكسۋالدىق سيپاتتاعى ۇسىنىس جاساپ، مازالاعانى تۋرالى ايتىلدى.
ت.احمەتوۆ سوت وتىرىسىندا كىناسىن ءىشىنارا عانا مويىندادى.
"تالعات احمەتوۆ قر اكىمشىلىك قۇقىق بۇزۋشىلىق تۋرالى كودەكسىنىڭ 449-بابىنىڭ 2-بولىگىمەن كىنالى دەپ تانىلسىن، وعان 5 تاۋلىككە اكىمشىلىك قاماققا الۋ جازاسى قولدانىلسىن. اكىمشىلىك قاماققا الۋ مەرزىمى 2025 جىلعى 29 شىلدەدەن باستاپ ەسەپتەلىنسىن", — دەدى سۋديا ا.بيسەنالينا.
ەسكە سالساق، اقتوبە تۇرعىنى ورتالىق مەشىتكە بارىپ، ەسىك الدىندا ءوزىن بوگەپ تۇرعان ەر ادام تۋرالى جازدى. كەيىن بۇل وقيعا كوپشىلىك اراسىندا كەڭ تاراپ، تالقىعا ءتۇستى. اقتوبە وبلىستىق پوليتسيا دەپارتامەنتىنىڭ قىزمەتكەرلەرى جەدەل-ىزدەستىرۋ شارالارىن جۇرگىزدى. ەر ادامنىڭ كىم ەكەنىن انىقتاپ، اكىمشىلىك حاتتاما تولتىردى.
