شىمكەنتتە جۇك كولىگى بالانى قاعىپ كەتتى، دەپ حابارلايدى "ادىرنا" ۇلتتىق پورتالى الماتى ارناسىنا سىلتەپ.
قايعىلى وقيعا 1 ماۋسىم كۇنى كەشكى ۋاقىتتا بولدى. 11 جاستاعى نۇراسىل ءابدىراحمان دۇكەنگە بالمۇزداق الۋعا بارا جاتقان كەزدە جۇك كولىگىنىڭ استىنا ءتۇسىپ، وقيعا ورنىندا كوز جۇمدى.
كۋاگەرلەردىڭ ايتۋىنشا، بالا ەكى قارىنداسىمەن بىرگە جاياۋ جۇرگىنشىلەر وتكەلى ارقىلى جولدى كەسىپ وتپەك بولعان. سول ساتتە كوممۋنالدىق قىزمەتكە تيەسىلى اۋىر جۇك كولىگى ونى قاعىپ كەتكەن. وقيعا كۋاگەرلەرىنىڭ سوزىنشە، ارنايى تەحنيكا جول-كوشە تازالاۋ جانە قوقىس شىعارۋ جۇمىستارىن جۇرگىزىپ جۇرگەن.
«بالا جول ۇستىندە جاتتى. بىرنەشە مەتر جەردە باس سۇيەگىنىڭ بولىكتەرى مەن ىشكى اعزالارى شاشىلىپ جاتتى. ءولىم بىردەن بولعانى كورىنىپ تۇردى. بۇل وتە اۋىر جاعداي»، – دەدى جەرگىلىكتى تۇرعىن ەرعالي سۇلەيمەنوۆ.
بۇگىن مارقۇمدى تۋعان-تۋىستارى اقتىق ساپارعا شىعارىپ سالدى. نۇراسىل كوپبالالى وتباسىنداعى التى بالانىڭ ءبىرى بولعان. ول مەكتەپتە جاقسى وقىپ، سىنىبىنداعى ۇزدىك وقۋشىلاردىڭ قاتارىندا جۇرگەن.
مارقۇمنىڭ اكەسى قايرات تاسقۇلوۆ ۇلىنىڭ جول قوزعالىسى ەرەجەسىن ساقتاپ، ارنايى وتكەلمەن ءوتىپ بارا جاتقانىن ايتىپ، كىنالى تۇلعانىڭ زاڭ اياسىندا جاۋاپقا تارتىلۋىن تالاپ ەتتى.
«بالام جاياۋ جۇرگىنشىلەر وتكەلىمەن ءوتىپ بارا جاتقان. نەگە جۇرگىزۋشى وتكەلگە نازار اۋدارماعان؟ ءادىل شەشىم قابىلدانسىن»، – دەدى ول.
پوليتسيا مالىمەتىنشە، جۇك كولىگىنىڭ جۇرگىزۋشىسى ۇستالىپ، ۋاقىتشا ۇستاۋ يزولياتورىنا قامالعان. اتالعان دەرەك بويىنشا قىلمىستىق ءىس قوزعالىپ، تەرگەۋ امالدارى جۇرگىزىلىپ جاتىر.
