مۇحامەدجان تازابەكتى پرەزيدەنت رەتىندە كورگىسى كەلەتىندەر پايدا بولىپتى. Hanafi Kazakh دەگەن اتپەن الەۋمەتتىك جەلى قولدانۋشى فەيسبۋكتاعى ءجۇز مىڭداعان وقىرمانى بار توپتارعا «م.تازابەكوۆ بولاشاق پرەزيدەنت» دەگەن سيپاتتاعى پىكىرىن توقتاۋسىز تاراتۋدا.
«مۇحامەدجان تازابەك پرەزيدەنت بولۋعا لايىق تۇلعا قولدايىق اعايىن! مۇحامەدجان تازابەك ەلدىڭ تىنىشتىعى مەن بەرەكەسىن ويلادى. شىنىمەن نامازدى ادام ءوزى ءۇشىن وقيدى. يسلام دەگەن باسشىعا قارسى شىقپايتىن، جاپون سياقتى قۇدايسىز ەلدەر سياقتى توڭكەرىس جاساۋعا تيىم سالاتىن ءدىن. دۇنيە ءۇشىن باسقا ءۇشىن پاتشاعا قارسى شىققاندارعا توقتاۋ سالاتىن ءدىن يسلام. سوندىقتان مۇحاڭ سالىستىرمالى تۇردە مىسال كەلتىرسە وعان ورە تۇرەگەلۋ ابەستىك. مۇمكىن نامازداعى مۇسىلماندى ميلليونداعان ادامنىڭ تولقىنىندا تاپتالىپ قالماسىن دەپ پوليتسەي تەپسە تەپكەن شىعار، ءبارى دە ادامداردىڭ تىنىشتىعى ءۇشىن ەڭبەك ەتىپ ءجۇر. سونداي-اق، مۇحامەدجان تازابەكتىڭ شەندىلەر الدىندا شەشىلە سويلەگەنىن «سولداتتار مەن پوليتسياعا دۋحى جەتكەن ادام عانا ۋاعىز ايتا الادى»، - دەپ جازدى Hanafi Kazakh.
بۇل جازباعا قاتىستى استىندا شۇبىرعان پىكىرلەر دە نازارىمىزدان تىس قالمادى. وكىنىشكە قاراي، ءۇش جۇزدەن اساتىن پىكىردىڭ باسىم بولىگى م.تازابەكوۆتى «حالىقتىڭ جاۋى» سانايتىنىن اشىق جازعان. ءبىردى، ەكىلىسى عانا قازاقستاننىڭ يسلام مەملەكەتىنە اينالىپ، ەلدى يماندى تۇلعا باسقارۋىن قالايتىنىن ءبىلدىرىپتى.
جالپى، الەۋمەتتىك جەلى قازاق قوعامىندا دا بەلگىلى ءبىر كۇشكە يەلەنىپ كەلەدى. ەستەرىڭىزدە بولسا، فەيسبۋك الەۋمەتتىك جەلىسى ارقىلى كوپتەگەن پروبلەمالار شەشىلگەن ەدى. سونىمەن قاتار، الەۋمەتتىك جەلى كەيبىر تانىمال تۇلعالاردىڭ جۇلدىزىن جارقىراتسا، ەندى كەيبىرىنىڭ باعىن باسىنان ۇشىرعان كەزدەر دە از بولمادى. نەگىزىنەن الەۋمەتتىك جەلىدە فەيكتەردىڭ دە ۇلەسى از ەمەس. ءبىز ءسوز ەتكەلى وتىرعان Hanafi Kazakh دەگەننىڭ ناقتى كىم ەكەنى بەلگىسىز. الايدا فەيك اككاۋنتپەن ءوزىنىڭ ىشكى نيەتىن جۇزەگە اسىرۋعا جانتالاساتىن شىنايى ادامداردى دا جوققا شىعارۋعا بولماس. سونىمەن بۇل حانافي قازاق دەگەن كىم؟
پاراقشاسىن ەرىنبەي، ءسۇزىپ قاراپ شىقتىق. تەك قانا ءدىني ۋاعىزدار مەن ءدىني اقپاراتتار جاريالايتىن ادام ەكەن. سونىمەن قاتار ونىڭ تازابەكوۆتىڭ فاناتى ەكەنىن جازبالارىنان انىق اڭعارۋ قيىن ەمەس. سوعان قاراعاندا، تازابەكوۆپەن ۇندەس ادام بولۋى، تازابەكوۆتى ءپىر تۇتاتىن ادام سياقتى. ونىسى ءۇشىن جانە ءدىني پايىمى ءۇشىن ونى ايىپتاۋ اقىلعا سىيماس. الايدا قازاقستاننىڭ زايىرلى ەل ەكەنىن زاڭ جۇزىندە ەسكەرسەك، حانافي قازاق سەكىلدىلەردىڭ الەۋمەتتىك جەلىدە دىنگە شاقىرىپ، ۋاعىز جۇرگىزۋى، ءوز ءدىنىن وزگەلەرگە تىقپالاۋى قانشالىقتى زاڭدى دەگەن سۇراق تۋىندايدى.
ەلدىڭ قىتىعىنا تيەتىن مىناداي ۇسىنىسىن ءجۇز مىڭداعان ادامنىڭ ورتاسىندا جازۋ نەنى بىلدىرەدى؟ نە بۇل ادام تازابەكتىڭ تازا دۇشپانى، نە بولماسا، تازابەكتىڭ اينالاسىنداعى ءبىر ادام بولۋى مۇمكىن. دۇشپانى دەپ نەنى مەڭزەدىك؟ مۇحامەدجان تازابەككە «كوپشىك قويا» وتىرىپ، جۇرتتىڭ الدىندا ارمەن قاراي بەدەلىن ءتۇسىرۋ نيەتى جاتۋى مۇمكىن بۇل ادامنىڭ. سونىمەن قاتار، پرەزيدەنتتىككە دامەلى كەيبىر كىسىلەردى تازابەككە ايداپ سالۋ ارەكەتى دە بولۋى ابدەن مۇمكىن. ال ەگەر، تازابەكتىڭ ءوز ادامدارىنان بولسا، وندا بۇل جازبانىڭ اۆتورىن وماقاسا قۇلادى دەۋگە بولادى. ويتكەنى، فەيكتىڭ جازباسىن جالاۋلاتىپ، قولداۋ كورسەتكەندەر وتە از جانە كەرىسىنشە تازابەكتىڭ ادرەسىنە اۋىر سوزدەر ايتىلىپتى. ەگەر بۇل جازبادان م.تازابەكتىڭ ءوزى حابارسىز بولسا، وتە وبال بولعان سياقتى. بەكەرگە جۇرتتىڭ جامان ءسوزىنىڭ استىندا اتى اتالىپ، جاعىمسىز وبرازى سومدالۋدا.
مەرۋەرت حۋساينوۆا،
«ادىرنا» ۇلتتىق پورتالى.
فوتو اشىق دەرەككوزدەن الىندى.
