بىزدە باتىس قوعامىن "ازعان - توزعان", "ولار كەرى كەتكەن" دەپ سانايتىن ادامدار وتە كوپ ەكەن. بىراق اقىرىنداپ باجايلاپ وتىرىپ، باتىس قوعامىندا بالا اسىراپ الۋدىڭ كوپ ەكەن بايقادىم. ولار ءتىپتى شەتەلدەن كەلىپ، ءبىزدىڭ اۋرۋ - سىرقاۋ بالالارىمىزدى الىپ كەتەدى. ماپەلەپ ءوسىرىپ، ادام قاتارىنا قوسىپ جاتىر.
ال ولاردىڭ انا انجەلينا دجولي سياقتى تانىمال جۇلدىزدارى ءار ناسىلدەن بالا الىپ، ولاردى اسىراپ، باعىپ-قاعىپ ءوز حالقىنا كۇشتى ونەگە كورسەتىپ وتىر. ەندى وسى باتىستىڭ، ادامزاتتىڭ دامۋىنا ۇلەس قوسىپ كەرەمەت جەتىستىككە جەتكەن دارىندى تۇلعالارى، اتاقتى بايلارى، كينو-مۋزىكا جۇلدىزدارى، سپورتشىلارى مىندەتتى تۇردە ءبىر-ءبىر قايىرىمدىلىق قورلارىنا مۇشە بولىپ، وزدەرىنىڭ تاپقان تابىستارىن قايىرىمدىلىق شارالارىنا ميلليونداپ شاشادى ەكەن. بيلل گەيتس، ستيۆ دجوبس، يلون ماسك....
بيلل گەيتس ءتىپتى ءوزىنىڭ بار تاپقان-تايانعانىن قايىرىمدىلىق قورىنا اۋدارماق بولىپ بەكىنگەن ادام. مەنىڭشە، بۇلار بۇل ءفاني جالعاننىڭ شىن ءمان ماعىناسىن تۇسىنگەن جاندار. "افريكا مۇگەدەك بالالارىن قولداۋ ۇيىمى", "مۇقتاج جانداردى قورعاۋ ۇيىمى",
"سپيد اۋرۋىنا قارسى قور".... تاعىسىن تاعى...
بۇنداي نارسە ولاردا قالىپتى جاعداي.
ەگەر ءسىز باتىستا قانداي دا ءبىر جەتىستىككە جەتكەن تانىمال ادام بولساڭىز، سونداي جۇلدىز، باي-قۋاتتى ادام بولا تۇرا، قايىرىمدىلىق قورلارىنا مۇشە بولماساڭىز، ول و جاقتا ۇياتتى جاعداي. ال ەندى ءبىزدىڭ ادامدار بالالار ۇيىنەن بالا الماق تۇگەل، ونىڭ ماڭىنا جولامايتىن بولۋ كەرەك. بىزدەگى شەتەلگە بالا بەرۋگە قارسى بولىپ، ء"بىز بالاسىن جىلاتپاعان، سىرتقا قاڭعىرتپاعان حالىقپىز" دەپ سۇڭقۇلداپ جۇرگەن كىسىلەردەن وزدەرىنىڭ جەتىمدەر ۇيىنەن نەشە بالا اسىراپ العانىن سۇراساڭىز، ولار وعان جاۋاپ بەرە المايدى.
مەن ءتىپتى بىلاي ايتايىن. بىزدىڭ قوعامدا قازىر نە كوپ، العاشقى نەكەدەن جولى بولماي بالاسىمەن اجىراسىپ، بالالارىمەن ەكىنشى قايتا باعىن سىناپ جۇرگەن قىز-كەلىنشەكتەرىمىز وتە كوپ. ولار دا بۇل جالعاندا باقىتتى بولۋعا قۇقىلى. ولار دا بىرەۋدىڭ ماپەلەپ وسىرگەن قىزى، انا، جار. وكىنىشكە قاراي، ءبىزدىڭ ادامدار جەتىمدەر ۇيىنەن بالا اسىراماق تۇگەلى، سول وزدەرى ۇناتقان، بۇرىن تۇرمىستان شىققان كەلىنشەكتەردىڭ سوڭىنان ەرگەن قارادومالاق قاراكوزدەردى دە "پريتسەپ" رەتىندە قاراستىرىپ، ولاردى قوش كورمەيدى. ول جاسىرىن نارسە ەمەس. "وزىڭنەن تۋماي ۇل بولماس" دەپ شانيەدى.
"ەسىك كورگەندى ەمەس، بەسىك كورگەندى ال" دەپ تاعى تاقىلدايدى. ال ەندى انا ءبىزدىڭ ۇرلىقپەن بايىپ العان باي-شونجارلارىمىز ءوز تاپقان-تايانعانىنا الەمنىڭ ۆيللا، ياحتالارىن ساتىپ الۋدان باسقا بىلەرى جوق. تايراڭداپ ياحتالارىندا بيلەپ ءجۇر. توقالدان توقال الىپ، شەتەلگە اسىرىپ جاتىر. بۇ كەزدە، ءوز قانداستارى، ياعني شىن مۇقتاج جاندار، بالالارىن شۇبىرتىپ اكىمشىلىك عيماراتتارىن شابۋىلداپ جاعداي سۇراپ ءجۇر. ولارعا انا ءبىزدىڭ شىنجىربالاق شۇبار ءتوس باي - شونجارلاردىڭ، كورشى مەملەكەتتىڭ تىلىندە "زاچەم روجات ستولكو" دەپ نەمەسە "سامي رابوتات نە حوتيات، لەنتياي، حالياۆۋ ليۋبيات" دەپ بۇل ومىردە قىسقا ءجىبى كۇرمەۋگە كەلمەي ءوز ومىرىندە ساتسىزدىككە ۇشىراپ، شاقشا باسى شاراداي بولعان ءوز حالقىنا جيىركەنە قاراپ وتىرعانىنا مەن ءجۇز پايىز سەنىمدىمىن.
مەن ءتىپتى مىنانى ايتايىن: بىزدە قۇربان ايت بولعاندا ارنايى جەرلەر اشىلىپ قوي اتاۋلى قىرىلىپ سويىلادى ەكەن. سوندا ول سويىلعان قويلاردىڭ ەتىن اركىم ءوز ۇيىنە الىپ كەتەدى-ءمىس. ەشكىم ەشكىمگە تۇك ۇستاتپايدى ەكەن. سول ماڭدا ءموليىپ تۇراتىن مۇقتاج جاندارمەن ەت بولىسەتىن ادامدار بىزدە ىلۋدە بىرەۋ ەكەن. بىلەتىندەر سولاي دەيدى. وسىنداي ناقتى مىسالدارمەن ءبىزدىڭ باتىس قوعامىنان سونشالىقتى كەنجەلەپ ارتتا قالىپ، سونشالىقتى جەتىلمەگەندىگىمىزدى دالەلدەپ شىعۋعا بولادى.
مەن قايتا بۇنىڭ بەر جاعىن عانا قوزعاپ وتىرمىن. سوندىقتان، بار جاعىنان سول باتىستىڭ شاڭىنا دا ىلەسە الماي ءجۇرىپ "باتىس انداي، باتىس مىنداي" دەگەن ءبىزدىڭ ءسوز - وتتاعان ءسوز.
