الماتىدا «ەلگە كومەك» قايىرىمدىلىق قورىنىڭ باسشىسى، ءوزىن «قازاقتىڭ روبين گۋدى» دەپ اتاعان ءىلياس ساريەۆ پەن اقتوتى دۇيسەەۆانىڭ ىسىنە قاتىستى سوت پروتسەسى جالعاسىپ جاتىر، دەپ حابارلايدى "ادىرنا" ۇلتتىق پورتالى قازاقپاراتقا سىلتەپ.
وتىرىستا ءۇش جابىرلەنۋشى ءوز وقيعالارىن بايانداعان. ولاردىڭ ءبىرى ايمان كەنجەتايقىزى 2025 جىلعى 4 ناۋرىزدا ساريەۆتەن ءۇش جاسار قىزىنىڭ ەمىنە قاراجات جيناۋعا كومەك سۇراعانىن ايتتى. ونىڭ سوزىنشە، ايىپتالۋشى العاشقى كۇندەرى بەلسەندىلىك تانىتقانىمەن، كەيىن ءتۇرلى سىلتاۋمەن 750 مىڭ تەڭگەنى يەمدەنىپ، اقشانى ءوزىنىڭ قارىزىن جابۋعا جۇمساعان.
ال ەكىنشى جابىرلەنۋشى ۆەنەرا سۇلتانقىزى قىزىنىڭ ەمى ءۇشىن ساريەۆكە سەنىپ، بارلىعى 1 ملن 430 مىڭ تەڭگە اۋدارعانىن جەتكىزدى. ول «قور باسشىسى ءبىر ايدا قاجەتتى سومانى جيناپ بەرەمىن» دەپ ۋادە ەتكەنىمەن، اقشا دا قايتارىلماعانىن، ۆيدەو ءتۇسىرىلىمى دە ىسكە اسپاعانىن مالىمدەدى.
ءۇشىنشى جابىرلەنۋشى ءامىروۆا «MM Travel» تۋريستىك كومپانياسى ارقىلى 500 مىڭ تەڭگەگە ۋمراعا جولداما راسىمدەگەنىن ايتتى. ول قارجىنى دۇيسەەۆا مەن ونىڭ سەرىكتەستەرىنە اۋدارعانىمەن، ساپار جۇزەگە اسپاعان.
ايىپتالۋشىلارعا قاتىستى سوت پروتسەسى 25 قىركۇيەكتە جالعاسادى.
ەسكە سالساق، ءساۋىر ايىندا ءىلياس ساريەۆ الاياقتىق جاسادى دەگەن كۇدىكپەن ۇستالىپ، كەيىننەن الماتى سوتىندا «ەلگە كومەك» قورىنىڭ ءىسى قارالا باستاعان ەدى. مەملەكەتتىك ايىپتاۋشى بۇل ءىستى الاياقتىق دەرەگى رەتىندە سيپاتتادى.
