الماتى وبلىسى كەربۇلاق اۋدانىندا باتىر انا 14-ءسابيىن دۇنيەگە اكەلدى. قازاقستاندىقتاردىڭ سانىن مولايتۋدا وزگەلەرگە ۇلگى التىن قۇرساقتى انانىڭ وتباسىنا 2019 جىلى سارىوزەك اۋىلىنان كوپ بالالى ساناتىمەن تۇرعىن ءۇي بەرىلگەن بولاتىن.
سارسەنباي سادۋاقاسوۆ پەن گۇلناز جەڭىسبايقىزىنىڭ شاڭىراق كوتەرگەنىنە بيىل 27 جىل بولعان. بۇگىندە ۇلگىلى شاڭىراق 10 قىز، 4 ۇل تاربيەلەپ وتىر، 3 نەمەرە ءوسىرىپ وتىر.
كەربۇلاق اۋداندىق اكىمدىگىنىڭ مالىمەتىنە سۇيەنسەك، مەكتەپ قابىرعاسىنداعى بەس بالا وقۋ قۇرالدارىمەن، سپورتتىق كيىممەن، مەكتەپ فورماسىمەن تولىق قامتاماسىز ەتىلگەن، ۇشەۋى بالاباقشا جاسىندا. پاندەميا كەزىندە ونلاين وقۋلارىنا قاجەتتى نوۋتبۋك تە مەكتەپتەن بەرىلگەن. قىزى ايجان سپورتتىڭ ەرەجەسىز جەكپە-جەك تۇرىنە قاتىسىپ، جۇلدەلى ورىندارعا يە بولىپ ءجۇر. وتاعاسى سارسەنباي سادۋاقاسوۆ ماشينيست، مەحانيك، دانەكەرلەۋشى سياقتى كاسىپتەردى مەڭگەرگەن. ونىڭ ايتۋىنشا، جىگىتكە جەتى ونەر شىنىن دا ازدىق ەتەدى ەكەن.
- ءومىردىڭ ءمانى دە، ءسانى دە - بالا. دەنساۋلىعىم جەتسە، بالا تۋدان قاشپايمىن. قازاق «بالانى جاستان» دەگەندى بەكەر ايتپاعان. ۇلكەن قىزىم مۇعالىم. «الدىڭعى اربا قايدا بارسا، سوڭعى اربا سوندا جۇرەدى» دەيدى، سوندىقتان الدىڭعى ۇل-قىزداردى جاقسى تاربيەلەسەڭ، سوڭعىلارى سولارعا ەلىكتەپ، ۇلگى ەتىپ وسەدى دەپ ويلايمىن", - دەيدى التىن قۇرساقتى انا گۇلناز جەڭىسبايقىزى.
