الەمدىك جانە ءداستۇرلى دىندەر ليدەرلەرىنىڭ VIII سەزى اياسىندا استانادا جاس ءدىني ليدەرلەردىڭ فورۋمى وتەدى. پارلامەنت سەناتىنىڭ توراعاسى، سەزد حاتشىلىعىنىڭ باسشىسى ماۋلەن اشىمباەۆ Qogam News جوباسىنا ارناپ دينارا ءساتجان مەن ءادىل سەيفۋللينگە بەرگەن سۇحباتىندا بۇل الاڭ ديالوگ ساباقتاستىعىن قامتاماسىز ەتۋ جانە جاھاندىق مىندەتتەردى شەشۋگە جاڭا ۇرپاقتى جۇمىلدىرۋ ءۇشىن قۇرىلعانىن ايتتى.
ۇيىمداستىرۋشىلار اتاپ وتكەندەي، قاتىسۋشىلار اراسىندا جاس ءدىني قىزمەتكەرلەر عانا ەمەس، سونىمەن قاتار عىلىمي جانە ساراپشىلار قوعامداستىعىنىڭ وكىلدەرى، جاس ساياساتكەرلەر مەن قوعام قايراتكەرلەرى دە بار. الاڭنىڭ ماقساتى – رۋحاني كوشباسشىلاردىڭ اعا بۋىنى وكىلدەرىنەن تاجىريبە ۇيرەنۋ، سونداي-اق جاستار اراسىندا اشىق ديالوگ، ءوزارا قۇرمەت جانە تولەرانتتىلىق مادەنيەتىن قالىپتاستىرۋ بولىپ وتىر.
«مەملەكەت باسشىسىنىڭ تاپسىرماسىمەن قازاقستاندا جاس ءدىني ليدەرلەردىڭ فورۋمى ەكىنشى رەت وتەدى. ءبىز رۋحاني كوشباسشىلار اراسىنداعى قارىم-قاتىناستان جاستاردىڭ ۇلگى العانىن، ديالوگتى كەيىنگى بۋىندار دا جالعاستىرعانىن قالايمىز»، – دەدى ماۋلەن اشىمباەۆ.
جاس ءدىني ليدەرلەر فورۋمى ديالوگتىڭ قۇندىلىعىن تۇسىنۋگە، ءتۇرلى مادەنيەتتەر مەن دىندەر وكىلدەرىمەن ورتاق ءتىل تابۋ جانە بەيبىتشىلىك پەن ءوزارا تۇسىنىستىككە ۇمتىلۋداعى جاڭا كوشباسشىلار بۋىنىن تاربيەلەۋدە ماڭىزدى قادام بولماق. وسىلايشا، استاناداعى سەزد جاھاندىق پىكىرتالاستار الاڭى رەتىندە عانا ەمەس، رۋحاني جانە قوعامدىق كوشباسشىلىقتىڭ بولاشاق ەليتاسىن قالىپتاستىرۋ قۇرالى رەتىندە دە ءوز ءرولىن ناقتىلايدى.
