2021 جىلى 9 قىركۇيەك مەملەكەت باسشىسى قاسىم-جومارت توقاەۆتىڭ تاپسىرماسىمەن اۋعانستان ەلىندەگى قانداستارىمىز اتاجۇرتقا تابان تىرەدى. يگىلىكتى ءىس-شارانى سىرتقى ىستەر مينيسترلىگى مەن «وتانداستار قورى» كەاق بىرلەسىپ ۇيىمداستىردى. «ءار قازاق - مەنىڭ جالعىزىم» دەگەندەي6 قانداستاردىڭ ەلگە كەلۋىنە بارلىق ازاماتتار قولداۋ بىلدىرەدى.
«وزدەرىڭىز بىلەتىندەي «وتانداستار قورى» كەاق جانىنان قۇرىلعان قانداستاردى اقپاراتتىق قولداۋ ورتالىعى 1200-گە جۋىق اۋعانستاندا تۇراتىن قانداستارىمىزدىڭ ءتىزىمىن ازىرلەدى. اتالعان تىزىمگە، بۇرىنعى اۋعان ەلىنەن كوشىپ كەلگەن جانە سول جاقتا تۇراتىن قانداستار مەن بايلانىس ورتالىعىنا حابارلاسقان ازاماتتار ەندى. ءتىزىم سىرتقى ىستەر مينيسترلىگىندە جيناقتالىپ، ودان ءارى كابۋل قالاسىنداعى قازاقستان رەسپۋبليكاسىنىڭ ەلشىلىگىنە جىبەرىلدى. تۋىنداعان كۇردەلى ماسەلەلەردى وڭتايلى شەشۋ ماقساتىندا ەلشىلىكتە ارنايى كوميسسيا قۇرىلىپ، جۇيەلى جۇمىس جۇرگىزۋدە. بۇگىنگى كۇنى 35 قانداسىمىزدىڭ قازاق ەكەنى دالەلدەنىپ، كوميسسيادان قۇجاتتارى رەتتەلىپ، تاريحي وتانىنا امان-ەسەن جەتىپ وتىر. قانداستارىمىزدى الماتى اۋەجايىنان سىرتقى ىستەر مينيسترلىگى، «وتانداستار قورى» كەاق جانە وزگە قۇزىرلى مەكەمە قىزمەتكەرلەرى كۇتىپ الدى»، - دەيدى قوعامنىڭ ۆيتسە-پرەزيدەنتى ماعاۋيا سارباسوۆ.
الداعى ۋاقىتتا دا قانداستاردى ەلگە قايتارۋ جۇمىسى توقتامايدى. ەلشىلىك ىشىنەن قۇرىلعان ارنايى كوميسسيا شەشىمىمەن جىبەرىلگەن قانداستارعا قولداۋ كورسەتۋ جوسپارى قۇرىلىپ، تۇيتكىلدى ماسەلەنى جىلدام شەشۋ جولدارى قاراستىرىلادى.
"ادىرنا" ۇلتتىق پورتالى
