قازاقستاندا ءدىني سالانى زاڭنامالىق قامتاماسىز ەتۋ بويىنشا قولعا الىنىپ جاتقان شارالار قاتارىندا بەتتى بۇركەمەلەيتىن كيىم كيۋگە شەكتەۋ ەنگىزىلۋى مۇمكىن. بۇل جايلى ۇكىمەت باسشىسى ءاليحان سمايىلوۆتىڭ ءماجىلىس دەپۋتاتتارىنىڭ ساۋالىنا بەرگەن جاۋابىندا ايتىلعان، دەپ حابارلايدى "ادىرنا" پورتالى inbusiness.kz سايتىنا سىلتەپ.
"ۇكىمەت ءدىني قىزمەت سالاسىنداعى زاڭنامانى، اتاپ ايتقاندا "دەسترۋكتيۆتى ءدىني اعىم" جانە ء"دىني راديكاليزم" ۇعىمدارىن ەنگىزۋ; ... قوعامدىق ورىنداردا بەتتى تانۋعا كەدەرگى كەلتىرەتىن كيىم زاتتارىن كيۋگە شەكتەۋلەر ەنگىزۋ جانە تاعى باسقالاردى جەتىلدىرۋ بويىنشا جۇمىس اتقارىلۋدا", دەلىنگەن ۇكىمەت باسشىسىنىڭ جاۋابىندا.
بۇل ماسەلەلەر بويىنشا شەشىم ازىرلەۋگە قمدب ماماندارى، تەولوگتار، ساراپشىلار قاۋىمداستىعى مەن مۇددەلى مەملەكەتتىك ورگاندار ماماندارى تارتىلعان.
ۇكىمەت باسشىسىنىڭ جاۋابىنا سايكەس، ينتەرنەت-كەڭىستىكتە جۇيەلى تۇردە ءدىني ەكسترەميزمنىڭ الدىن الۋ جانە قارسى ناسيحاتتاۋ بويىنشا جۇمىستار جۇرگىزىلىپ جاتىر.
"كونتەنتتى انىقتاۋ ماقساتىندا تۇراقتى نەگىزدە ينتەرنەت-كەڭىستىككە مونيتورينگ جۇرگىزىلەدى. ءدىني تاقىرىپتاعى قۇقىققا قايشى جانە رەزونانستىق ماتەريالدارعا دەن قويۋعا كومەكتەسەتىن "كيبەرنادزور" اقپاراتتىق جۇيەسى جۇمىس ىستەيدى", دەلىنگەن جاۋاپتا.
"كيبەرنادزور" جۇمىسى ارقىلى 97 مىڭنان استام دەسترۋكتيۆتى سيپاتتاعى سىلتەمەلەر بۇعاتتالعان. قازاقستاندىق قولدانۋشىلار ءۇشىن 248 ماتەريالعا قولجەتىمدىلىك بۇعاتتالىپ، ال 2971 ماتەريال جويىلعان.
بيىل الەۋمەتتىك جەلىلەردە ەكسترەميستىك ماتەريالداردى تاراتقانى ءۇشىن 70-كە جۋىق ادام اكىمشىلىك جاۋاپقا تارتىلعان.
