تەلەمەديتسينا قارقىندى دامۋدا

2962
Adyrna.kz Telegram
فوتو اشىق اقپارات كوزىنەن الىندى
فوتو اشىق اقپارات كوزىنەن الىندى

تەلەمەديتسينا  - مەديتسينالىق اقپاراتپەن الماسۋ ءۇشىن كومپيۋتەرلىك جانە تەلەكوممۋنيكاتسيالىق تەحنولوگيالاردى پايدالانۋ. الەمنىڭ كوپتەگەن ەلىنە اسەر ەتكەن COVID-19 پاندەمياسى كەزىندە تەلەمەديتسينا دەنساۋلىق ساقتاۋ سالاسىنداعى جاڭا باعىت رەتىندە ايتارلىقتاي دامىدى. سەبەبى قالىڭ جۇرتشىلىق فيزيكالىق بايلانىستاردى شەكتەۋگە تىرىسىپ، تەلەمەديتسينانى پايدالانۋدا. ياعني تەلەمەديتسينا پاتسيەنتتەرگە مەديتسينالىق كەڭسەلەرگە بارماي-اق، دارىگەرلەردەن بارلىق قاجەتتى كەڭەستەر الۋعا مۇمكىندىك بەرەدى. وسىلايشا تەلەمەديتسينا كوروناۆيرۋستىڭ تارالۋىن بولدىرماۋ ءۇشىن ءوز سەپتىگىن تيگىزىپ وتىر.

ماسەلەن، 2020 جىلدىڭ كۇزىندە پاندەميانىڭ ەكىنشى تولقىنى ءورشىپ تۇرعان ۋاقىتتا رەسەي ەلىنىڭ ماسكەۋ قالاسىندا تەلەمەديتسينا ورتالىعى 24/7 رەجيمىندە امبۋلاتوريالىق Covid-پاتسيەنتتەرگە كومەك باعدارلاماسىن اشتى. 2021 جىلدىڭ اقپان ايىنا قاراي ماسكەۋدە وسى پاتسيەنتتەر ءۇشىن كۇنىنە 5 مىڭنان استام كەڭەس وتكىزىلدى، ال ەكىنشى تولقىننىڭ سوڭىندا كونسۋلتاتسيالاردىڭ جالپى سانى 1 ميلليوننان استى. اقش پەن ۇلىبريتانيادا جۇمىس ىستەيتىن ۇندىستاندىق دارىگەرلەر پاتسيەنتتەر مەن ارىپتەستەرىنە تەلەمەديتسينالىق كومەك جەلىلەرىن ىسكە قوسقان ەكەن. ءارتۇرلى ەلدەردىڭ ماماندارى جابىق شەكارالارمەن بولىنگەنىمەن، بۇل تۇرعىدا دا تەلەمەديتسينالىق تەحنولوگيالار حالىقارالىق دەڭگەيدە ءوزارا ارەكەتتەسۋگە كومەكتەسۋدە.

اقش-تا كوپتەگەن سوزىلمالى اۋرۋلارى بار ناۋقاستارعا جوسپارلى كومەك پەن ولاردىڭ جاعدايىن باقىلاۋدى مەيىربيكە قىزمەتكەرلەرى جۇزەگە اسىرادى. بۇل جاعدايدا دا تەلەمەديتسينا وتە ىڭعايلى قۇرال بولدى. مەيىربيكە ءىسى سالاسىنداعى كلينيكالىق زەرتتەۋلەرگە ارنالعان رەتسەنزيالانعان جۋرنال - Western Journal of  Nursing Research-دا ەكىنشى ءتيپتى قانت ديابەتى جانە گيپەرتەنزياسى بار پاتسيەنتتەرگە مەيىربيكەلىك كەڭەس بەرۋگە ارنالعان  ماقالا جاريالاندى. پاندەميا كەزىندە ۇيدە ەمدەلۋشىلەردىڭ قاشىقتان كەڭەس الۋ سانى دارىگەرگە كلاسسيكالىق كۇندىزگى ساپارلارمەن سالىستىرعاندا ەكى ەسە ارتقانى بەلگىلى بولدى.

بۇكىل الەم بويىنشا تەلەمەديتسيناعا ينۆەستيتسيالار 2020 جىلدىڭ ءبىرىنشى توقسانىندا وتكەن جىلدىڭ سايكەس كەزەڭىمەن سالىستىرعاندا 3,6 ەسە — $220 ملن-عا قاراعاندا $788 ملن-عا دەيىن ۇلعايدى. Veb Ventures ينۆەستيتسيالىق قورىنىڭ ساراپشىلارى  2026 جىلعا قاراي الەمدىك تەلەمەديتسينا نارىعى $45 ملرد-تان $175 ملرد-قا دەيىن وسەدى، ورتاشا ءوسىم جىلىنا 19,3% - دى قۇرايدى دەپ بولجاۋدا.

وسى جاعدايلارعا بايلانىستى تەلەمەديتسينا  2021 جىلعى سەرپىندى مەديتسينالىق يننوۆاتسيا سانالادى. قازىرگى ۋاقىتتا تەلەمەديتسينانىڭ جاڭا دەڭگەيگە شىعۋىنا مۇمكىندىك بەرەتىن جاڭا باعدارلامالار پايدا بولادى دەپ كۇتىلۋدە.

ناعيما ساحان

پىكىرلەر