وزبەكستان مۇسىلماندارى ءدىني باسقارماسى يمامداردىڭ الەۋمەتتىك جەلىدە سويلەۋىنە شەكتەۋ قويدى، دەپ حابارلايدى “ادىرنا” ۇلتتىق پورتالى.
27 مامىردا وزبەكستانداعى بارلىق مەشىت يمامدارىنا الەۋمەتتىك جەلىلەرگە كىرمەۋ جانە الەۋمەتتىك جەلىدەگى جازبالارعا «لايك» باسپاۋ تۋرالى ەسكەرتۋ بەرىلدى.
تاشكەنت قالاسىنىڭ باس يمامىنىڭ كومەكشىسى ەرگاش رۋستاموۆتىڭ Telegram ارقىلى اۋدانداردىڭ باس يمامدارىنا جولداعان اۋديو حابارلاماسىندا الەۋمەتتىك جەلىدەگى سوزدەردى قاتاڭ باقىلاۋ تۋرالى ايتىلعان.
«سالەمەتسىزدەر مە، قۇرمەتتى وبلىستىڭ باس يمامدارى. ەندىگى مىندەتىمىز – الەۋمەتتىك جەلىگە كىرمەۋ. ءبىز مۇنى قاتاڭ باقىلاۋعا الامىز. بۇل قاجىلىق پارىزىن وتەيتىندەرگە دە قاتىستى. الەۋمەتتىك جەلىدەگى كەز كەلگەن تاقىرىپقا كەرى بايلانىس بەرۋگە بولمايدى»، - دەدى رۋستاموۆ.
يمامدار ءدىني باسقارمانىڭ بۇل شەشىمىن ولاردىڭ قىزمەتىنە مەملەكەتتىك باقىلاۋدى كۇشەيتۋ دەپ ءتۇسىندى.
قاۋىپسىزدىك ماقساتىندا اتى-ءجونىن اتاماۋدى قالاعان تاشكەنت يمامى يمامداردىڭ ينتەرنەتكە شىعۋىنا شەكتەۋ قويۋ ار-وجدان بوستاندىعى تۋرالى زاڭعا قايشى كەلەدى دەيدى.
«بۇل ءمۇفتيدىڭ بۇيرىعى دەيدى. بىراق بۇل ءبىزدىڭ قول-اياعىمىزدى بايلاپ قويادى»، – دەيدى تاشكەنتتىك يمام.
سوڭعى ۋاقىتتا بىرقاتار يمامدار ءدىني باسقارمانىڭ پايىمداۋىنشا، رۋحاني دەڭگەيىنە ساي كەلمەگەندىكتەن قىزمەتتەرىنەن شەتتەتىلدى.
بۇعان دەيىن حابارلاعانىمىزداي، وزبەكستاندا مەشىت يمامدارى مەن نايب يمامدارىنان شەتەلدىك تولقۇجاتتارىن ەلدەگى مۇسىلماندار ءدىني باسقارماسىنىڭ جەرگىلىكتى وكىلدەرىنە تاپسىرۋ سۇرالعان. سەبەبى، يمامداردىڭ شەتەلگە شىعۋىنا جول بەرمەۋ كوزدەلگەن.
«سوڭعى كۇندەرى يمامدار قاتتى قىسىمعا ۇشىرادى، سوندىقتان بيلىك كەيبىر يمامدار ەلدەن كەتىپ قالادى دەپ قورقادى»، - دەدى «ازاتتىق» (وزودليك) راديوسىنىڭ وزبەك قىزمەتىنىڭ سۇحباتتاستارىنىڭ ءبىرى.
وزبەكستان مينيسترلەر كابينەتى جانىنداعى ءدىن ىستەرى جونىندەگى كوميتەتتىڭ مالىمەتى بويىنشا، 2021 جىلدىڭ 1 تامىزىنداعى جاعداي بويىنشا ەلدە 16 كونفەسسيانىڭ 2285 ءدىني ۇيىمى جۇمىس ىستەيدى. ونىڭ 2098-ءى يسلامدىق ۇيىم بولسا، 188-ءى باسقا ءدىني اعىمدارعا جاتادى.
وزبەكستان كونستيتۋتسياسىنا سايكەس ءدىن مەملەكەتتەن بولىنگەن. ءدىني ۇيىمدار مەن كونفەسسيالاردىڭ قىزمەتى وزبەكستان رەسپۋبليكاسىنىڭ «ار-وجدان بوستاندىعى جانە ءدىني ۇيىمدار تۋرالى» زاڭىمەن رەتتەلەدى.
