سۋرەت تيمۋر بەكتۇردىڭ Facebook پاراقشاسىنان الىندى
بىزدە مەملەكەتتىك دەڭگەيدە تەك قانا “كىتاپ وقى”، “دومبىرا تارت”، “سالت-ءداستۇر” دەگەن سياقتى اڭگىمەلەر عانا قازاقشا حابارلانادى. ال وتە جوعارى تەحنولوگيا، جي، كيبەر قاۋىپسىزدىك، تاعىسىن-تاعى مالىمەتتەردىڭ دەنى ورىسشا تاراتىلادى.
2011 جىلدان بەرى ءىت تاقىرىپتى مەملەكەتتىك تىلدە قاۋزاپ كەلە جاتقان ادام رەتىندە وسى جاعداي كوپ جاعدايدا رەنجىتەدى. ءتيىستى ۆەدومستۆولار مەن مەكەمەلەرگە بۇل تۋرالى شاعىم ايتسام، نە ەستيتىنىمدى بىلگىلەرىڭىز كەلە مە؟ “سەنىڭ قازاق اۋديتورياڭا بۇل تاقىرىپ قىزىق ەمەس. ولار ءبارىبىر مۇنداي شارالارعا قاتىسپايدى. ولارعا باسقا تاقىرىپ قىزىق” دەيدى.
“ولارعا باسقا تاقىرىپ قىزىق” دەگەندە قانداي تاقىرىپتى مەڭزەپ تۇرعانىن ايتپاسام دا بىلەتىن شىعارسىزدار؟
20.000.000 قازاقتىڭ ىشىنەن تەحنولوگيا مەن جي سالاسىن ناسيحاتتاپ جۇرگەن مەن سياقتى 20 ادامدى تاپساق، كانى؟
ال مەنىڭ ءۋاجىم “قازاق اۋديتورياسىنا جۇيەلى تۇردە قازاقشا كوممۋنيكاتسيا جاسالماعان تاقىرىپقا، ارينە، قىزىعۋشىلىق از بولادى. قۇر تاقىرىبى مەن انونسى عانا قازاقشا، ال تۇگەل شاراسى مەن زاتى ورىسشا وتەتىن جەردە ناعىز قازاقتار قالاي جۇرەدى، قالاي تارتىلادى؟” دەيمىن.
ەلىمىزدىڭ تاۋەلسىزدىك العانىنا بيىل 35 جىل تولادى. مەنىڭ ءىت سالاسىن ناسيحاتتاپ، دارىپتەپ كەلە جاتقانىما 15 جىل بولادى. رەسپۋبليكالىق دەڭگەيدە تەك قانا قازاقشا، تەك قازاقتار جينالعان ءىت فورۋم وتكەنىن كورمەپپىن استانادا. مەنىڭ بۇل سوزىمە “انا جەردە اناداي ءوتتى، مىنا جەردە مىناداي ءوتتى” دەپ بىرەۋلەر ءۋاج كەلتىرۋى مۇمكىن. بىراق يتكە سۇيەك لاقتىرعانداي، از عانا ورتانىڭ كەزدەسۋلەرىن ەمەس، Google-دەن، Amazon-نان، OpenAI مەن ءىرى-ءىرى تەحنولوگيالىق ليدەر كومپانيالاردىڭ باسشىلارىن جيناعان شىنايى كەزدەسۋلەردى ايتىپ وتىرمىن.
مەن ءۇشىن بۇل وتە ەموتسيونالدىق تريگگەر بەرەتىن، اشۋلاندىراتىن، رەنجىتەتىن، قاپالاندىراتىن جاعداي. بۇل ماعان “قازاق اۋديتورياسى بۇل تاقىرىپقا، مۇنداي دەڭگەيدەگى جيىنعا لايىقتى ەمەس” دەگەن نارراتيۆ پەن مەسسەدجدى بەرەدى. الايدا، فريدوم بولسىن، كاسپي بولسىن، ءتىپتى OpenAI-دىڭ ءوزى بولسىن وسى قازاقتىڭ اقشاسىنا بايىپ، وسى قازاقتىڭ تيىنىمەن كۇن كورىپ وتىر.
وسىلاردىڭ باسى-قاسىندا جۇرگەندەرگە بىردەڭە دەسەم، “ساعان نە جەتپەيدى؟” دەيدى. ماعان ءبارى جەتەدى. اڭگىمە مەندە ەمەس. ماسەلە، قر پرەزيدەنتىنىڭ “قازاقستان رەسپۋبليكاسىن 2029 جىلعا دەيىن تسيفرلىق مەملەكەتكە اينالدىرۋ” دەگەن ماقساتىنىڭ ىشىندە قازاق حالقىنىڭ، قازاق جاستارىنىڭ، قازاق ءتىلىنىڭ دە بولعانىن قالايمىن!
