كوروناۆيرۋستان قايتىس بولعاندار ەلدە ءۇش-ءتورت ەسەگە كوبەيدى. دارىگەرلەردى اسىرەسە ناۋقاستاردىڭ تىم "جاسارىپ" بارا جاتقانى الاڭداتىپ وتىر، دەپ حابارلادى كتك.
ويتكەنى مارقۇمداردىڭ اراسىندا قازىر قىرىققا دا تولماعان جاستار كوپ. ىندەتكە قارسى تۇرۋدىڭ جالعىز امالى – ۆاكتسينا. مۇنى دارىگەرلەر كۇندە ايتۋدان جالىققان ەمەس.
الماتىداعى ءمايىتحانانىڭ ىشىنە كىرگەن جۋرناليستەر كوروناۆيرۋستان كوز جۇمعانداردى جەرلەۋ ءراسىمى قالاي اتقارىلىپ جاتقانىن كوردى.
دالىزدە ءولى تىنىشتىق. ويتكەنى دارىگەرلەردىڭ بارلىعى مايىتتەرمەن جۇمىس ىستەپ جاتىر.
پاتولوگواناتوم ازامات بەيسەنوۆتىڭ ءمايىتحانادا كوروناۆيرۋستىڭ مارقۇمنىڭ اعزاسىنا قالاي جۇعىپ، قالاي تاراعانىن انىقتايدى. اتاپ ايتقاندا، جاسىل قۇتىلاردى تەكسەرەدى. وندا ىندەتتەن ولگەن ادامداردىڭ جۇرەك، وكپە، باۋىر-بۇيەگىنىڭ بولشەكتەرى جاتىر. ولار ەندى قاۋىپسىز. ويتكەنى زالالسىزداندىرىلعان.
"كوروناۆيرۋستان قايتىس بولىپ جاتقان ادامدار "جاسارىپ" بارا جاتىر. سونىڭ ءوزى دەنەڭدى تۇرشىكتىرەتىن جاعداي. اشىپ قاراعاندا، ءبىرىنشى وكپەسىندەگى وزگەرىستى كورەمىز. اۋاعا تولىپ تۇراتىن وكپە قاتايىپ قالادى. بىزگە جانى قينالىپ ولگەن ادامدار كەلەدى", - دەيدى ازامات بەيسەنوۆ.
سوڭعى ايداعى جاعداي اسحات قوستاەۆتى دا شوشىندىرعان. كور قازاتىن جىگىت زيراتتىڭ جاستارعا تولعانىن ايتادى. كۇندىز عانا ەمەس، تۇندە دە قولدان كۇرەك تۇسپەيتىن بولدى دەيدى.
"ۇلگەرمەي قالاتىن كەزدەر دە بولادى. قازىر ورتاشا ەسەپپەن كۇنىنە كوۆيدتەن كوز جۇمعان 4-5 ادامدى جەرلەپ جاتىرمىز. قابىردىڭ ءىشى حلورلانادى. ۆاكتسينانى ءوزىمىز ءۇشىن سالدىردىق. ويتكەنى كوبىنەسە ىندەتتەن قايتىس بولعان كىسىلەر جەرلەنەدى", - دەيدى كور قازۋشى اسحات قوستاەۆ.
تۋعان-تۋىستىڭ كوز جاسىنا كۇندە كۋا ءمايىتحانا باسشىسى حالىقتى جاپپاي ەكپە سالدىرۋعا شاقىردى.
"ادامدار ۆاكتسينا سالدىرماي جاتىر. مەن ونىمەن كەلىسپەيمىن. سەبەبى ەكپەنىڭ قورعانىش اسەرى دالەلدەنگەن. مىسالى، ءبىزدىڭ مەكەمەدە 120 قىزمەتكەر جۇمىس ىستەيدى. 100 پايىز ەكپە سالدىردى. ءبىز كوروناۆيرۋستان قايتىس بولعان مايىتتەردى سويامىز. بىزدە جۇقتىرۋ قاۋپى وتە جوعارى. بىراق سوعان قاراماستان، بىردە-ءبىر قىزمەتكەر اۋىرعان جوق. سوندىقتان حالىقتى كەيىنگە قالدىرماي، ەكپە سالدىرۋعا شاقىرامىن", - دەيدى الماتى قالاسى پاتولوگواناتوميالىق بيۋرو ديرەكتورىنىڭ مىندەتىن اتقارۋشى ەرجان قۇتتىعوجين.
ال ءولىم-ءجىتىمنىڭ كوبەيۋىنە قاراپايىم ساقتىق شارالارىنىڭ ساقتالماۋى سەبەپ. كوپشىلىك تىيىمعا قاراماستان توي-ساداقاعا بارادى. اۋرۋدىڭ ءدال سول كوپشىلىك جەردە جۇعىپ جاتقانىن بەلگىلى ۆيرۋسولوگ جاناي اقانوۆ تا ايتىپ وتىر.
"كوبىنە سانيتارلىق تالاپتاردىڭ ساقتالماۋى سەبەپ. ەشكىمنىڭ بەتپەردە كيگىسى جوق. توي-تومالاق تا ءوتىپ جاتىر. وعان قوسا ۆاكتسيناعا قارسى شىعۋشىلار كوبەيدى. اسىرەسە وڭتۇستىك ايماقتا ءورشىپ تۇر. ولار دارىگەرلەردىڭ جۇمىسىن ودان سايىن قيىنداتىپ جاتىر. ويتكەنى جاڭا ناۋقاستار كۇن ساناپ كەلىپ تۇسۋدە. بۇلاي جالعاسا بەرسە، توسەك ورىن دا، ءدارى دە جەتىسپەيدى", - دەيدى ول.
ەسىگىنەن ءمايىت ۇزىلمەگەن مەكەمە باسشىسى كۇشەيە تۇسكەن ىندەت جاس-كارىنى اجىراتىپ جاتقان جوق دەيدى. ءبارىنىڭ ءولىم سەبەبى ءبىر – وتتەگى جەتىسپەي تىنىسى تارىلادى.
