سارسەنبى كۇنگى جولدانعان دىنگە قاتىستى دەپۋتاتتىق ساۋالدارعا قمدب جاۋاپ بەردى. ولار قازىرگى تاڭداعى ءدىني احۋالعا قاتىستى ستاتيستيكالىق مالىمدەمە جاسادى، دەپ حابارلايدى "ادىرنا" پورتالى. بۇل تۋرالى Facebook جەلىسىندە قمدب ءباسپاسوز حاتشىسى اعابەك قوناربايۇلى جازدى.
ءدىني باسقارما دەپۋتاتتىق ساۋال جولداعان دەپۋتاتتاردىڭ نەگىز قويعان ماسەلەلەرى قاراۋدا ەكەنىن مالىمدەدى. جىل باسىنان بەرى ءمۇفتيات بەس باعىت بويىنشا جۇمىستارعا باسىمدىق بەرەتىنىن جاريالادى. ولار – ءدىن مەن ءداستۇر، ىزگى قوعام، يحسان جانە ناسيحات، ءدىني وقۋ-اعارتۋ، جات ءدىني اعىمداردان ساقتاندىرۋ.
ءار باعىت بويىنشا جاسالىپ جاتقان جۇمىستاردىڭ ساندىق ناتيجەسىمەن ءبولىستى ول.
سونىڭ ىشىندە جات ءدىني اعىمداردان ساقتاندىرۋ باعىتى بويىنشا ءتۇرلى شارالاردىڭ جۇزەگە اسىپ جاتقانىن جازدى:
"جات ءدىني اعىمداردان ساقتاندىرۋ باعىتى. جاستاردى دەسترۋكتيۆتى ءدىني اعىمداردىڭ تەرىس يدەولوگياسىنان ساقتاندىرۋ – قازاقستان مۇسىلماندارى ءدىني باسقارماسىنىڭ نەگىزگى جۇمىس باعىتتارىنىڭ ءبىرى. بۇل – بارلىق مۇفتيدەن بەرى جالعاسىپ كەلە جاتقان اسىل مىندەت. ءمۇفتياتتىڭ ءدىني وڭالتۋعا جاۋاپتى ماماندارى وتكەن جىلى قوعامدىق ورىندار مەن تۇزەۋ مەكەمەلەرىندە 9928 جەكە ىقپال ەتۋ اكتسيالارىن (جەكە كەزدەسۋلەر) جۇزەگە اسىردى. جۇمىس ناتيجەسىندە جالپى 1477 ادامعا وڭ ىقپال جاسالدى. اتاپ ايتقاندا، 773 ادام قازاقستاندىق قوعام قۇندىلىقتارىنا بەيىمدەلدى جانە 704 ادام دەسترۋكتيۆتى ءدىني اعىم يدەولوگياسىنان باس تارتتى" دەلىنگەن مالىمدەمەدە.
